پرەزيدەنت • 31 ناۋرىز، 2020

مەملەكەت باسشىسى قاسىم-جومارت توقاەۆتىڭ مالىمدەمەسىنىڭ تولىق ءماتىنى

2663 رەتكورسەتىلدى

ەلىمىزدەگى توتەنشە جاعدايعا جانە مەملەكەتتىڭ داعدارىسقا قارسى ءىس-شارالارىنا بايلانىستى پرەزيدەنت قاسىم-جومارت توقاەۆ مالىمدەمە جاسادى.

 

قۇرمەتتى وتانداستار!

 

قازىر بۇكىل الەم بۇرىن-سوڭدى بولماعان كۇردەلى جاعدايمەن بەتپە-بەت كەلىپ وتىر.

كوروناۆيرۋس ىندەتى دۇنيە ءجۇزىن جايلاپ بارادى.

بۇگىندە 177 مەملەكەتتە 800 مىڭعا جۋىق ادام وسى دەرتكە شال­دىقتى.

ونى جۇقتىرعاندار سانى كۇن­نەن-كۇنگە ارتۋدا.

ءبىز توتەنشە جاعداي جاريالاپ، قازاقستاندا ۆيرۋستىڭ جاپپاي تارالۋىنا جول بەرمەدىك.

سونىڭ ارقاسىندا احۋالدى باقىلاۋدا ۇستاپ وتىرمىز.

حالقى قازاقستانمەن شامالاس كەيبىر ەلدەردە كوروناۆيرۋسقا شالدىققاندار ونداعان ەسە كوپ.

مەن ەلوردا مەن الماتىدا عانا ەمەس، ەلىمىزدىڭ بارلىق وڭىر­­ىندە كارانتيندى كۇشەيتۋدى تاپسىردىم.

بارشا قازاقستاندىقتارعا سابىر ساقتاپ، تۇسىنىستىك تانىتقانى ءۇشىن العىسىمدى ايتامىن.

ءبىز دۇربەلەڭ تۋدىرۋعا جول بەر­مەيمىز.

ءدال وسى كەزدە حالىق مەملەكەتكە قولداۋ كورسەتۋى كەرەك.

بۇل – اسا ماڭىزدى.

كوروناۆيرۋس – باتپانداپ كىرىپ، مىسقالداپ شىعاتىن قاۋىپتى دەرت. 

دەگەنمەن، ءبىز ىندەتكە شال­دىق­قان ادامدارعا بارلىق قاجەتتى كومەكتى كورسەتەمىز.

بۇگىندە بۇكىل ەلىمىز دارىگەرلەر مەن مەديتسينا قىزمەتكەرلەرىنىڭ قايسارلىعىنا ءتانتى بولۋدا.

ولار – ادام ومىرىنە اراشا ءتۇسىپ جاتقان بۇگىنگى كۇننىڭ باتىر­لارى.

سوندىقتان پاندەمياعا قار­سى كۇرەستىڭ الدىڭعى لەگىندە جۇر­گەندەرگە قوسىمشا قولداۋ كورسەتۋ جونىندە شەشىم قابىلدادىم.

دارىگەرلەرگە جانە مەديتسينا قىزمەتكەرلەرىنە 3 اي بويى قوسىمشا ۇستەمەاقى تولەنەدى.

مەديتسينا قىزمەتكەرلەرىنىڭ ءومىرىن ساقتاندىرۋ ماسەلەسى دە شەشىمىن تاپتى.

ارينە، اق حالاتتى ابزال جاندار بۇدان دا زور قولداۋعا لايىق.

سونداي-اق پوليتسيا قىز­مەت­كەرلەرى مەن اسكەري قىزمەتشىلەرگە دە ايرىقشا العىس بىلدىرەمىن.

توتەنشە جاعداي رەجىمىنىڭ قاشاندا ەكونوميكالىق جانە الەۋمەتتىك سالدارى بولادى.

ءبىز ءۇشىن ازاماتتاردىڭ دەن­ساۋ­لىعىمەن قاتار ولاردىڭ ءوز تابىسىنان ايىرىلماۋى دا
ماڭىزدى.

