سۇلتان قاپار ۇلى دوسماعامبەتوۆتىڭ ەسىمى قاراعاندىلىقتارعا جاقسى تانىس. ول 1928 جىلى 1 قىركۇيەكتە سولتۇستىك قازاقستان (بۇرىنعى كوكشەتاۋ) وبلىسىنىڭ رۋزاەۆ اۋدانىنا قاراستى شۇكىركول اۋىلىندا دۇنيەگە كەلگەن.
سوعىستان كەيىنگى اۋىر جىلدارى جاسى 18-گە ەندى عانا تولعان جاس جىگىت مەكتەپ مۇعالىمى بولىپ قىزمەت ىستەي باستادى. مەكتەپتە ونىڭ پەداگوگيكالىق جانە ۇيىمداستىرۋشىلىق قابىلەتى ايقىن بايقالدى, ادامدارمەن سىيلاستىق, ءىلتيپاتتى قارىم-قاتىناس جاساي ءبىلۋ داعدىسى قالىپتاستى. بالالارعا ساباق بەرە ءجۇرىپ, ۋشينسكي اتىنداعى پەتروپاۆل پەداگوگيكا ينستيتۋتىنىڭ سىرتتاي وقىتۋ بولىمىنە ءتۇستى. سودان كەيىن الماتى مەملەكەتتىك زاڭ ينستيتۋتىن (امزي) ۇزدىك ءبىتىردى, تاشكەنت قالاسىنداعى ورتا ازيا مەملەكەتتىك ۋنيۆەرسيتەتى جانىنداعى ورتا ازيا جانە قازاقستان رەسپۋبليكالارى ءۇشىن 1952 جىلى كسرو مينيسترلەر كەڭەسى ۇيىمداستىرعان جوو ءۇشىن قوعامدىق عىلىمدار وقىتۋشىلارىن دايارلاۋدىڭ بىرجىلدىق كۋرسىن ءتامامدادى. ورتالىق كوميتەتتىڭ عىلىم جانە جوعارى وقۋ ورىندارى ءبولىمىنىڭ كۋرسىن اياقتاعان سوڭ ەكى جىل امزي-دە اعا وقىتۋشى بولىپ جۇمىس ىستەيدى, ساياسي ەكونوميكا جانە ەكونوميكا ىلىمدەرىنىڭ تاريحى بويىنشا دارىستەر وقىدى.
سۇلتان قاپار ۇلى دوسماعامبەتوۆتىڭ ەسىمى قاراعاندىلىقتارعا جاقسى تانىس. ول 1928 جىلى 1 قىركۇيەكتە سولتۇستىك قازاقستان (بۇرىنعى كوكشەتاۋ) وبلىسىنىڭ رۋزاەۆ اۋدانىنا قاراستى شۇكىركول اۋىلىندا دۇنيەگە كەلگەن.
سوعىستان كەيىنگى اۋىر جىلدارى جاسى 18-گە ەندى عانا تولعان جاس جىگىت مەكتەپ مۇعالىمى بولىپ قىزمەت ىستەي باستادى. مەكتەپتە ونىڭ پەداگوگيكالىق جانە ۇيىمداستىرۋشىلىق قابىلەتى ايقىن بايقالدى, ادامدارمەن سىيلاستىق, ءىلتيپاتتى قارىم-قاتىناس جاساي ءبىلۋ داعدىسى قالىپتاستى. بالالارعا ساباق بەرە ءجۇرىپ, ۋشينسكي اتىنداعى پەتروپاۆل پەداگوگيكا ينستيتۋتىنىڭ سىرتتاي وقىتۋ بولىمىنە ءتۇستى. سودان كەيىن الماتى مەملەكەتتىك زاڭ ينستيتۋتىن (امزي) ۇزدىك ءبىتىردى, تاشكەنت قالاسىنداعى ورتا ازيا مەملەكەتتىك ۋنيۆەرسيتەتى جانىنداعى ورتا ازيا جانە قازاقستان رەسپۋبليكالارى ءۇشىن 1952 جىلى كسرو مينيسترلەر كەڭەسى ۇيىمداستىرعان جوو ءۇشىن قوعامدىق عىلىمدار وقىتۋشىلارىن دايارلاۋدىڭ بىرجىلدىق كۋرسىن ءتامامدادى. ورتالىق كوميتەتتىڭ عىلىم جانە جوعارى وقۋ ورىندارى ءبولىمىنىڭ كۋرسىن اياقتاعان سوڭ ەكى جىل امزي-دە اعا وقىتۋشى بولىپ جۇمىس ىستەيدى, ساياسي ەكونوميكا جانە ەكونوميكا ىلىمدەرىنىڭ تاريحى بويىنشا دارىستەر وقىدى.
