قوعام • 31 ناۋرىز، 2020

«شەۆرون»: قاۋىپتى ىندەتتى بىرلەسىپ جەڭەمىز

50 رەتكورسەتىلدى

«شەۆرون» كومپانياسى الماتىداعى ينفەكتسيالىق بالالار اۋرۋحاناسىنا جاساندى تىنىس الۋ اپپاراتىن تابىستادى.

كوروناۆيرۋس. ءدۇيىم دۇنيەگە تارالىپ ۇلگەرگەن ىندەت قازاقستاندى اينالىپ وتكەن جوق. سوڭعى دەرەككە سەنسەك، ەلىمىزدە وسى اۋرۋدى جۇقتىرعان ادام سانى 300-دەن اسىپ جىعىلدى. ماقالا جارىق كورگەنگە دەيىن بۇل كورسەتكىش ۇلعايا ءتۇسۋى عاجاپ ەمەس.

كوروناۆيرۋستىڭ ەل كولەمىندە تارالۋىنا توسقاۋىل قويۋ ءۇشىن پرەزيدەنت قاسىم-جومارت توقاەۆ توتەنشە جاعداي جاريالاعانى ءمالىم.

ء«بىز بىرگەمىز. بۇل قيىندىقتى ەل بولىپ، قوعام بولىپ ەڭسەرەمىز» دەگەن پرەزيدەنت ۇندەۋىنە العاشقىلاردىڭ ءبىرى بولىپ «شەۆرون» كومپانياسى ءۇن قاتتى.

كۇنى كەشە «شەۆروننىڭ» قارجىلاي قولداۋىمەن «ايالا» قايىرىمدىلىق قورىنىڭ ء«ومىر سىيلايىق» باعدارلاماسى اياسىندا الماتىداعى ينفەكتسيالىق بالالار اۋرۋحاناسىنا جاڭا 2 جاساندى تىنىس الۋ اپپاراتى تابىستالدى.

قاۋىپتى ۆيرۋسپەن كۇرەستە وسىناۋ قۇرىلعىنىڭ قانشالىقتى ماڭىزدى ەكەنىن ءازىر ۇلكەن دە، كىشى دە باعامداپ ۇلگەرگەن بولار.

بۇدان بۇرىن دەنساۋلىق ساقتاۋ ءمينيسترى ەلجان ءبىرتانوۆ ەلىمىزدەگى ينفەكتسيالىق اۋرۋحانالاردا 167 جاساندى تىنىس الۋ اپپاراتى بارىن ايتقان.  

مينيستر ءدال قازىر قازاقستاندا مۇنداي اپپاراتتارعا تاپشىلىق بارىن دا جاسىرماعان.

«ەل كولەمىندە جاساندى تىنىس الۋ اپپاراتىنا دەگەن سۇرانىس 927 دانانى قۇرايدى» دەگەن-ءتىن ە. ءبىرتانوۆ.

مينيستر بۇدان بولەك ەلىمىزدەگى كوروناۆيرۋس جۇقتىرعان ادام سانى 3،5 مىڭنان اسىپ جىعىلارىن بولجاعان.

سونىڭ الدىندا عانا اقپارات جانە قوعامدىق دامۋ ءمينيسترى داۋرەن اباەۆ ەلىمىزدەگى مۇنداي قۇرىلعىلاردىڭ كوپشىلىگى تەحنيكالىق تۇرعىدان ەسكىرگەنىن تىلگە تيەك ەتىپ، ولاردى جاڭارتۋ ءۇشىن شۆەيتساريادان قوسىمشا 230 قۇرىلعى ساتىپ الىناتىنىن مالىمدەگەن.

دەمەك ءدال قازىر قازاقستانداعى ينفەكتسيالىق اۋرۋحانالارعا مۇنداي قۇرىلعىلار اۋاداي قاجەت ەكەنى ايتپاسا دا تۇسىنىكتى. ولاردىڭ وسىناۋ الاساپىران اياقتالعاننان كەيىن دە سۇرانىستا بولارى داۋ تۋعىزبايدى.

بۇل جايتقا الماتىداعى كلينيكالىق ينفەكتسيالىق بالالار اۋرۋحاناسىنا جاساندى تىنىس الۋ اپپاراتتارىن تابىستار تۇستا «ايالى» قورىنىڭ باسشىسى ايدان سۇلەيمەنوۆا باسا توقتالدى.

ماماندىعى دارىگەر ايدان تولەۋتايقىزى اق حالاتتى جانداردىڭ جۇمىسى قانشالىقتى اۋىر ەكەنىن ءبىر كىسىدەي بىلەدى. ونىڭ ايتۋىنشا، «شەۆرون» قوردىڭ بالا دەنساۋلىعىن جاقسارتۋ مەن مەديتسينالىق قىزمەت ساپاسىن ارتتىرۋعا باعىتتالعان كوشەلى جوبالارىن كوپ جىلدان بەرى ۇزبەي قولداپ كەلەدى.

