كونستيتۋتسيا كۇنى قارساڭىندا اتىراۋ وبلىسى سوتتارىنىڭ ۇجىمى ۇلكەن قۋانىشقا كەنەلدى. وبلىستىق سوت عيماراتىنىڭ الدىندا وتكەن سالتاناتتى جينالىستا وبلىس اكىمىنىڭ ءبىرىنشى ورىنباسارى عۇمار دۇيسەنباەۆ سوت ۇجىمىن كەلە جاتقان مەرەيلى مەرەكەمەن قۇتتىقتاپ 10 جەڭىل اۆتوماشينانىڭ كىلتىن تابىس ەتتى. بۇل تۋرالى وبلىستىق سوتتىڭ ءباسپاسوز حاتشىسى بورانباي عاليەۆ حابارلادى.
«جيىندا سونداي-اق 9 سۋديا مەن سوت قىزمەتكەرى وبلىس اكىمىنىڭ قۇرمەت گراموتاسىمەن ماراپاتتالدى», - دەلىنگەن حابارلامادا.
جيىندا اتىراۋ وبلىستىق سوتىنىڭ توراعاسى مۇحتار سماعۇلوۆ, قازاقستان سۋديالار وداعى اتىراۋ فيليالىنىڭ توراعاسى, اتىراۋ قالاسىنىڭ مامانداندىرىلعان اۋدانارالىق اكىمشىلىك سوتىنىڭ توراعاسى بازارعالي قادىرعاليەۆ وبلىس باسشىلىعىنا مەرەيلى مەرەكە تۇسىندا سوت ۇجىمىنا جاساعان تارتۋ-تارالعىسى ءۇشىن شىن جۇرەكتەن ريزاشىلىقتارىن ءبىلدىردى. بارشا ارىپتەستەرىن كونستيتۋتسيا كۇنىمەن قۇتتىقتاپ ەل ءۇمىتىن, حالىق سەنىمىن اقتاۋ جولىندا قارا قىلدى قاق جارىپ, ءادىل بيلىك ايتۋعا شاقىردى.
مۇرات ايتقوجا.