مەن بۇعان دەيىن داعدارىسقا قارسى العاشقى شارالار توپتاماسىن جاريالادىم. ۇكىمەت پەن اكىمدەر ونى جۇزەگە اسىرۋدى باس­تادى. 

جاعدايدىڭ ۋشىعا تۇسكەنىن ەسكەرىپ، ازاماتتارعا جانە بيزنەسكە ودان ءارى قولداۋ كورسەتۋ جونىندە مىناداي قوسىمشا شە-شىمدەر قابىلدادىم.

ءبىرىنشى. ينفلياتسيانىڭ ارتۋىنا بايلانىستى زەينەتاقى، مەملەكەتتىك جاردەماقى جانە اتاۋ­لى الەۋمەتتىك كومەك مول­شەرىن جىلدىق ولشەممەن العاندا 10 پايىزعا يندەكساتسيالاۋدى تاپسىرامىن.

وسىعان وراي، اتالعان سانات­تاعى ازاماتتاردىڭ تابىسىن ارتتىرۋ ءۇشىن مەملەكەت تاراپىنان 200 ميلليارد تەڭگەدەن استام قاراجات بولىنەدى.

ەكىنشى. بيىلعى 23 ناۋرىز­دا تابىسىنان ايىرىلعان ازا­مات­تارعا ەڭ تومەنگى جالاقى مول­شەرىندە قولداۋ كورسەتىلەتىنى تۋرالى ايتتىم.

ەندى وسى كومەكتى الاتىن ازا­مات­تاردىڭ ساناتىن كەڭەيتۋدى تاپ­سىرامىن.

42500 تەڭگە كولەمىندەگى بۇل قا­را­جات بۇرىن تۇراقتى جۇ­مىس ىستەپ، جالاقى العاندارعا عانا ەمەس، سونداي-اق ءوزىن ءوزى جۇ­مىس­پەن قامتىعان جانە رەسمي تىركەل­مەي ەڭبەك ەتەتىن ازاماتتارىمىزعا دا بەرىلۋگە ءتيىس.

مۇنداي كومەكتى الۋ ءۇشىن ولار وزدەرىنىڭ مارتەبەسىن بەكىتۋگە ءتيىس. سودان كەيىن اتالعان ازاماتتار توتەنشە جاعداي كەزەڭىندە مەملەكەتتەن اي سايىن الەۋمەتتىك كومەك الىپ وتىرادى.

ەش جەردە كورسەتىلمەسە دە جەت­كىلىكتى تابىسى بار ادامدار وسى تولەمدى الۋ ءۇشىن ءوتىنىم بەرۋى مۇمكىن.

بۇعان دەيىن دە وسىنداي جاعداي بولعانى جاسىرىن ەمەس.

بىراق كەيبىر جاۋاپسىز ادام­دار­دىڭ كەسىرىنەن شىن مانىندە كومەككە مۇقتاج ءجۇز مىڭداعان ازاما­تى­مىزدى قولداۋسىز قال­دىرا المايمىز.

جالپى، 23 ناۋرىزدا جانە بۇگىن جاريالانعان شارالاردىڭ ناتيجەسىندە 3 ميلليونعا جۋىق ازاماتىمىزعا كومەك كورسەتىلەدى.

ءۇشىنشى. مىندەتتى الەۋمەتتىك مەديتسينالىق ساقتاندىرۋ جۇيەسى بويىنشا ساقتاندىرىلماعان ازا­ماتتاردىڭ مەديتسينالىق كو­مەك الۋ قۇقىعىن 1 ساۋىردەن 1 شىلدەگە دەيىن ۇزارتۋدى تاپسىرامىن.

اتالعان ساقتاندىرۋ جۇيەسىندە بولۋ-بولماۋىنا قاراماستان وسى كەزەڭدە ازاماتتارىمىزعا تولىق مەديتسينالىق كومەك كورسەتىلۋگە ءتيىس.    

ءتورتىنشى. تۇرمىسقا قاجەتتى زاتتار مەن ازىق-ت ۇلىكتى تەگىن الا­تىن ازاماتتاردىڭ ساناتىن كەڭەي­تۋ كەرەك. 