سۇلتان قاپار ۇلى 1955 جىلى شىلدە ايىندا قاراعاندىعا كوشىپ كەلدى, وك-ءتىڭ عىلىم جانە جوعارى وقۋ ورىندارى ءبولىمىنىڭ نۇسقاۋىمەن قاراعاندى تاۋ-كەن ينستيتۋتىنا ساياسي ەكونوميكا بويىنشا دارىستەر كۋرسىن وقۋ ءۇشىن دوتسەنت لاۋازىمىندا اعا وقىتۋشى بولىپ قىزمەت ىستەدى. ول تاۋ-كەن ءىسىنىڭ قىر-سىرىنا تەك وقۋلىقتاردان عانا ەمەس, سونىمەن قاتار, شاحتالاردان دا قانىق ەدى, ال كانديداتتىق ديسسەرتاتسياسىن قورعاعاننان كەيىن قاراعاندى پوليتەحنيكالىق ينستيتۋتىنىڭ قوعامدىق عىلىمدار كافەدراسىن باسقاردى. س.ق.دوسماعامبەتوۆتىڭ قاراعاندى كومىر باسسەينىن دامىتۋدىڭ ەكونوميكالىق پروبلەماسىن زەرتتەۋ ماسەلەلەرى بويىنشا ەكونوميكا عىلىمدارىنىڭ كانديداتى اتاعىن قورعاعان وسى وڭىردەگى تۇڭعىش عالىم ەكەنىن اتاپ ءوتۋ كەرەك.
ونىڭ ءدارىس وقۋ شەبەرلىگى جايلى قاراعاندى پوليتەحنيكالىق ينستيتۋتىنىڭ ستۋدەنتتەرى اراسىندا جاقسى پىكىر قالىپتاستى. سۇلتان قاپار ۇلى ەڭ كۇردەلى ۇعىمداردىڭ ءوزىن ۇعىنىقتى تۇردە جەتكىزە ءبىلدى. وسىنىڭ ءبارى ونىڭ تەرەڭ ءبىلىمىنىڭ ارقاسى ەدى.
ول وسى وقۋ ورنىندا جۇمىس ىستەگەن جىلدارى ينستيتۋتتىڭ پارتبيۋرو حاتشىسىنىڭ ورىنباسارى بولىپ سايلاندى جانە قاراعاندى قالاسىنداعى ىرگەتاسى ەندى عانا قالانعان تەحنيكالىق جوعارى وقۋ ورنىن دامىتۋدىڭ پراكتيكالىق ماسەلەلەرىن شەشۋگە بەلسەنە قاتىستى. اكادەميك, سوتسياليستىك ەڭبەك ەرى ءا.س. ساعىنوۆ سول كەزەڭ تۋرالى: «اسا قادىرلى, سۇلتان قاپار ۇلى! ءسىز وبلىس ەكونوميكاسىن, مادەنيەتىن, دەنساۋلىق ساقتاۋ ءىسىن, ءبىلىمىن دامىتۋ مەن كوتەرۋگە زور ۇلەس قوستىڭىز. قاراعاندى مەملەكەتتىك پوليتەحنيكالىق ينستيتۋتىندا, اسىرەسە, ونىڭ قالىپتاسۋ كەزەڭىندە ءسىزبەن بىرگە تابىستى ەڭبەك ەتكەنىم جايلى ەستەلىكتەر مەن ءۇشىن وتە ىستىق» – دەپ جازعان ەدى.