وسى ارادا قۇندىلىقتار تۋرالى ءسوز قوزعاعان ول «شەۆروننىڭ» اسا قاجەت شاقتا كومەك قولىن سوزا بىلەتىن ەلگەزەكتىگىن ەرەكشە اتاپ ءوتتى.

ء«يا، قۇندىلىقتار وسىلاي قالىپتاسادى. «شەۆرون» كومپانياسىنىڭ ينفەكتسيالىق بالالار اۋرۋحاناسىنا ءازىر اۋاداي قاجەت قۇرىلعىنى تابىستاۋى كومپانيانىڭ الەۋمەتتىك جاۋاپكەرشىلىكتى جەتە  تۇسىنەتىنىن كورسەتىپ وتىر.

كوروناۆيرۋس ينفەكتسياسىنا بايلانىستى قاتاڭ كارانتيندە وتىرعان قازاقستان ازاماتتارى، ونىڭ ىشىندە الماتى تۇرعىندارى اتىنان كومپانيا باسشىلىعىنا العىسىمدى ايتامىن.

بارشا الماتىلىق اتا-انالار ءۇشىن بۇلدىرشىندەرگە قاجەتتى اپپاراتتىڭ سىيعا تارتىلۋى ىزگى امال، بۇل ونداعان، جۇزدەگەن بالانىڭ ءومىرىن اراشالاپ قالۋدا ماڭىزدى ءرول اتقاراتىنى ايتپاسا دا بەلگىلى»، – دەدى ول.

...

ءسوزىنىڭ جانى بار. قازاقستان نارىعىنا 1993 جىلى كەلگەن «شەۆروننىڭ» قايىرىمدىلىق باعىتىنداعى باستامالارى بۇگىندەرى ءداستۇرلى جوبالارعا اينالىپ ۇلگەرگەن. قازاقستانعا كەلگەلى بەرى كومپانيا قوعامدىق جوبالارعا 500 ملن دوللار ينۆەستيتسيالاپتى.

ءيا، مۇنداي جوبالاردىڭ ناقتى سانىن اتاپ ايتۋ قيىن، ءبىر عانا الماتىدا «شەۆروننىڭ» قارجىلاي قولداۋىمەن جىلىنا 30-عا تارتا الەۋمەتتىك باستاما جۇزەگە اسادى ەكەن.

ال «ايالا» قورىنىڭ الەۋمەتتىك جوبالارىنا «شەۆرون» كومپانياسى وسىمەن 11-جىل قاتارىنان قولداۋ كورسەتىپ كەلەدى.

كومپانيانىڭ قارجىلاي قولداۋمەن بۇدان بۇرىن الماتىداعى پەرينا­تال­دىق ورتالىققا «گيپوتەرميا» جانە ەلەكتروەنتسەفالوگراف قۇرىلعىلارى ساتىپ الىنعان.

اتالعان اپپاراتتار تىم ەرتە تۋىلعان سابيلەردىڭ ءومىرىن امان ساقتاپ قالۋدا اسا ماڭىزدى. ايتا كەتەلىك وسىناۋ ورتالىقتا جىل سايىن 8 مىڭعا جۋىق ايەل بوسانادى. سابيلەردىڭ 15 پايىزى تىم ەرتە تۋىلعاندار.

البەتتە، بالا ءومىرى ەرتەڭىن ويلايتىن كەز كەلگەن مەملەكەت ءۇشىن باستى قۇندىلىق.

ەڭ باستىسى «شەۆروننىڭ» بۇل جولعى كومەگى دە دەر كەزىندە كورسەتىلدى. جالپى قۇنى 71 ملن تەڭگەنى قۇرايتىن جاپونيادا جاسالعان Humming Vue قۇرىلعىلارى الماتىداعى كلينيكالىق ينفەكتسيالىق بالالار اۋرۋحاناسىنىڭ دارىگەرلەرى ءۇشىن كوروناۆيرۋسقا قارسى كۇرەستە ۇلكەن كومەك بولارى انىق.

ارينە، بەتىن اۋلاق قىلسىن! ەلىمىزدە وسى ىندەتتى جۇقتىرعان سابيلەر سانى سيرەك. دەگەنمەن، ساقتىقتا قورلىق جوق.   

انىعى، وسىناۋ اپپاراتتار بۇگىن دە، ەرتەڭ دە، كەلەشەكتە دە كەرەككە جارايدى.

