«بالقاشكولىنىڭ جاعالاۋىندا انتالياداعىدان كەم ەمەستەي دەمالىس كەشەنى پايدا بولىپتى» دەگەن حابار ەلەڭ ەتكىزگەن ەدى جاقىندا. الەمنىڭ كوپتەگەن ەلدەرىنىڭ وسىنداي تابيعات ارقاسىندا ءتۋريزمدى دامىتىپ, شىلقىپ تا, شالقىپ تا وتىرعان جايى باردا بۇل جاڭالىق كۋانتقانى راس. بابالارىمىز كوكشە تەڭىز دەپ تە اتاعان شالقار ايدىننىڭ سامال تولقىنى جۇمساق قۇمدى ايمالاعان وڭاشالاۋ ءمۇيىسى اياسىندا دەمالىپ قايتۋشىلار لەبىزى دە سوندا جەتەلەپ, قىزىقتىرماي قالماعان. ارينە, كوزبەن كورگەننىڭ ءجونى ءبولەك ەمەس پە؟! شاھاردان ءسۇت پىسىرىمدەي عانا ادەمى تۇسقا اياق باسىلعاندا-اق ونىڭ مەيماندارىنىڭ ماقتاۋى تەگىن ەمەستىگى سەزىلە ءتۇستى. اشىلعانىنا كوپ ۋاقىت بولماسا دا جۇرت اۋزىنا ىلىكسە ىلىككەندەي ەكەن.
«بالقاشكولىنىڭ جاعالاۋىندا انتالياداعىدان كەم ەمەستەي دەمالىس كەشەنى پايدا بولىپتى» دەگەن حابار ەلەڭ ەتكىزگەن ەدى جاقىندا. الەمنىڭ كوپتەگەن ەلدەرىنىڭ وسىنداي تابيعات ارقاسىندا ءتۋريزمدى دامىتىپ, شىلقىپ تا, شالقىپ تا وتىرعان جايى باردا بۇل جاڭالىق كۋانتقانى راس. بابالارىمىز كوكشە تەڭىز دەپ تە اتاعان شالقار ايدىننىڭ سامال تولقىنى جۇمساق قۇمدى ايمالاعان وڭاشالاۋ ءمۇيىسى اياسىندا دەمالىپ قايتۋشىلار لەبىزى دە سوندا جەتەلەپ, قىزىقتىرماي قالماعان. ارينە, كوزبەن كورگەننىڭ ءجونى ءبولەك ەمەس پە؟! شاھاردان ءسۇت پىسىرىمدەي عانا ادەمى تۇسقا اياق باسىلعاندا-اق ونىڭ مەيماندارىنىڭ ماقتاۋى تەگىن ەمەستىگى سەزىلە ءتۇستى. اشىلعانىنا كوپ ۋاقىت بولماسا دا جۇرت اۋزىنا ىلىكسە ىلىككەندەي ەكەن.
«نۇرباقىت» دەگەن اتاۋىنا جاراستى دەمالىس كەشەنىنىڭ ءدال جاعالاۋداعى ءۇش قاباتتى عيماراتىنىڭ سىرتقى بەينەسى بىردەن كوز سۇيسىندىرسە, ىشكى ءسانىنىڭ كەلىستىگى دە كىرپياز تۋريستەردىڭ ءوزىن دە تامساندىرماي قويمايتىنداي كورىنەدى. دەمالۋشىلاردىڭ قاندايلىق تا تالاپ-تالعامدارىنا ساي 4, 3 جانە 2 ورىندىق 14 ءبولمەنىڭ قاي-قايسىسى دا جانعا جايلى. بارلىعى ەركىن, الاڭسىز دەمالۋ ۋاقىتىنا نە كەرەكتىنىڭ بارىمەن جابدىقتالعان. باعاسى دا سونشالىقتى قىمبات ەمەس جانە قىزمەت كورسەتۋ ساپاسى ريزا ەتەرلىكتەي كەز كەلگەنىن 15 مىڭ تەڭگەگە جالعا الىپ, بۇل ءدۇنيە راحاتىنا باتۋعا تاماشا جاعداي بار.
