بارلىق قاۋىپسىزدىك شارالارى قامتاماسىز ەتىلىپ, 1777 ازامات وزبەكستان رەسپۋبليكاسىنا وتكىزىلدى. تاعى جۇزدەن استامى وتاندارىنا ورالۋ كەزەگىن كۇتىپ وتىر. وبلىس اكىمدىگىندە وتكەن اپتالىق لەزدەمەدە اتقارىلىپ جاتقان جۇمىستاردى بايانداعان وبلىستىق پد باسشىسى, پوليتسيا گەنەرال-مايورى قايرات دالبەكوۆ نۇر- سۇلتان قالاسىنان شىققان جولاۋشىلار اۆتوبۋسىنا قاتىستى مالىمەتتەردى دە جەتكىزدى. بۇل ورايدا وبلىس اكىمى ومىرزاق شوكەەۆ ەلىمىزدەگى توتەنشە جاعداي رەجيمىنىڭ ساقتالۋىن قامتاماسىز ەتۋدە ۇزدىكسىز قىزمەت ەتەتىن ىشكى ىستەر ورگاندارى قىزمەتكەرلەرىنىڭ جۇمىسىنا وڭ باعا بەردى. نۇر-سۇلتان قالاسىنان شىققان جولاۋشىلار اۆتوبۋسىنداعى كوروناۆيرۋس جۇقتىرعان ازاماتپەن بىرگە كەلگەن 50 ادامدى شۇعىل تۇردە انىقتاپ, قاۋىپتىڭ الدىن العان پوليتسيا سالاسى وكىلدەرىنىڭ قىراعىلىعىن اتاپ ءوتتى. جۇيەلى جۇمىستىڭ ناتيجەسىندە بارلىق جولاۋشىلار وقشاۋلانۋعا الىنىپ, ءتيىستى مەديتسينالىق تەكسەرۋدەن وتۋدە. كارانتينگە جاتقىزىلعان اۆتوبۋس جۇرگىزۋشىسى جولاۋشىلاردى تاسىمالداۋ قاعيدالارىن بۇزعانى ءۇشىن اكىمشىلىك جاۋاپقا تارتىلادى.
سونداي-اق ومىرزاق شوكەەۆ بارلىق باقىلاۋ بەكەتتەرىندە «سەرگەك» كامەرالارىن ورناتۋدى مىندەتتەدى.
تۇركىستان وبلىسى