سوزىمىزگە دالەل: بىلتىر بۇل مەكەمە 100 مىڭعا تارتا ءبۇلدىرشىندى قابىلداسا، سولاردىڭ ءبىرازى ەم-دوم الۋ ءۇشىن ەمحاناعا جاتقان.

وتكەن جىلى اۋرۋحانانىڭ رەانيماتسيا بولىمشەسىنە سىرقاتى اسقىنعان 500-گە تارتا ءبۇلدىرشىن ءتۇسىپ، دارىگەرلەر ءاربىر 5-ءشى بالانى جاساندى تىنىس الۋ اپپاراتىنا قوسقان ەكەن...

جان ساقتاۋ بولىمىنە تۇسكەن بالالاردىڭ 60 پايىزىندا پنەۆمونيا انىقتالىپ، تىنىس الۋى اۋىرلاعان.

جاساندى تىنىس الۋ اپپاراتىن اۋرۋحاناعا تابىستاۋ ساتىندە «شەۆرون» كومپانياسى قوعاممەن بايلانىس ءبولىمىنىڭ ۇيلەستىرۋشىسى جانار قوشپانوۆا ءسوز الىپ، جان ساقتاۋ بولىمىندە ءاربىر مينۋت التىننان دا قىمبات ەكەنىن ەسكە سالدى. 

«قازاقستان ۇكىمەتى مەن ەلدەگى ءىرى بيزنەس وكىلدەرى كوروناۆيرۋستىڭ تارالۋىنا توسقاۋىل قويىپ، ينفەكتسيا جۇقتىرعان ازاماتتاردىڭ اياعىنان تۇرىپ كەتۋى ءۇشىن ءبىر جۇدىرىققا جۇمىلۋدا.

جاڭا، زاماناۋي جاساندى تىنىس الۋ اپپاراتتارى قازىرگىدەي الاساپىران شاقتا  عانا ەمەس، ادەپكى كۇندەرى دە بالا ءومىرىن امان ساقتاپ قالۋدا اسا ماڭىزدى.

«شەۆرون» كومپانياسىنىڭ اتىنان بارشا قازاقستاندىقتارعا قازىرگى وتكىنشى قيىندىققا قارسى تۇرارلىق قاجىر-قايرات پەن مىقتى دەنساۋلىق تىلەيمىن»، – دەدى كومپانيانىڭ وكىلى.

قۇرىلعىلاردىڭ ەرەكشەلىگى نەدە؟

«شەۆروننىڭ» قارجىلاي قولداۋىمەن الماتىداعى كلينيكالىق ينفەكتسيالىق بالالار اۋرۋحاناسىنا تابىستالعان اپپاراتتاردىڭ ەرەكشەلىگى نەدە؟  

جاپوننىڭ Humming Vue جاساندى تىنىس الۋ اپپاراتى مۇنداي تەحنولوگيانىڭ سوڭعى بۋىنىنا جاتادى ءارى قان قىسىمىن 13 ميكرون دەڭگەيىندە باقىلاۋدا ۇستايدى.

بۇل ءوز كەزەگىندە رەسپيراتورلىق تەراپيانىڭ كلينيكالىق تيىمدىلىگىن ارتتىرىپ، بالانىڭ اعزاسىنا زاقىم كەلتىرمەيدى.

ولاردى ستەريلدەۋ (زالالسىزداندىرۋ) ءادىسى قاراپايىم جانە اۋەل باستاعى كورسەتكىشتەرىن قايتا قالپىنا كەلتىرۋدى قاجەت ەتپەيدى. بۇل ءوز كەزەگىندە اپپاراتتى كەزەك كۇتىپ وتىرعان كەلەسى ناۋقاسقا ۋاقىت وزدىرماي قولدانۋعا مۇمكىندىك بەرەدى.

اتالعان قۇرىلعىنىڭ جۇمىس ولشەمىن وزگەرتۋ كەزىندە ءتۇرلى تىنىس الۋ كونتۋرىن اۋىستىرماي نەمەسە اجىراتپاي-اق ناۋقاستىڭ تىنىس الۋ جۇيەسىن ۆەنتيلياتسيالاي الادى.

بۇل ءبىر عانا كونتۋردا ورىندالىپ، ول ءوز كەزەگىندە ناۋقاستىڭ اۋىر گيپوكسياعا ۇشىراۋ تاۋەكەلىنىڭ الدىن الادى. 

جاپونيادا جاسالعان زاماناۋي اپپاراتتاردى تابىستاۋ ءراسىمىن «شەۆرون» كومپانياسى مەن «ايالا» قايىرىمدىلىق قورى بىرلەسىپ ۇيىمداستىردى.

 

سوڭعى جاڭالىقتار

ۇقساس جاڭالىقتار