قىلمىستىڭ الدىن الۋ ماقساتىندا تۇركىستان قالاسىنىڭ پوليتسيا باسقارماسىندا بۇرىن سوتتى بولعاندار ساناتىنىڭ تىزىمدىك ەسەبىندە تۇرعان ازاماتتارعا ۋچاسكەلىك پوليتسيا ينسپەكتورلارى كريمينالدى پوليتسيا قىزمەتكەرلەرىمەن بىرلەسىپ, پروفيلاكتيكالىق جۇمىستار جۇرگىزگەن. ەكى ايدا وتكىزىلگەن 23 رەيدتىك شارا دا قىلمىس سانىن ازايتۋعا سەپتىگىن تيگىزگەن. اتاپ ايتساق, قاراقشىلىق – 100 پايىزعا, توناۋ – 55,6, بۇزاقىلىق – 27,3, ۇرلىق – 19,6 پايىزعا تومەندەگەن. بۇل دەرەكتەردى قالا اكىمى ر.ايۋپوۆتىڭ توراعالىعىمەن وتكەن اپتالىق ماجىلىستە جەرگىلىكتى پوليتسيا قىزمەتى باسشىسىنىڭ مىندەتىن اتقارۋشى ا.توقبەرگەنوۆ ءمالىم ەتتى.
دەگەنمەن, جىل باسىنان بەرى قوعامدىق ورىنعا ماس كۇيىندە كەلۋ, ءبۇلدىرۋ, لاستاۋ, تۇنگى تىنىشتىقتى بۇزۋ, بەلگىلەنبەگەن ورىندا تەمەكى شەگۋ سىندى زاڭ بۇزۋشىلىقتار ءجيى انىقتالعان. بۇل ورايدا ۇرلىق كوپ جاسالاتىن ورىندار, جول ەرەجەسى ءجيى بۇزىلاتىن كوشەلەر انىقتالىپ, ول جەرلەرگە بەينەكامەرالار ورناتىلاتىن بولادى. اپتالىق ماجىلىستە قالا اكىمى ر.ايۋپوۆ جەرگىلىكتى پوليتسيا قىزمەتىنىڭ اتقارعان جۇمىستارىنا كوڭىلى تولمايتىنىن ايتىپ, ءتيىستى قورىتىندى شىعارۋ قاجەتتىگىن ەسكەرتتى.
