ايماقتار • 01 ءساۋىر، 2020

اقسۋلىق تىگىنشى ونلاين رەجيمدە ماسكا تىگۋدى ۇيرەتۋدە

22 رەتكورسەتىلدى

30 جىلدىق تىگىنشىلىك تاجىريبەسى بار نۇربانۋ العاشباەۆا «باستاۋ بيزنەس» باعدارلاماسى بويىنشا 2018 جىلى ءبىر اي كۋرسقا قاتىسقان، دەپ حابارلايدى pavlodarnews.kz ءتىلشىسى.

بۇگىنگى تاڭدا كەلىنى گۇلجار جاپباسوۆامەن بىرگە ۇلتتىق ويۋ-ورنەكتەرمەن بەزەندىرىلگەن قۇراق كورپە، قىز جاساۋى بويىنشا تاپسىرىس قابىلداپ، جەكە كاسىبىن دوڭگەلەتىپ وتىر. وسىدان ەكى جىل بۇرىن «اتامەكەن» ۇكپ  ارقىلى 240500 تەڭگە كولەمىندە گرانتقا يە بولعان.

- انام بۇعان دەيىن بالاباقشادا تاربيەشى بولىپ جۇمىس ىستەگەن بولاتىن، - دەيدى گۇلجار جاپباسوۆا. – كەيىن ءوزىمىزدىڭ جەكە ءىسىمىزدى دامىتۋ تۋرالى وي پايدا بولدى. وسىلايشا مەن دە «جاس كاسىپكەر باعدارلاماسىنا قاتىسىپ، 505 مىڭ تەڭگە گرانتقا قول جەتكىزدىم. الەمدە ورىن العان جاعدايدا ءبىز دە ءوز تاراپىمىزدان قوعامعا ۇلەسىمىزدى قوسۋ ماقساتىندا تەگىن شەبەرلىك ساعاتىن وتكىزۋدى ءجون كوردىك. ازىرگە ون شاقتى ادام قاتىستى. كەيدە ۆيدەوسىن تەلەفون ارقىلى جىبەرۋدى سۇراپ جاتادى. قانداي دا ءبىر سۇراقتار  تۋىنداپ جاتسا، اقىل-كەڭەس بەرۋگە دايىنبىز. كوبى دايىن بەتپەردە العاندى ءجون كورەدى.

قولونەرشىلەر بىلتىر اقپان ايىنان باستاپ «دوستىق» بازارىنىڭ ىشىنەن ورىندى جالعا الىپ كەلەدى. بولاشاقتا «نۇر-امي» اتەلەسى جەر تەلىمىن الىپ، جەكە ورىنجاي تۇرعىزۋدى جوسپارلاپ وتىر.

– جاستاردىڭ اراسىندا ءتۇرلى ورنەكتەرمەن بەزەندىرىلگەن، ەسىمدەرى جازىلعان ماسكالارعا سۇرانىس بولادى، - دەيدى «جاس كاسىپكەر» جوباسىنىڭ قاتىسۋشىسى. – الايدا  ول ءۇشىن ارنايى  قۇرال-جابدىقتار كەرەك. بۇعان قوسا، ۋاقىتتى تالاپ ەتەدى. ماسكا تىگۋدىڭ ۇلگىسىن ينستاگرام جەلىسىنەن  كورۋگە بولادى نەمەسە WhatsApp ارقىلى جىبەرە الامىز. قازىرگى تاڭدا كۇنىنە 100-دەن استام ماسكا دايىندايمىز.

سوڭعى جاڭالىقتار

ۇقساس جاڭالىقتار