مەملەكەتتىك باس سانيتارلىق دارىگەر ايجان ەسماعامبەتوۆا الەمدە كوروناۆيرۋس ىندەتىنىڭ جاعدايى ءالى دە تۇراقتى ەمەس ەكەنىن ايتادى.
«ۆيرۋس جۇقتىرعانداردىڭ سانى ارتىپ كەلەدى, بۇگىندە الەمدە ىندەتكە شالدىققان 854 663 ادام بولسا, ونىڭ ىشىندە 42 046 ادام قايتىس بولدى. ەلىمىزدە 369 ناۋقاس تىركەلدى. قازاقستان رەسپۋبليكاسىنىڭ تۇرعىندارى اراسىندا تارالۋىن بولدىرماۋ ماقساتىندا مەن بۇگىن «قازاقستان رەسپۋبليكاسى تۇرعىندارىنىڭ قاۋىپسىزدىگىن قامتاماسىز ەتۋ شارالارى تۋرالى» قاۋلى شىعاردىم, سوعان سايكەس ينفەكتسيانىڭ تارالۋىنىڭ قازىرگى سيپاتىن ەسكەرە وتىرىپ, ءبىز ەلىمىزگە كەلگەن ادامداردى باقىلاۋدى جالعاستىرامىز. تۇتاستاي العاندا نەگىزگى ەكپىن اۋرۋدىڭ الدىن الۋعا باعىتتالعان. بۇگىننەن باستاپ شەتەلدەن كەلگەن بارلىق ادامدار كارانتيندىك اۋرۋحانالاردا وقشاۋلاناتىن بولادى. ناتيجەلەردى العاننان كەيىن وڭ ناتيجەسى بار ادامدار ەمدەۋ ءۇشىن جۇقپالى اۋرۋلار اۋرۋحاناسىنا, ال تەرىس ناتيجەسى بار ادامدار وقشاۋلانۋعا ءۇي كارانتينىنە جىبەرىلەدى. بۇل ەرەجە, ادەتتەگىدەي, اۆياكومپانيا ۇشقىشتارىنا جانە لوكوموتيۆ بريگادالارىنىڭ مۇشەلەرىنە, تەمىر جول كولىگىمەن بايلانىستى ادامدارعا جانە شەتەلدەن كەلەتىن جۇكتەردى حالىقارالىق اۆتوموبيلمەن تاسىمالداۋدى جۇزەگە اسىراتىن جۇرگىزۋشىلەرگە قولدانىلادى. ەاەو مەن وزبەكستان رەسپۋبليكاسىنان تەمىر جول جانە اۆتوموبيل وتكىزۋ پۋنكتتەرى ارقىلى كەلگەن ادامدار ۇيدە 14 كۇن بويى وقشاۋلانۋعا جاتادى. سىرتقى ىستەر مينيسترلىگىنىڭ كەلىسىمى بويىنشا قازاقستانعا كەلگەن ديپلوماتتار مەن ولاردىڭ وتباسى مۇشەلەرىن ءۇي كارانتينىنەن وتكىزۋدى, مىندەتتى تۇردە تەكسەرۋدى كوزدەيتىن نورما ەنگىزىلدى», دەدى ول.
سونىمەن قاتار باس سانيتارلىق دارىگەر قازاقستاندا كوروناۆيرۋس ينفەكتسياسىنان قايتىس بولعانداردى جەرلەۋ الگوريتمى جاريالانعانىن تىلگە تيەك ەتتى.
«الگوريتمگە سايكەس, ءمايىتتى تۋىستارىنا بەرۋگە بولمايدى. جاقىن تۋىستارىنا عانا 3 مەتر قاشىقتىقتا قوشتاسۋعا 30 مينۋت ۋاقىت بەرىلەدى. جەرلەۋ راسىمىنە ءبىر عانا ءدىني قىزمەتكەر قاتىسادى. جەرلەۋ ءراسىمى سانيتارلىق-ەپيدەميالىق قىزمەت جۇمىسشىلارىنىڭ باقىلاۋىمەن جانە جەرگىلىكتى اتقارۋشى ورگاننىڭ قاتىسۋىمەن وتەدى جانە ەپيدەمياعا قارسى بارلىق شارالار قاتاڭ ساقتالادى. ءبىزدىڭ ارقايسىمىز ءوز دەنساۋلىعىمىزعا, جاقىن ادامدارىمىزدىڭ دەنساۋلىعىنا جانە جالپى قوعامعا جاۋاپتىمىز. سوندىقتان ساقتىق شارالارىن قاتاڭ ۇستانۋعا شاقىرامىن», دەدى ا.ەسماعامبەتوۆا.