مۇنداي كومەك ءتۇرى قوسىمشا 1-ءشى، 2-ءشى، 3-ءشى توپتاعى مۇگەدەك­تەر­گە، مۇگەدەك بالالارعا جانە جۇ­مىس­سىز رەتىندە تىركەلگەن ازا­مات­تارعا بەرىلۋى قاجەت. 

وسىنداي شارا ارقىلى 800 مىڭ­نان استام ادامعا كومەك كور­سە­تەمىز. 

بۇل رەتتە تۇرمىسقا قاجەتتى زاتتار مەن ازىق-ت ۇلىكتىڭ شەكتى مولشەرىن بەكىتكەن ءجون.

جەرگىلىكتى شاعىن جانە ورتا بيزنەستى ءونىم ءوندىرۋ جانە ونى جەتكىزۋ ىسىنە جۇمىلدىرۋ قاجەت.

ۇكىمەت وتاندىق ءىت-كوم­پانيالاردى الەۋمەتتىك قولداۋعا بولىنگەن قاراجاتتىڭ ماقساتقا ساي جۇمسالۋىنا ءتيىمدى مونيتورينگ جۇرگىزەتىن پلاتفورما ازىرلەۋ جۇمىسىنا تارتۋى كەرەك.

الداعى ۋاقىتتا مۇنداي كومەكتى زاتتاي ەمەس، ازامات­تار­دىڭ وزدەرى تاڭداپ، ساتىپ الۋى ءۇشىن قارجىلاي بەرۋگە كوشكەن ءجون.

بەسىنشى. كوكتەمگى ەگىس ناۋ­قا­­نىن ۋاقتىلى وتكىزۋ اسا ما­ڭىزدى.

بيۋدجەتتەن 70 ميلليارد تەڭگە بولىنەدى. بۇل قاراجات شارۋالارعا «اگرارلىق نەسيە كورپوراتسياسى» اق ارقىلى بەرىلەدى. ونىڭ ۇستەمەاقىسى 5 پايىزدان اسپايدى. 

وسى ماقساتقا «قاراپايىم زاتتار ەكونوميكاسى» باعدار­لاماسى ارقىلى قوسىمشا 100 ميلليارد تەڭگە ءبولۋدى تاپسىرامىن.

اتالعان باعدارلاما ايا­سىن­داعى تۇپكى مولشەرلەمە بارلىق سالالار بويىنشا بىرىزدەندىرىلىپ 6 پايىز بولدى.

ەڭ الدىمەن شاعىن جانە ورتا شارۋا قوجالىقتارىنا قولداۋ كورسەتكەن ءجون.

سونىمەن قاتار ۇكىمەتكە جا­نار­مايدىڭ نارىقتىق باعاسىن 15 پايىزعا ارزانداتىپ، 165 تەڭ­گەگە دەيىن تومەندەتۋ مىندەتى جۇك­تەلدى.

وسىنى قامتاماسىز ەتۋ ءۇشىن 390 مىڭ توننا جانارماي جەڭىل­دىكپەن ساتىلاتىن بولادى.

ارزان جانارماي شارۋالارعا دەيىن جەتۋگە ءتيىس. ونى جەتكىزەتىن «وپەراتورلاردىڭ» جۇمىسى تولىعىمەن اشىق بولۋى كەرەك.  

ۇكىمەت پەن باس پروكۋراتۋرا وڭىر­لەردە ءتيىستى باقىلاۋ مەن قادا­عالاۋ جۇمىستارىن قامتا­ماسىز ەتۋگە ءتيىس.

كارانتين جاعدايىندا كۇردە­لە­نە تۇسەتىن بىرقاتار ماسەلە بار.

بۇل – كەپىلگە قويىلعان م ۇلىكتى حالىققا قىزمەت كورسەتۋ ور­تالىقتارىندا رەسىمدەۋ، نوتا­ريالدى كۋالاندىرۋ، قوسالقى بولشەكتەر ساتىپ-الۋ جانە ت.ب.