وسىلاي كوزگە تۇسكەن جاس جىگىت قىزمەت باسپالداقتارىمەن جوعارى ورلەدى. ءسويتىپ, ول 1963 جىلدىڭ قاڭتار ايىندا, 35 جاسىندا كافەدرا مەڭگەرۋشىسىنىڭ قىزمەتىنەن بىردەن قاراعاندى وبلىستىق پارتيا كوميتەتىنىڭ حاتشىسى بولىپ سايلاندى. ارادا ەكى جىل وتكەننەن كەيىن وبلىستىق پارتيا كوميتەتىنىڭ ەكىنشى حاتشىسى بولىپ تاعايىندالدى. ال 1969 جىلدىڭ جەلتوقسان ايىندا ەڭبەكشىلەر دەپۋتاتتارى وبلىستىق كەڭەسىنىڭ سەسسياسىندا قاراعاندى وبلىستىق اتقارۋ كوميتەتىنىڭ توراعاسى بولىپ سايلاندى جانە وسى قىزمەتتى 1982 جىلدىڭ مامىر ايىنا دەيىن اتقاردى.
سول جىلدارى قاراعاندى وبلىسىنى ڭ ەكونوميكالىق جانە الەۋمەتتىك دامۋى قۋاتتى سەرپىن الدى دەسەك, وعان س.ق.دوسماعامبەتوۆتىڭ قوسقان ۇلەسى سۇبەلى. ونىڭ ءبارىن قازىر جىپكە تىزگەندەي ايتا المايمىز. وعان كوپ ۋاقىت كەرەك جانە گازەتتىڭ بەتى دە كوتەرمەيدى. ءبىر عانا وقيعانى ەسكە الساق, 1981 جىلدىڭ مامىر ايىندا قاراعاندى قالاسىندا ەكونوميكالىق ءوزارا كومەك كەڭەسىنە (ەوك) مۇشە ەلدەردىڭ كومىر ونەركاسىبى سەكتسياسىنىڭ 57-ءماجىلىسى ءوتتى. فورۋمدى دايىنداۋ جانە وتكىزۋ جونىندەگى ۇيىمداستىرۋ كوميتەتىن س.ق.دوسماعامبەتوۆ باسقاردى. ءماجىلىس توراعاسى, پولشا تاۋ-كەن ءىسىنىڭ ءمينيسترى م. گرانوۆسكي اۋقىمدى ءىس-شارانى ۇيىمداستىرۋ مەن وتكىزۋ دەڭگەيىن جوعارى باعالادى.
سۇلتان قاپار ۇلىنىڭ ءوز قىزمەتىندە قاراعاندىداعى جوعارى ءبىلىمنىڭ دامۋىنا ەرەكشە كوڭىل اۋدارعانىن اتاپ ءوتۋ ءلازىم. ونىڭ بەلسەندى جانە جىگەرلى اتسالىسۋىمەن قاراعاندىدا جاڭادان 4 جوو, اتاپ ايتقاندا, كسرو ورتالىق وداعىنىڭ كووپەراتيۆ ينستيتۋتى, قاراعاندى كسرو ءىىم جوعارى مەكتەبى, قاراعاندى پەداگوگيكالىق دەنە تاربيەسى ينستيتۋتى جانە قاراعاندى مەملەكەتتىك ۋنيۆەرسيتەتى قۇرىلدى.
