ايماقتار • 01 ءساۋىر، 2020

تۇركىستان: ينفەكتسيا انىقتالعان اۋىل مەن مولتەك اۋداندا كارانتين جاريالاندى

848 رەتكورسەتىلدى

تۇركىستان وبلىسىنىڭ اكىمى ومىرزاق شوكەەۆ وڭىردە سوڭعى ەكى كۇندە ورىن العان جاعدايعا بايلانىستى تۇرعىندارعا ۇندەۋ جولدادى. ءبىرىنشى ساۋىردە وبلىستا COVID-19 ۆيرۋسىن جۇقتىرعان ازاماتتاردىڭ سانى 5-كە جەتتى. ناۋقاستاردىڭ احۋالى قالىپتى جاعدايدا، دارىگەرلەردىڭ باقىلاۋىنا الىنىپ، ەمدەۋ جۇمىستارى جۇرگىزىلۋدە.

ەپيدەميولوگ ماماندار تاراپىنان بۇگىن تىركەلگەن اۋرۋ وشاقتارىندا زالالسىزداندىرۋ، بايلانىستا بولعانداردى تابۋ جانە وقشاۋلاۋ بويىنشا ەپيدەمياعا قارسى ءىس-شارالار ۇيىمداستىرىلعان. ينفەكتسيا تابىلعان جەتىساي اۋدانىنداعى ابدىحالىق اۋىلى مەن جەتىساي قالاسىنداعى مولتەك اۋداندا كارانتين جاريالاندى.

وبلىس اكىمى حالىققا ۇندەۋىندە جەتىساي اۋدانىنا دەزينفەكتسيا، دەنساۋلىق ساقتاۋ، الەۋمەتتىك قورعاۋ سالاسىنان ارنايى مامانداردان قۇرىلعان ءموبيلدى توپ جىبەرىلگەنىن ءمالىم ەتتى. قوسىمشا كومەك رەتىندە مەديتسينالىق جابدىقتار مەن  كولىكتەر دايىندالعان. وبلىستىڭ وزگە اۋداندارىنان ينفەكتسيونيست جانە رەانيموتولوگتاردان قۇرالعان 6 بريگادا جەتىسايعا اتتانعان.  وبلىستىڭ باس ينفەكتسيونيست دارىگەرى اۋداندا وسى شارالارعا باسشىلىق ەتەدى. كەرەكتى توسەك-ورىندار، گوسپيتالدار تولىق دايىن.  سونداي-اق وبلىس اكىمى اۋدان اكىمىنە جانە ءتيىستى ورگاندارعا ەلدى مەكەندەر شەكاراسىنا بلوك-بەكەتتەر قويۋدى تاپسىرعانىن مالىمدەدى. توتەنشە جاعداي رەجيمىن بۇزعان ازاماتتار زاڭ اياسىندا جاۋاپقا تارتىلاتىنىن ەسكەرتتى. «اۋداندا ينفەكتسيا وشاعى مەن قوعامدىق ورىنداردا  اۋقىمدى دەزينفەكتسيا جۇمىستارى جۇرگىزىلەدى. بۇل وڭىردە ىندەتتىڭ تارالۋ قارقىنى وتە جوعارى. وسى رەتتە وبلىس تۇرعىندارىن توتەنشە جاعدايعا بايلانىستى قابىلدانعان شارالارعا تۇسىنىستىكپەن قاراپ، ءتيىستى تارتىپتىك شارالاردى ساقتاۋعا، دارىگەرلەردىڭ نۇسقاۋلىقتارىن بۇلجىتپاي ورىنداۋعا شاقىرامىن»، دەدى وبلىس اكىمى ۇندەۋىندە.

ۆيرۋستىڭ تارالۋىن بولدىرماۋ ماقساتىندا وبلىس اۋماعىندا بارلىق ازاماتتار مەديتسينالىق بەتپەردە كيىپ ءجۇرۋى ءتيىس. دۇكەندەر مەن قوعامدىق ورىنداردا بەتپەردەسىز جۇرۋگە تىيىم سالىنادى. تۇرعىندار ۇيدەن تەك قانا ازىق-ت ۇلىك، ءدارى-دارمەك الۋعا نەمەسە جۇمىسقا بارۋ ءۇشىن شىعۋى كەرەك.  وتباسىلىق مەرەكەلەر مەن توي-جيىنداردى وتكىزۋگە قاتاڭ تىيىم سالىنادى. سونداي-اق، ومىرزاق شوكەەۆ تۇرعىنداردى الەۋمەتتىك جەلىلەردى شارلاعان ءارتۇرلى اقپاراتتارعا سەنبەي، مەملەكەتتىك ورگاندار تاراتقان رەسمي مالىمەتتەرگە عانا ءمان بەرۋگە شاقىردى.

 

تۇركىستان وبلىسى

سوڭعى جاڭالىقتار

ۇقساس جاڭالىقتار