سوندىقتان ۇكىمەت پەن اكىم­دىكتەر كوكتەمگى ەگىس ناۋقانىن ەرەك­شە باقىلاۋعا الۋى كەرەك.

ازىق-ت ۇلىك قاۋىپسىزدىگىن قام­تا­ماسىز ەتۋ تۇرعىسىنان العاندا ءار كۇنىمىزدىڭ ماڭىزى زور. 

التىنشى. كارانتينگە بايلانىستى ەلوردا، الماتى جانە شىمكەنت قالالارى توڭىرەگىندە ەڭ­بەككە جارامدى، بىراق جۇ­مىس­سىز قالعان ازاماتتاردىڭ سانى ارتا ءتۇستى. بۇل، ەڭ الدىمەن، جاس­تارعا قاتىستى.

ۇكىمەت پەن اكىمدەر «جۇ­مىس­پەن قامتۋ جول كارتاسى» اياسىندا اتالعان وڭىرلەردە ناقتى جوبالاردى جۇزەگە اسىرۋدى دەرەۋ قولعا الۋى قاجەت. 

ازاماتتارىمىزدىڭ تابىس كو­زى بولۋعا ءتيىس. ولار كۇنىن كورە ال­ماي قۇرساۋدا قامالىپ وتىر­ماۋى كەرەك.

«جۇمىسپەن قامتۋ جول كارتاسى» اياسىندا جۇمىس ىستەۋگە نيەت بىلدىرگەن ازاماتتارعا ەڭ تومەنگى مولشەردەگى ەكى جالاقى نەمەسە 85 000 تەڭگە تولەنەدى. مۇنى ولار بىردەن جۇمىس ورنىنا كەلگەن كەزدە الادى.

بۇل تۇراقتى جالاقىسى ەمەس، سوعان قوسىمشا رەتىندە بەرىلەدى.

وسىعان وراي ارنايى ءموبيلدى ورىندار اشىلىپ، اكىمدىكتەر ءتۇسىندىرۋ جۇمىستارىن جۇرگىزەدى، كوروناۆيرۋسقا قاتىستى ەكسپرەسس-تەست الىپ، جۇمىسشىلاردى جۇ­مىل­دىرۋدى جانە جاڭا جۇمىس ورنىنا دەيىن جەتكىزۋدى ۇيىم­داس­تىرادى.

جۇمىس بەرۋشىلەر «جۇ­مىس­پەن قامتۋ جول كارتاسى» بويىن­شا ەڭ­بەك ەتەتىندەردىڭ بارىنە لايىق­تى جاعداي جاساپ، قورعانۋ قۇرال­دارىمەن قامتاماسىز ەتۋگە ءتيىس.    

جەتىنشى. مەن بۇعان دەيىن شاعىن جانە ورتا بيزنەستى قول­داۋ­عا ارنالعان شارالاردى جاريا­لادىم.

بۇل – سالىق جەڭىلدىكتەرى، قارىزدى وتەۋ مەرزىمىن شەگەرۋ جانە تاعى باسقا شارالار.

شاعىن جانە ورتا بيزنەس وكىلدەرىنىڭ ۇسىنىستارىنا كەلەتىن بولساق، ولاردىڭ كوبى قازىردىڭ وزىندە قولداۋ تاۋىپ، قۇزىرلى ور­گاندار تاراپىنان جۇزەگە اسىرىلىپ جاتىر.

سونىڭ ىشىندە مەملەكەتتىك قولداۋ شارالارىنا ساي كەلەتىن قىزمەت تۇرلەرىن كەڭەيتۋ، نەسيەنىڭ ۇستەمەاقىسىن تو­مەن­دەتۋ جانە بى­رىزدەندىرۋ، مەم­لەكەتتىك كەپىل­دىك­تەردىڭ كولەمىن ارتتىرۋ جۇمىستارى قامتىلعان.