س.ق. دوسماعامبەتوۆتىڭ ءوڭىردىڭ مادەني دامۋىنا قوسقان ۇلەسى دە زور. ونىڭ بەلسەنە اتسالىسۋىمەن مۋزىكالىق كومەديا تەاترى, تسيرك, نەمىس دراما تەاترى (كەيىن الماتىعا كوشكەن), «وكتيابرسكي» سپورت سارايى, جەڭىل اتلەتيكا مانەجى سياقتى بەلگىلى نىساندار بوي تۇزەدى.
سول جىلدارى سۇلتان قاپار ۇلى نۇرسۇلتان ءابىش ۇلى نازارباەۆپەن يىق تىرەسە بىرگە ەڭبەك ەتتى. ول بولاشاق مەملەكەت باسشىسىمەن بىرگە قىزمەت اتقارعان جىلدارىن ساعىنىشپەن ەسكە الادى.
ەلىمىزدىڭ تۇڭعىش پرەزيدەنتى ن.ءا.نازارباەۆ «ستالنوي پروفيل كازاحستانا» كىتابىندا: «س.ق. دوسماعامبەتوۆ وبلىستىق اتقارۋ كوميتەتىنىڭ توراعاسى بولىپ وتىرعاندا مەتاللۋرگيالىق كومبينات ۇجىمىنىڭ جۇمىسىنا بارلىق قاجەتتى جاعدايدى جاساپ وتىردى» دەپ جىلى لەبىز بىلدىرەدى.
جيىرما جىل ءبىر كۇندەي زىرلاپ وتە شىقتى.
سۇلتان قاپار ۇلى ءوز ءومىربايانىنىڭ جاڭا كەزەڭىن باستادى: 1982 جىلى س.ق.دوسماعامبەتوۆ ككپ وق ۇسىنىسى بويىنشا قاراعاندى پەداگوگيكالىق دەنە تاربيەسى ينستيتۋتىنىڭ (قارپدتي) رەكتورى بولىپ تاعايىندالدى. بۇل قىزمەتتە وعان وبلىستىق كوميتەت حاتشىسى جانە قاراعاندى وبلىستىق اتقارۋ كوميتەتى توراعاسى قىزمەتىندە جيناعان باي تاجىريبەسى كوپ كومەكتەستى. قارپدتي قۇرىلعانىنا 12 جىل بولسا دا, كوپتەگەن پروبلەمالار شەشىلمەگەن كۇيىندە قالا بەرگەن: وقۋ جانە سپورت الاڭدارى مەن جابدىقتارى قاجەتتى كولەمدە بولمادى. وقىتۋشىلىق قۇرامنىڭ نەگىزگى بولىگىنىڭ عىلىمي-پەداگوگيكالىق بىلىكتىلىگى دە تومەن بولىپ شىقتى.
سوندىقتان, س.ق.دوسماعامبەتوۆ رەكتور بولعان ساتتەن باستاپ ءىستىڭ جاي-جاپسارىمەن تولىق تانىسىپ, دەنە تاربيەسى ينستيتۋتىن كوپ بەيىندى پەداگوگيكالىق ينستيتۋت ەتىپ قايتا قۇرۋعا باعىتتالعان دايىندىق جۇمىستارىنا كىرىسىپ كەتتى. پەداگوگيكالىق كادرلاردى دايارلاۋ جانە كورپۋستاردى سالۋ بويىنشا كۇردەلى ءارى اۋقىمدى جۇمىستار قولعا الىندى. 1982 جىلى كاربىشەۆ كوشەسىندە جاڭا وقۋ كورپۋسى سالىندى, ال 1983 جىلى ەكى وقۋ كورپۋسى مەن مۇقانوۆ كوشەسىندە ەكى جاتاقحانا ىسكە قوسىلدى. 1984 جىلى تاعى دا ەكى جاتاقحانا سالىندى. ينستيتۋتتىڭ پروفەسسورلىق-وقىتۋشىلار قۇرامى دا نىعايدى, ەكى جىل ىشىندە عىلىمي دارەجەلى وقىتۋشىلار سانى ەكى ەسەگە ارتتى. 1982 جىلدان باستاپ «پەداگوگيكا جانە پسيحولوگيا (مەكتەپكە دەيىنگى)» جانە «پەداگوگيكا جانە باستاۋىشتى وقىتۋ ادىستەمەسى» ماماندىقتارى بويىنشا مۇعالىمدەر دايارلاۋ باستالدى.
