ونىڭ ايتۋىنشا, حالىقتى جۇمىسپەن قامتۋدىڭ نەگىزگى قۇرالى جۇمىسپەن قامتۋدىڭ جاڭا جول كارتاسى بولادى. ونى ىسكە اسىرۋعا 1 ترلن تگ قاراستىرىلعان. باعدارلامادا 7 مىڭنان استام جوبا قامتىلاتىن بولادى. ولاردىڭ 300-دەن استامى جاڭا تۇراقتى جۇمىس ورىندارىن قۇرۋعا مۇمكىندىك بەرەتىن وندىرىستىك, پەرسپەكتيۆالى جوبالار.
«جۇمىسشىلاردىڭ ەڭبەكاقىسى 85 مىڭ تەڭگەدەن تومەن ەمەس 242 مىڭ جۇمىس ورنى اشىلادى. جول كارتاسىنىڭ تالاپتارى مەن شارتتارى بويىنشا كەمىندە 90% وتاندىق جۇمىسكەرلەر بولۋى ءتيىس. جۇمىسقا تارتىلعان قىزمەتكەرلەردىڭ كەمىندە جارتىسى جۇمىسسىز جاستارعا باسا نازار اۋدارا وتىرىپ, حالىقتى جۇمىسپەن قامتۋ ورتالىقتارى ارقىلى تارتىلۋى ءتيىس», — دەدى ەڭبەك جانە حالىقتى الەۋمەتتىك قورعاۋ ءمينيسترى.
ەل پرەزيدەنتىنىڭ تاپسىرماسى بويىنشا ءىرى قالالاردا جۇمىس ىستەگەن جانە بۇگىنگى كۇنى جۇمىسسىز قالىپ وتىرعان وڭىرلەردەگى جاستار جول كارتاسىنىڭ جوبالارىنا قاتىسا الادى. ولارعا 85 مىڭ تەڭگە كولەمىندە كوتەرمە اقى تولەنەدى. بۇل ءۇشىن جەرگىلىكتى اتقارۋشى ورگاندار ءموبيلدى پۋنكتتەر قۇرىپ, ولاردى جۇمىسقا تارتۋ جونىندە شارالار قابىلداۋى ءتيىس.
«بۇگىنگى تاڭدا اكىمدىكتەر جۇمىسسىزداردى قابىلداۋ كەزىندە جەرگىلىكتى جۇمىسپەن قامتۋ ورتالىقتارىنىڭ ەلەكتروندىق جۇيەلەرىن تولىققاندى پايدالانۋدى قامتاماسىز ەتۋى ءتيىس. جول كارتاسى اياسىندا جۇزەگە اسىرىلاتىن جوبالاردىڭ 35%-ى الەۋمەتتىك سالا نىساندارىنا, 34%-ى ينجەنەرلىك-كولىك ينفراقۇرىلىمىن جاڭعىرتۋعا, 14%-ى تۇرعىن ءۇي-كوممۋنالدىق ماسەلەلەردى شەشۋگە, 17%-ى ەلدى مەكەندەردى اباتتاندىرۋعا باعىتتالعان», — دەدى ب. نۇرىمبەتوۆ.
وڭىرلەر بولىنىسىندە 62-دەن 1695-كە دەيىن جوبا ۇسىنىلدى, ولاردىڭ 12%-ى — ءىرى وندىرىستىك جوبالار.
«ەندى اكىمدەر حالىقتى جۇمىسقا بارىنشا تارتىپ, اتالعان جوبالاردى ساپالى ءارى ۋاقىتىلى جۇزەگە اسىرۋى كەرەك. جۇمىسپەن قامتۋ بويىنشا “ەڭبەك” باعدارلاماسى دا ىسكە اسىرىلۋدا. بۇل باعدارلامانى جۇزەگە اسىرۋعا قوسىمشا 50 ملرد تەڭگە ءبولىنىپ, قوسىمشا 136 مىڭ جۇمىس ورنى اشىلادى», — دەدى ب. نۇرىمبەتوۆ.
جالپى, جۇمىسپەن قامتۋدىڭ جول كارتاسى بيىل 600 مىڭنان استام ادامدى جۇمىسپەن قامتاماسىز ەتەدى دەگەن بولجام بار.
سونىمەن قاتار, مەملەكەت باسشىسىنىڭ تاپسىرماسى بويىنشا تج رەجيمى كەزەڭىندە ەلىمىزدە ءوز تابىستارىنان ايىرىلعان تۇلعالارعا ماسق قورىنان 42 500 تەڭگە مولشەرىندە الەۋمەتتىك تولەم ەنگىزىلدى. بۇل تولەمدەردى رەسمي ءوزىن-ءوزى جۇمىسپەن قامتىعاندار دا, بەيرەسمي تۇردە جۇمىس ىستەيتىندەر دە الا الادى. رەسمي ەمەس جۇمىس ىستەيتىن ءوزىن-ءوزى جۇمىسپەن قامتىعان ازاماتتاردى ەسكەرە وتىرىپ, 3 ملن-عا دەيىن جۇمىسكەر قامتىلۋى مۇمكىن, جالپى تولەمگە بولىنەتىن قاراجات ايىنا 127,5 ملرد تەڭگەنى قۇرايدى.
