ايماقتار • 30 ناۋرىز، 2020

تۇركىستان:توتەنشە جاعداي رەجيمىن بۇزۋشىلار تىيىلماي تۇر

70 رەتكورسەتىلدى

دەمالىس كۇنى كەنتاۋ قالالىق پوليتسيا بولىمىنە قارناق اۋىلىندا كوروناۆيرۋس جۇقتىرۋ تۋرالى الەۋمەتتىك جەلىدە اقپارات تاراعانى جونىندە حابارلاما تۇسكەن. جەدەل-ىزدەستىرۋ شارالارىنىڭ بارىسىندا كەنتاۋلىق پوليتسەيلەر ءجاسوسپىرىمدى ۇستادى.

قارناق اۋىلىنداعى مەكتەپتىڭ 8-سىنىپ وقۋشىسى زاڭسىز ارەكەتىن تولىق مويىنداپ، ىستەگەن ىسىنە وكىنەتىنىن ايتقان. ءجاسوسپىرىم اتا-اناسىنىڭ قاداعالاۋىنا تاپسىرىلىپ، ولارمەن ءتيىستى پروفيلاكتيكالىق اڭگىمە جۇرگىزىلگەن. اتالعان جايت قر قك 274-بابى «كورىنەۋ جالعان اقپارات تاراتۋ» بويىنشا تىركەلگەن. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلۋدە. ەندىگى جەردە ءجاسوسپىرىمنىڭ اتا-اناسى اكىمشىلىك جاۋاپكەرشىلىككە تارتىلادى.

وكىنىشكە قاراي، توتەنشە جاعداي كەزىندە زاڭ بۇزعاندار تۇركىستان وبلىسىندا از ەمەس. وبلىستىق پوليتسيا دەپارتامەنتىنىڭ حابارلاۋىنشا، وتكەن اپتا سوڭىنا دەيىن زاڭ بۇزۋشىلىقتىڭ 12 دەرەگى انىقتالعان. تالاپقا باعىنباعاندار ءتيىستى جاۋاپقا تارتىلۋدا. مىسالى، سارىاعاش اۋدانىندا ەكى بىردەي ءدامحانا يەسىنە ايىپپۇل سالىنسا، ماقتاارالدا بەتاشار وتكىزگەن 3 بىردەي تۇرعىنعا شارا كورىلگەن. بۇلارعا ساقشىلار قر اكىمشىلىك قۇقىق بۇزۋشىلىق كودەكسىنىڭ 476-بابى «توتەنشە جاعداي رەجيمiن بۇزۋ» بويىنشا حاتتاما تولتىرىپ، قۇجاتتاردى قالالىق، اۋداندىق سوتتارعا جولداعان. ال قالا ورتالىعىندا توتەنشە جاعدايعا قاراماستان زاڭسىز جۇمىس ىستەپ تۇرعان 1 كومپيۋتەر كلۋبى، 5 كافە-رەستوران مەن 1 كىشى فۋتبول الاڭى انىقتالدى. سونداي-اق، كافەلەردىڭ بىرىنە قۇدالىق، تۋعان كۇن جاساعان ازاماتتار دا جاۋاپقا تارتىلدى. كەزەكتى رەيد بارىسىندا سوزاق اۋدانىنىڭ پوليتسەيلەرى، اۋىلداردىڭ بىرىندە بۋكمەكەرلىك كەڭسە ادام قابىلداپ، جۇمىس ىستەپ جاتقانىن انىقتاعان. پوليتسيا قىزمەتكەرلەرى توتەنشە جاعداي جاريالانىپ، تىيىم سالىنعاننان كەيىن، اتالعان بۋكمەكەرلىك كەڭسەگە بىرنەشە رەت ەسكەرتۋ جاساعان دا ەكەن. الايدا بۋكمەكەرلىك كەڭسە اكىمشىسى وعان قۇلاق اسپاستان ادام قابىلداپ وتىرعانى بەلگىلى بولدى. بۇل جايتكە قاتىستى اتالمىش تۇرعىنعا حاتتاما ءتۇزىلىپ، اۋداندىق سوتتىڭ قاۋلىسىمەن 5 تاۋلىككە اكىمشىلىك قاماققا الىنعان.

بۇگىندە جالپى 54 جايتتىڭ 25-ىنە شەشىم شىعارىلىپ، ولارعا 26 مىڭ 510 تەڭگەدەن ايىپپۇل سالىنعان. وعان قوسا 4 جايت ەرىكتىلەردىڭ انىقتاۋىمەن تىركەلگەن.

 

تۇركىستان وبلىسى

سوڭعى جاڭالىقتار

ۇقساس جاڭالىقتار