ينستيتۋتتى قايتا قۇرۋ بارىسىندا 5 وقۋ كورپۋسى, 4 جاتاقحانا, اسحانا, وقۋ-وندىرىستىك جانە كوركەمونەر-وندىرىستىك شەبەرحانالار, ستاديون, اتۋ ءتيرى, شاڭعى بازاسى, گاراجدار جانە باسقا دا شارۋاشىلىق نىسانداعى جايلار سالىنىپ, پايدالانۋعا بەرىلدى.
س.ق.دوسماعامبەتوۆتىڭ بەلسەندى قىزمەتىنىڭ ارقاسىندا ينستيتۋتتا جىل سايىن جاڭا ماماندىقتار اشىلىپ وتىردى, جاڭا فاكۋلتەتتەر مەن كافەدرالار قۇرىلدى, پروفەسسورلىق-وقىتۋشىلار قۇرامى بىلىكتى ماماندارمەن تولىقتى. 1988 جىلعا قاراي ينستيتۋتتى تولىقتاي قايتا قۇرۋ بويىنشا نەگىزگى جۇمىستار اياقتالدى. ەگەر 1981-1982 وقۋ جىلدارى ينستيتۋتتا 1295 ستۋدەنت وقىسا, 14 كافەدرا, 100 وقىتۋشى جۇمىس ىستەسە, 1988 جىلعا قاراي 9 ماماندىق بويىنشا 4800 ستۋدەنت ءبىلىم الدى, 26 كافەدرا, 385 وقىتۋشى, سونىڭ ىشىندە 2 دوكتور مەن 105 عىلىم كانديداتى قىزمەت ىستەدى. قاراعاندى پەداگوگيكالىق ينستيتۋتى س.ق. دوسماعامبەتوۆ باسشىلىق ەتكەن ۇجىمنىڭ ارقاسىندا ءى ساناتقا يە بولدى.
ينستيتۋت تۇلەكتەرى: ۆ.ابويموۆ, ا.ستەپانەنكو, ا.توپاەۆ, ە.ابۋباكيروۆ, ك.مۇڭايتپاسوۆ, ا.گاۆريلوۆ, ا.ساۆيتسكي, ا.ەگوروۆ, س.بوريسەنكو, ك.نۇرماعامبەتوۆ, ا.ۆاسيلەنكو, د.گااگ, ي.ۋلەۆا جانە ت.ب. قازاقستان سپورتىنىڭ ماقتانىشتارى, وليمپيادا جۇلدەگەرلەرى, الەم چەمپيوناتتارىنىڭ جانە باسقا دا ايتۋلى جارىستاردىڭ جەڭىمپازدارى جانە جۇلدەگەرلەرى بولدى.
ينستيتۋت وقىتۋشىلارى مەن قىزمەتكەرلەرى ەڭ كۇردەلى ۇيىمداستىرۋ ماسەلەلەرىن شەشۋدە ارقاشان رەكتورعا ارقا سۇيەدى. سۇلتان قاپار ۇلى وقىتۋشىلاردىڭ ىزدەنىستەرىن, عىلىمي ءىسساپارلارىن, ولاردىڭ حالىقارالىق كونفەرەنتسيالارعا, الماتى, ماسكەۋ جانە سانكت-پەتەربۋرگتىڭ ەڭ ۇزدىك جوو-لارىندا تاعىلىمدامادان ءوتۋىن, عىلىمي ماقالالار مەن مونوگرافيالاردى جاريالاۋىن قاداعالاپ, قولداپ وتىردى.