قارجى نارىعىن رەتتەۋ اگەنت­تىگى شاعىن جانە ورتا بيزنەستىڭ نە­سيە­لەرىن وتەۋ مەرزىمىن ۇزارتۋ، تولەمدى قايتا قاراستىرۋ ماسەلە­لەرى بويىنشا بانكتەرمەن، باسقا دا قارجى ۇيىمدارىمەن جۇمىس جۇرگىزۋدە.

وسى ماسەلەگە جەكە توقتالىپ وت­كەن ءجون.

كوپتەگەن كاسىپكەر توتەنشە جاعداي كەزىندە نەسيەنىڭ پايىزدىق ۇستەمەاقىسىن ەسەپتەمەۋ ءۇشىن بانكتەرگە تاپسىرما بەرۋدى سۇراپ وتىر.

مۇنداي قادام بانكتەردى شى­عىنعا ۇشىراتاتىنىن ءتۇسىنۋى­مىز كەرەك. ولار دا ءبىزدىڭ ەكونو­مي­كامىزدىڭ اجىراماس بولىگى.

دەگەنمەن، مەن تاعى دا ەكىنشى دەڭگەيدەگى بانكتەردەن ازاماتتىق جاۋاپكەرشىلىك پەن تۇسىنىستىك تانىتۋدى سۇرايمىن.

بانكتەر قيىن جاعدايعا تاپ بول­عاندا مەملەكەت ولارعا ايتار­لىقتاي كومەك بەردى.

قازىر سىزدەر حالىققا جانە وتاندىق بيزنەسكە قولداۋ كورسە­تۋ­لەرىڭىز كەرەك.

قاجەت بولعان جاعدايدا مەم­لەكەت تاراپىنان قوسىمشا نۇس­قاۋ­لىق شارالار قولعا الىنادى.

جاعداي ودان ءارى ۋشىعاتىن بولسا، ۇكىمەت پەن قارجى سالا­سىنىڭ قۇزىرلى ورگاندارى بۇل ماسەلەنى شەشۋ ءۇشىن ءتيىستى شارالار قابىلدايدى.

كەلەسى ماسەلە. كاسىپ­كەر­لەرىمىز سالىقتىق جۇكتەمەنى ازايتۋعا قا­تىستى قوسىمشا قولداۋعا مۇقتاج. بۇل جۇمىس ورىندارىن ساقتاۋ جا­نە جالاقى تولەۋ ءۇشىن اسا ما­ڭىزدى.

سوندىقتان ەكونوميكانىڭ ەڭ كوپ زارداپ شەككەن سەك­تورلارىنداعى شاعىن جانە ورتا بيزنەس وكىلدەرى 6 ايعا (بيىل­عى 1 ساۋىردەن 1 قازانعا دەيىن) ەڭ­بەكاقى تولەۋ قورىنان ۇستالاتىن سالىقتان جانە باسقا دا تولەمدەر­دەن بوساتىلادى.

بۇل قوعامدىق تاماقتانۋ، ساۋ­دا، كولىك قىزمەتى، كونسۋل­تا­تسيا­لىق قىزمەت، ءىت، قوناقۇي، تۋريزم جانە باسقا دا سالالاردى قامتيدى.

ونىڭ ناقتى ءتىزىمىن توتەنشە جاعداي رەجىمىن قامتاماسىز ەتۋ جونىندەگى مەملەكەتتىك كوميسسيا بەكىتىپ، قاجەت بولعان جاعدايدا تولىقتىرىپ وتىرادى.

كاسىپكەرلەردىڭ ۇندەۋىندە داع­دارىس كەزەڭىندە سالىق تولە­مەۋ تۋرالى ءوتىنىش بولعانىن ايت­قان ەدىم.

وسى ورايدا مىناداي ماسەلەنى اتاپ وتكىم كەلەدى.

ءتيىستى جەدەل شەشىم قابىل­داندى. مەنىڭ تاپسىرمام بويىن­شا ۇكىمەت شاعىن جانە ورتا كاسىپ يەلەرىنىڭ بارلىق سالىق تولەم­دەرىن 3 ايعا توقتاتتى.

بۇل قازىرگى قالىپتاسقان جاع­داي­دا سالىقتان بوساتىلعانىمەن، ونىڭ كەيىن تولەنۋى كەرەكتىگىن بىلدىرەدى. 

