بيىل مۇنايلى ماڭعىستاۋ توي قۇشاعىندا. ءوز الدىنا وبلىس بولىپ شاڭىراق تىكتەگەنىنە 40 جىل تولسا, وبلىس ورتالىعى, كوك تەڭىز جاعاسىنداعى تارانعان اققۋداي اسەم قالا – اقتاۋ جارتى عاسىرلىق عۇمىرىنىڭ تابالدىرىعىن اتتادى.
بيىل مۇنايلى ماڭعىستاۋ توي قۇشاعىندا. ءوز الدىنا وبلىس بولىپ شاڭىراق تىكتەگەنىنە 40 جىل تولسا, وبلىس ورتالىعى, كوك تەڭىز جاعاسىنداعى تارانعان اققۋداي اسەم قالا – اقتاۋ جارتى عاسىرلىق عۇمىرىنىڭ تابالدىرىعىن اتتادى.
بۇلاردان باسقا وبلىستاعى قاراقيا, بەينەۋ اۋداندارى – 40, ماڭعىستاۋ اۋدانى 85 جىلدىق مەرەيلى جاستا. قازىر وڭىردە وبلىس پەن وبلىس ورتالىعىنىڭ تۋعان كۇنى قىزۋ اتالىپ وتۋدە. قىركۇيەك ايىنىڭ 19-21-ءى ارالىعىنا بەلگىلەنگەن ايتۋلى كۇنگە ءبىر اي قالعاندا توي دابىلى قاعىلدى دەۋگە بولادى. مادەني شارالار تىزبەگى ۇزىلمەي, سان-ساپات سالتانات جالعاسىن تابۋدا. ولاردىڭ اراسىندا ءتۇرلى نىسانداردىڭ اشىلۋى, قايىرىمدىلىق اكتسيالارى, تانىمدىق-ادەبي, مادەني كەشتەر مەن شوۋ-باعدارلامالار, سپورتتىق ويىندار مەن سايىس-باسەكەلەر بار. تەڭىز جاعاسى ءسان-سالتانات پەن ءان-جىردىڭ مەكەنىنە اينالعالى قاشان؟! تەڭىزدىڭ سالقىن لەبىندە كەشكى سەرۋەنگە شىققان تۇرعىندار تەگىن كونتسەرتتەردىڭ كوڭىلدى كورەرمەنى بولۋ مۇمكىندىگىنە يە. بۇعان دەيىن مۇنايلى, تۇپقاراعان اۋداندارىنىڭ ونەرپازدارى تويلى اقتاۋ قالاسىنا ارنايى كەلىپ ءان-جىردان شاشۋ شاشسا, الداعى كۇندەرى بۇل ءداستۇردى قاراقيا اۋدانى جالعاستىرادى دەپ كۇتىلۋدە. شارا بارىسىندا ءبىز كۋا بولعان كەش – وبلىستىق مادەنيەت باسقارماسى ۇيىمداستىرعان «التىن جۇرەك دومبىرا» اتتى جىرشىلار سايىسى بولدى. وسىلاي دەپ الدىمەن اۋزىمەن قۇس تىستەگەن جىرشىلار مەكەنىنىڭ بۇگىنگى بۋىنىن ءوزارا سايىستىرعان ۇيىمداستىرۋشىلار, كەلەسى كۇنى «ماڭعىستاۋىم – ماقتانىم» دەگەن تاقىرىپتا ءداستۇرلى ءانشى-تەرمەشىلەر, ءۇشىنشى كۇنى «عاسىرلار ءۇنى» اتتى كۇي كەشىن وتكىزدى. ۇشەۋى دە حالىقتىڭ ءتول ونەرى, قازاقى رۋحى جانشىلماعاننىڭ اڭساپ تىڭدار جانسۋسارى. جىرشىلار نۇرىم شىرشىعۇل ۇلى, ابىل تىلەۋ ۇلى, قاشاعان كۇرجىمان ۇلى, اقتان كەرەي ۇلى, ساتتىعۇل جانعابىل ۇلى, تۇمەن بالتاباس ۇلى, نۇرپەيىس بايعانين, ەلباي قوسىمباي ۇلى سىندى ءسوز زەرگەرلەرىنەن قالعان مارجان جىر مەن مانەرلى ماقامدى دۇبىرلەتسە, تەرمەشىلەر ولاردىڭ اقىل-ناقىلعا تولى وسيەت ۇندەرىن جەتكىزدى. ءداستۇرلى انشىلەر «ادايدىڭ جەتى قايقىسى» دەگەن اتپەن تاريحتا قالعان ماڭعىستاۋلىق انشىلەردىڭ, سونداي-اق مۇحيت پەن عاريفوللانىڭ اندەرىن شىرقادى.
«بۇل – باستاماسى. مەرەيتويلار ماعىنالى شارالارمەن تولىعا تۇسەتىن بولادى», دەيدى وبلىستىق مادەنيەت باسقارماسى باستىعىنىڭ ورىنباسارى پ.سارمۇرزينا.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ.