قيىنشىلىققا تولى توقسانىنشى جىلدارى رەسپۋبليكانىڭ كوپتەگەن جوو-لارى بىرىگىپ جاتقان كەزدە قاراعاندى پەداگوگيكالىق ينستيتۋتىن ە.ا. بوكەتوۆ اتىنداعى قارمۋ-عا قوستى. وسىدان سوڭ سۇلتان قاپار ۇلىنا ەش الاڭسىز قۇرمەتتى دەمالىسقا شىعا بەرۋىنە بولار ەدى. ول ساليقالى جاسقا كەلسە دە, سول جەتكەن جەرىندە توقتاپ قالاتىن ادامدار ساناتىنان ەمەس.
1997 جىلى س. دوسماعامبەتوۆ جەزقازعان جانە قاراعاندى وبلىستارى بىرىككەن كەزدە بالاما نەگىزدە قاراعاندى وبلىستىق ءماسليحاتىنىڭ حاتشىسى بولىپ سايلاندى جانە وسى لاۋازىمدا 1999 جىلدىڭ اياعىنا دەيىن جۇمىس ىستەدى. وسى ارادا دەپۋتاتتىق جانە قوعامدىق قىزمەت – س.ق دوسماعامبەتوۆ ءومىربايانىنىڭ اجىراماس بولىگى ەكەنىن ايتا كەتۋ ءجون.
ول بىرنەشە مارتە قازاق كسر جوعارعى كەڭەسىنىڭ دەپۋتاتى بولىپ سايلاندى. قازاقستان كومپارتياسىنىڭ XII, XII, XIV, XV سەزدەرىنىڭ, كوكپ XXIV, XXV, XXVI سەزدەرىنىڭ دەلەگاتى بولدى.
سۇلتان قاپار ۇلى جاڭا قازاقستاننىڭ قالىپتاسۋىنا بەلسەنە قاتىسۋدا. ول جوعارى وقۋ ورىندارىندا ۇلكەن قوعامدىق جانە عىلىمي-پەداگوگيكالىق جۇمىستار اتقارۋدا, قازاقستان رەسپۋبليكاسى تۇڭعىش پرەزيدەنتى مۇراجايىنىڭ عىلىمي كەڭەسشىسى, قازاقستان حالقى اسسامبلەياسىنىڭ مۇشەسى, «نۇر وتان» حدپ قف جانىنداعى سىبايلاس جەمقورلىقپەن كۇرەس جونىندەگى كەڭەستىڭ مۇشەسى بولىپ تابىلادى.
1997 جىلى وعان حالىققا ءبىلىم بەرۋ ءىسىن دامىتۋعا, جاس ۇرپاقتى تاربيەلەۋگە قوسقان زور ۇلەسى جانە قاراعاندى قالاسىنىڭ قۇرىلىسىنا, ونىڭ ەكونوميكاسى مەن مادەنيەتىنىڭ دامۋىنا اتسالىسقانى ءۇشىن «قاراعاندى قالاسىنىڭ قۇرمەتتى ازاماتى» دەگەن جوعارى اتاق بەرىلدى.
س.ق.دوسماعامبەتوۆ – قر حالىققا ءبىلىم بەرۋ ءىسىنىڭ قۇرمەتتى قىزمەتكەرى, قۇرمەت وردەنىنىڭ, لەنين وردەنىنىڭ, ءتورت ەڭبەك قىزىل تۋ, قۇرمەت بەلگىسى وردەندەرىنىڭ, بارلىق ءۇش دارەجەدەگى كەنشى داڭقى بەلگىسىنىڭ, كسرو حشجك-ءنىڭ التى التىن مەدالىنىڭ يەگەرى.
