ايماقتار • 30 ناۋرىز، 2020

تۇركىستان: قۇدالىق وتكىزگەندەر قاماۋعا الىندى

803 رەتكورسەتىلدى

تۇركىستان وبلىسىندا توتەنشە جاعدايعا قاراماستان قۇدالىق وتكىزىپ، قىز ۇزاتقان، تۋعان كۇنىن تويلاعان ازاماتتار 5 تاۋلىككە قامالعان. سونداي-اق توتەنشە جاعداي كەزىندە سانيتارلىق-ەپيدەميولوگيالىق ەرەجەلەردى ساقتاماعانى ءۇشىن اكىمشىلىك قۇقىقبۇزۋشىلىق تۋرالى كودەكستىڭ 476 «توتەنشە جاعداي رەجيمىن بۇزۋ» بابى بويىنشا 115 نىسانعا قۇقىقبۇزۋشىلىق تۋرالى حاتتاما راسىمدەلىپ، سوتقا جولداندى. سوت شەشىمىمەن  28  تۇلعاعا 10 اەك ەسەبىندە ايىپپۇل سالىنىپ، 16 تۇلعا قاماۋعا الىندى.

بۇل تۋرالى تۇركىستان وبلىسىنىڭ تاۋارلار مەن كورسەتىلەتىن قىزمەتتەردىڭ ساپاسىن، قاۋىپسىزدىگىن باقىلاۋ دەپارتامەتى باسشىسىنىڭ ورىنباسارى باقتىوراز ەلەمەسوۆ مالىمدەدى. سونىمەن قاتار، ول بىرقاتار نىسانداردىڭ ەسىك تۇتقالارىن داكە ماتالارمەن وراۋ -  سانيتارلىق تالاپتارعا ساي ەمەس ەكەنىن ايتتى. 

جالپى   COVID-19-بەن  كۇرەس  جانە ىندەتتىڭ الدىن الۋ وبلىس بويىنشا كەڭ اۋقىمدا جۇرگىزىلۋدە. بۇگىننەن باستاپ تۇركىستان وبلىسىنىڭ اۋماعىنا ازاماتتاردىڭ كىرىپ-شىعۋىن باقىلاپ - تەكسەرۋدەن وتكىزەتىن بلوك-پوستتار سانى 38-گە جەتكىزىلدى. باقىلاۋ بەكەتتەرىنەن تاۋلىگىنە 36 مىڭنان استام ادام تەكسەرۋدەن وتكىزىلۋدە. وبلىس اكىمى ومىرزاق شوكەەۆتىڭ تاپسىرماسىنا سايكەس، وڭىردەگى بلوك-پوستتاردا بەينەباقىلاۋ كامەرالارى ورناتىلعان.  كوروناۆيرۋس ىندەتىنىڭ تارالۋىنا جول بەرمەۋگە جانە جاعدايدى ساراپتاماعا الا، حالىققا شىنايى اقپارات دەرەگىن جاريالاپ وتىرۋعا باعىتتالعان، تاۋلىك بويى جۇمىس ىستەيتىن سيتۋاتسيالىق ورتالىقتا بارلىق قۇزىرلى باسقارمالاردىڭ ماماندارى جۇمىلدىرىلعان.

 

تۇركىستان وبلىسى

سوڭعى جاڭالىقتار

ۇقساس جاڭالىقتار