قول سوزىم جەردەگى ۇزىننان-ۇزاق سوزىلعان جاعاجاي كۇنگە قىزدىرىنىپ, مايدا قۇمىنا اۋناۋدى ۇناتۋشىلاردىڭ قۇمارىن قاندىرارلىقتاي-اق. قالاۋىنا قاراي جايعاسىپ جاتىپ دەمالۋعا ارنالعان قاز-قاتار جاتاق-ورىندىقتار جانە ءتىزىلىپ تۇر. بەلگى بەرىلسە سالقىن سۋسىن قولعا ۇمسىنا قالادى. بالاقايلاردىڭ اسىر سالىپ ويناۋىنا, كول سۋىنا شومىلۋىنا ارنالعان ورىن قىزىعى بولەك. ولاردى دۋمانعا بولەۋشىلەر اكە-شەشەلەرىن ەش الاڭداتپايدى. الىس-جاقىننان كەلۋشىلەردىڭ ىشىنەن رەسەيلىك اندرەي سوكولوۆپەن تىلدەسكەنىمىزدە «مەن بۇرىنعى بالقاشتىق رەتىندە بۇل جەردىڭ تانىعىسىز وزگەرۋىنە قۋانىپ قالدىم. وسىعان دەيىن جابايى جاعاجايدى قىزىعارلىق دەمالىس ورنىنا اينالدىرۋشى كاسىپكەر ىسىنە قالايشا ريزا بولماسسىڭ», دەدى اعىنان جارىلا.
ءبىز بىلگەنىمىزدەي, ول تىلەۋگەرەي ماكانالين اتتى ازامات ەكەن. كەزىندە تانىمال بوكسشى بولعان تىلەكەڭ بالقاشتىڭ بولاشاق باعى تۋريزمدە عوي. «كوز قورقاق, قول باتىر» دەلىنگەن ەمەس پە, تاۋەكەلگە بەل بۋىپ, وسى ءىستى العاشقى ۇيىمداستىرۋشىلاردىڭ ءبىرى بولدىم. ەندى جازدا عانا ەمەس, قىستا دا دەمالۋشىلاردى قارسى الۋدىڭ جولدارىن ويلاستىرىپ ءجۇرمىن, دەيدى.
دەمالىس كەشەنىنىڭ كۇننەن-كۇنگە قۇشاعى اشىلۋداعى قىزمەتى بالقاشتىقتاردىڭ جۇمىسپەن قامتىلۋىنا اسەرىن تيگىزىپ وتىرۋىمەن دە يگىلىكتى. بۇگىندە مۇندا 20-عا تارتا جاس جىگىتتەر مەن قىزدار ەڭبەك ەتەدى. سولاردىڭ ءبىرى گۇلدەراي بايتۋ دەگەن قارىنداسىمىز «ءبىراز ۋاقىت جۇمىسسىز ءجۇر ەدىم. داياشى بولىپ قابىلداندىم. ەڭبەكاقىم ءتاپ-ءتاۋىر. اكە-شەشەمە, باۋىرلارىما قولعابىسىم تيەتىن بولدى. تىلەۋگەرەي اعامىز دەمالۋشىلار قاتارىن ۇلعايتۋعا جاعداي جاساۋدى كەڭەيتپەك ويدا. ءبارىمىز سونى تىلەيمىز. ويتكەنى, تاعى بىرنەشە تۇرعىلاستارىمىزعا جۇمىس تابىلار ەدى», دەگەندەي ماكانالين ىسىنە تىلەۋقورلار كوپ.
كاسىپكەرلىگىمەن قاتار تىلەكەڭ بالقاش قالالىق بوكس فەدەراتسياسىنىڭ پرەزيدەنتى تۇرعىسىندا جەرگىلىكتى سپورتتىڭ دامۋىنا دا اتسالىسىپ جۇرۋىمەن تانىمال. ونىڭ ۇيىمداستىرۋىمەن جىل سايىن بالقاشتىق بىلعارى قولعاپ شەبەرلەرى امانبەك ماكانالين, ەرلان نوكەربەكوۆ, جانات ساتەنوۆتى ەسكە تۇسىرۋگە ارنالعان رەسپۋبليكالىق اشىق تۋرنير ءوتىپ تۇرادى. كورشى مەملەكەتتەر بالعىن بوكسشىلارى دا قاتىسىپ, كۇش سىناساتىن جارىستىڭ باس دەمەۋشىسى دە ءاردايىم ءوزى.
جەرگىلىكتى ءتۋريزمدى تۇرلەندىرۋگە بەرىك بەل بۋعان تىلەۋگەرەي ماكانالين بالقاشتىڭ دا اتا عى دەماۋشىلار جۇماعى رەتىندە الىسقا جاڭعىرۋىن ماقسات تۇتادى. ءۇمىت ۇلكەيتكەن, سەنىم جالىنداتقان ءىس باسى سوعان ۇمتىلدىرا تۇسەدى.
ايقىن نەسىپباي,
«ەگەمەن قازاقستان»,
قايرات ءابىلدينوۆ,
جۋرناليست.
بالقاش.