سونىمەن قاتار ءبىز ەكونو­ميكالىق احۋالدى جان-جاقتى باعامداپ وتىرمىز. الداعى جاع­دايعا بايلانىستى تۇپكىلىكتى شەشىم قابىلدايمىز.

كەلەسى ماسەلە. ۇكىمەت ەلى­مىز ءۇشىن ماڭىزدى يمپورت تاۋار­لارىنا سالىناتىن باج سالىعىن الىپ تاستاۋ ماسەلەسىنە قاتىستى ەۋرازيا ەكونوميكالىق وداعىنداعى سەرىكتەستەرىمىزبەن جۇمىس جۇرگىزۋدە.

جەكە قورعانىس قۇرالدارى، وندىرىسكە قاجەتتى شيكىزات، ۆاكتسينالار مەن دياگنوستيكاعا ارنالعان قۇرال-جابدىقتار جونىندە ءتيىستى شەشىم قابىلداندى.

ءوز ەلىمىزدە جەتكىلىكتى ەمەس ازىق-ت ۇلىك تاۋارلارىنا سالىناتىن يمپورتتىق باج سالىعىن تومەندەتۋ بويىنشا جۇمىس جال­عاسۋدا.

ۇكىمەت وتاندىق بيزنەستىڭ سۇرانىستارىن ەسكەرىپ، اتالعان جۇمىستى جەدەلدەتكەنى ءجون.

سونداي-اق جەرگىلىكتى شاعىن جانە ورتا بيزنەستىڭ الەۋەتىن پايدالانۋ قاجەت. بۇل – وتە ماڭىزدى ماسەلە.

اكىمدىكتەر جانە ۇكىمەت («مەم­­­لەكەتتىك ازىق-ت ۇلىك كورپو­را­­تسياسى» ارقىلى) وتاندىق اگرو جانە قايتا وڭدەۋ كاسىپورىن­دارىنان كەمىندە 6 اي بۇرىن ءونىم­دى ساتىپ الۋدىڭ كەپىلدى جۇيەسىن جولعا قويۋعا ءتيىس. باس­قاشا ايتقاندا، «الدىن الا ساتىپ الۋ» نەمەسە «الىنعان ءونىم بويىن­شا ساتىپ الۋ» تەتىگىن ەنگىزۋى كەرەك.

كاسىپورىنداردىڭ ءوزارا ىقپال­داستىعىنىڭ ناقتى جولىن انىقتاۋ قاجەت، ياعني ەگىستىك با­سىنان دۇكەن سورەسىنە دەيىنگى تىز­بەكتى ايقىنداپ، ولاردى جەڭىل­دەتىلگەن نەسيەمەن قامتاماسىز ەتۋ قاجەت.

بۇل رەتتە بيزنەس وكىلدەرى ءون­دىرىس كولەمىن قامتاماسىز ەتۋ، تۇراقتى باعانى ۇستاپ تۇرۋ، جۇ­مىسپەن قامتۋ جانە وزىنە جۇك­تەلگەن باسقا دا مىندەتتەردى جا­ۋاپ­كەرشىلىكپەن ورىنداۋعا ءتيىس.

سەگىزىنشى. اتالعان شارالار توپتاماسىن جۇزەگە اسىرۋ ءۇشىن ۇكىمەتكە جانە ۇلتتىق بانككە بارلىق قاجەتتى قاراجات كوزدەرىن پايدالانۋدى تاپسىرامىن. سونىڭ ىشىندە مەملەكەتتىك الەۋمەتتىك ساقتاندىرۋ قورى، ۇلتتىق بانكتىڭ رەسۋرستارى مەن قۇرالدارى دا بار.

تۇڭعىش پرەزيدەنتىمىز – ەل­باسى قۇرعان ۇلتتىق قوردىڭ قار­جى­سىن ۇتىمدى پايدالانۋىمىز كەرەك.

