بۇرناعى كۇنى سينگاپۋردە لي كۋان يۋ اتىنداعى مەملەكەتتىك ساياسات مەكتەبىنىڭ رەكتورى, پروفەسسور كيشورە ماحبۋباني توراعالىعىمەن يادرولىق سىناقتارعا قارسى ارەكەت كۇنىنە وراي «يادروسىز الەمگە» تاقىرىبىندا پلەنارلىق پىكىرسايىس بولىپ ءوتتى, دەپ حابارلادى سىرتقى ىستەر مينيسترلىگىنىڭ ءباسپاسوز قىزمەتى.
پروفەسسور ك.ماحبۋباني جاھاندىق يادرولىق قارۋدى تاراتپاۋ ۇدەرىسىندەگى قازاقستان پرەزيدەنتى نۇرسۇلتان نازارباەۆتىڭ سەمەي پوليگونىن جابۋداعى ەرەكشە ءرولىن ايتا كەلىپ, ونىڭ يادرولىق ارسەنالدان ەرىكتى تۇردە باس تارتۋى جونىندەگى شەشىمى الەمدىك قاۋىمداستىق تاراپىنان قولداۋعا يە بولعانىن ەرەكشە اتاپ وتكەن.
قازاقستاننىڭ سينگاپۋردەگى ەلشىسى ەرلان باۋداربەك-قوجاتاەۆ قازاقستاننىڭ يادرولىق قاۋىپسىزدىك رەجىمىن نىعايتۋ ساياساتىن, سونىڭ ىشىندە اتوم جوباسى تۋرالى ايتىپ بەردى. قازاقستاندىق ديپلومات ەلشىلىكتىڭ يادرولىق سىناقتار قۇرباندارىن ەسكە الۋعا ارنالعان «Facebook» الەۋمەتتىك جەلىسى ارقىلى وتكىزگەن «الەمدى قارۋسىزداندىرۋ قولدان-قولعا» شاراسىن تامىزدىڭ باسىنان بەرى اۆستراليا, اقش, فرانتسيا, يتاليا, پاكستان, ءۇندىستان, سينگاپۋر سياقتى ەلدەردىڭ 9000-عا تارتا الەۋمەتتىك جەلىنى پايدالانۋشىلارى قولداعانىن جەتكىزدى.