2013 جىلى قاراعاندى مەملەكەتتىك تەحنيكالىق ۋنيۆەرسيتەتىندە قارمتۋ-دىڭ نەگىزىن سالۋشىلاردىڭ ءبىرى رەتىندە جانە وسى وقۋ ورنىنىڭ دامۋىنا قوسقان زور ۇلەسى ءۇشىن قۇرمەتتى پروفەسسور س.دوسماعامبەتوۆ اتىنداعى اكادەميالىق ءدارىس اۋديتورياسى اشىلدى. مۇنداي شەشىمدى قارمتۋ عىلىمي كەڭەسى قابىلدادى.
– بۇل وقيعا ۋنيۆەرسيتەت ءۇشىن ماڭىزدى, – دەدى ءبىلىم بەرۋ ءىسىنىڭ ارداگەرى, وبلىستىق پارتيا كوميتەتىنىڭ عىلىم جانە جوعارى وقۋ ورنى ءبولىمىنىڭ مەڭگەرۋشىسى بولىپ كوپ جىلدار جۇمىس ىستەگەن گ.ج.بەكتەمباەۆا. – پروفەسسور دوسماعامبەتوۆ وسى وقۋ ورنىنىڭ دامۋىنا ۇلكەن ەڭبەك ءسىڭىردى. قانداي قىزمەتتە ىستەمەسىن, ەڭ الدىمەن, ءبىلىم بەرۋ پروبلەمالارىمەن اينالىساتىن جانە قارمتۋ-مەن, ءوڭىردىڭ باسقا دا جەتەكشى جوو-ىمەن بايلانىسىن ەشقاشان ۇزگەن ەمەس.
سۇلتان قاپار ۇلى تۋرالى اڭگىمەلەگەندە ونىڭ وتباسى – جۇبايى, ۇلى, قىزى, نەمەرەلەرى تۋرالى دا ايتپاي كەتۋگە بولمايدى. جۇبايى روزا بالباتىرقىزىنىڭ قامقورلىعى مەن ءاردايىم قولداپ وتىرۋى – سۇلتان قاپار ۇلىن جاڭا بەلەستەرگە جەتەلەپ وتىردى دەسەك قاتەلەسپەيمىز. روزا بالباتىرقىزى – بىلىكتى زاڭگەر, تاماشا عالىم, ۇلاعاتتى ۇستاز عانا ەمەس, جوعارى مادەنيەتتى ادامدارمەن تەز ءتىل تابىسا بىلەتىن ايرىقشا ەلگەزەك جان.
دوسماعامبەتوۆتەر وتباسىنىڭ لايىقتى ءىزباسارلارى – بالالارى ەرلان مەن راۋشان. راۋشان سۇلتانقىزى – مەديتسينا عىلىمدارىنىڭ دوكتورى, پروفەسسور, قاراعاندى مەملەكەتتىك مەديتسينالىق ۋنيۆەرسيتەتىنىڭ رەكتورى, وبلىستىق ءماسليحاتتىڭ دەپۋتاتى, ەرلان سۇلتان ۇلى – ەكونوميكا عىلىمدارىنىڭ كانديداتى, «ەۆرازەس ىسكەرلىك كەڭەسى» اسسوتسياتسياسى وكىلدىگىنىڭ باسشىسى, قوعام قايراتكەرى – قاراعاندى قالاسىنداعى ۋكراينانىڭ قۇرمەتتى ەلشىسى.
ءبىزدىڭ ساپەكەڭ تىنىمسىز ەڭبەگىمەن تالاي اسۋلاردى باعىندىرعان وسىنداي ابىرويلى جان! ونىڭ ءجۇرىپ وتكەن جولىنا زەر سالساڭىز, ىزگىلىك ىزدەرىن كورەسىز.
ارىستان عازاليەۆ,
قارمتۋ رەكتورى, قر ۇعا اكادەميگى,
مەملەكەتتىك سىيلىقتىڭ لاۋرەاتى.
قاراعاندى.