بولىنگەن قاراجاتتى ناقتى ەكو­نوميكاعا جەدەل ءارى ءتيىستى دەڭ­گەيدە جەتكىزۋ ءۇشىن مەملە­كەت­تىك دامۋ ينستيتۋتتارى ارقى­لى قارجىلاندىرۋ مۇمكىندىگىن دە قاراستىرعان ءجون. ولاردىڭ قاتار­ىندا «بايتەرەك»، «اگرارلىق نەسيە كورپوراتسياسى» جانە باس­قا­لارى بار.

وسىنداي قولداۋ ءتۇرى وزگە دە جە­ڭىلدىكتەر سياقتى ەكسپورتتىق الەۋەتى بار تەز دامىپ كەلە جاتقان ورتا دەڭگەيدەگى كومپانيالارعا ار­نالۋى ءتيىس. مۇنداي كومپانيالار داعدارىستان كەيىنگى كەزەڭدەگى نەگىزگى «قوزعاۋشى كۇشكە» اينالا الادى.

تاعى ءبىر ماسەلە. داعدارىسقا قارسى شارالاردىڭ اۋقىمى مەن قارجىلىق رەسۋرستاردىڭ كولەمىنە بايلانىستى ءبولىنىپ جاتقان قاراجاتتىڭ ماقساتقا ساي ءارى ءتيىمدى جۇمسالۋىنىڭ، ازا­مات­تارعا جانە بيزنەسكە قولداۋ كورسە­تۋ كەزىندە اشىقتىق پەن ايقىن­دىق قاعيداتىن قامتاماسىز ەتۋدىڭ ماڭىزى ارتا تۇسەدى.

بۇل مىندەت ەسەپ كوميتەتىنە جۇكتەلەدى. بۇل جۇمىسقا ايماق­تىق رەۆيزيالىق كوميسسيالاردى، قوعامدىق كەڭەستەردى دە جۇ­مىل­دىرۋ قاجەت.

وسى رەتتە توتەنشە جاعدايدا قويىلاتىن ارنايى تالاپتار دا ەسكەرىلۋى كەرەك.

 

قادىرلى اعايىن!

كوروناۆيرۋس ىندەتىنە بايلانىستى بارشامىز كۇردەلى كەزەڭدى باستاپ وتكەرىپ وتىرمىز.

بىراق بۇل – ۋاقىتشا قيىندىق.

ءبىز مۇنى مىندەتتى تۇردە جەڭەمىز!

بۇكىل الەم كۇرەسۋدە. ءبىز دە بار كۇش-جىگەرىمىزدى سالامىز.

ءبىز، مەملەكەت جانە قوعام بولىپ بارشا ازاماتتارىمىزعا قولداۋ كورسەتەمىز، ەشكىمدى كومەكسىز قالدىرمايمىز.

مۇقتاج ادامدارعا قول ۇشىن بەرەمىز. 

بۇعان ەشقانداي كۇمان بولماۋى كەرەك.

قوعامداعى بەرەكە-بىرلىك كۇش-قۋاتىمىزدى ارتتىرادى.

وسى رەتتە ىندەتتى جۇقتىرعان ازاماتتارعا دا قولداۋ بىلدىرگىم كەلەدى. ەش مويىماڭىزدار! بۇل اۋرۋ قانشالىقتى قاۋىپتى بولعا­نىمەن، ودان ەمدەلىپ شىعۋعا بولادى. سىزدەرگە كومەكتەسۋ ءۇشىن بار­لىق جاعدايدى جاسايمىز. 

ەڭ باستىسى، شىدامدىلىق، توزىمدىلىك جانە جاۋاپكەرشىلىك تانىتايىق.

ءبىز – رۋحى اسقاق، بىرلىگى بەكەم، ەڭسەسى بيىك حالىقپىز.

سوندىقتان بۇل سىناقتان دا سۇرىنبەي ءوتىپ، قيىندىقتى بىرگە ەڭسەرەمىز دەپ سەنەمىن.

باستى تويلارىمىز ءالى الدا.

ءتورت قۇبىلامىز تۇگەل بولسىن، اعايىن!

ءبىز بىرگەمىز!

سوڭعى جاڭالىقتار

ۇقساس جاڭالىقتار