يران يسلام رەسپۋبليكاسىندا ءبىرىنشى رەت ايەل ادام ەلشى بولۋى مۇمكىن. بۇل تۋرالى «لەنتا.رۋ» حابارلادى.
يران سىرتقى ىستەر مينيسترلىگى ءباسپاسوز حاتشىسىنىڭ مالىمەتىنە قاراعاندا, اتالمىش ۆەدومستۆونىڭ باسشىسى مۋحامماد جاۆاد زاريۆ الداعى اپتانىڭ ىشىندە جوعارى لاۋازىمدى ديپلوماتيالىق قىزمەتكە ايەل زاتىن تاعايىنداۋدى جوسپارلاپ وتىرعان كورىنەدى. ازىرگە ونىڭ كىم ەكەنى, قاي ەلگە ەلشى بولىپ بەكىتىلەتىنى بەلگىسىز. سونداي-اق, مينيسترلىكتىڭ ءباسپاسوز حاتشىسى قىزمەتىنە دە ايەل ادامنىڭ كانديداتۋراسى ۇسىنىلىپ, بۇل ماسەلە تالقىلانۋدا.
جالپى, ايەلدەردىڭ ساياسي ساحناعا شىعۋى, بيىك لاۋازىمعا يە بولۋى وتە سيرەك كەزدەسەتىن مەملەكەتتەردىڭ ءبىرى – يران. سوندىقتان, بۇل ەلدە ايەل ادامنىڭ ساياسي ساحناعا شىعۋى جاڭالىق رەتىندە قابىلدانادى.
1979 جىلدىڭ 11 اقپانىندا يسلام رەسپۋبليكاسى بولىپ جاريالانعالى بەرى بۇل ەلدەگى ساياسي قىزمەتكە تاعايىندالعان ايەلدەردىڭ قاتارى ساۋساقپەن سانارلىقتاي.
ماسەلەن, يراندى 1997-2005 جىلدار ارالىعىندا باسقارعان مۋحامماد حاتامي كەزىندە ماسۋمەح ەبتەكار دەگەن ايەل ۆيتسە-پرەزيدەنت بولدى. ول قورشاعان ورتا سالاسىنا قاتىستى ماسەلەلەرمەن شۇعىلدانعان. ال پرەزيدەنت رەتىندە ءوز وكىلەتتىگىن تاياۋدا توقتاتقان ماحمۋد احمادينەدجاد تۇسىندا (2005-2013 جج.) ءبىر عانا ايەل مينيستر بولدى. ول – 2009-2012 جىلدار ارالىعىندا يران دەنساۋلىق ساقتاۋ سالاسىن باسقارعان مارتسيح ۆاحيد داستجەردي. يراندا تۇڭعىش رەت مينيستر بولعان ايەل رەتىندە مارتسيح ۆاحيد داستجەرديدىڭ ەسىمى تاريحقا جازىلدى. ول 2012 جىلى ەلدە ءدارى-دارمەكتەردىڭ باعاسى ءوسىپ كەتكەنىنە بايلانىستى ماحمۋد احمادينەدجادپەن كەلىسە الماي, قىزمەتىنەن بوساتىلدى.
سول سياقتى, 2013 جىلدىڭ تامىزىندا يران پرەزيدەنتى رەتىندە انت قابىلداعان حاسان رۋحاني دا ايەلدەرگە «وڭ كوزبەن» قاراعانداي. ويتكەنى, جاڭا پرەزيدەنت قۇقىق سالاسى بويىنشا ءوزىنىڭ ۆيتسە-پرەزيدەنتى رەتىندە عىلىم دوكتورى ەحام امينزادەنى تاعايىندادى. بۇعان قوسا, تاعى ءبىر ۇزىن ەتەكتى ەل پرەزيدەنتىنىڭ ايەلدەر ءىسى جونىندەگى كەڭەسشىسى بولىپتى.
جولدىباي بازاروۆ.
