ماسكەۋ اقش قورعانىس ءمينيسترى چ.حەيگلدىڭ پرەزيدەنت ب.وبامانىڭ تاپسىرماسى بويىنشا سيرياعا قارسى كەز كەلگەن ۋاقىتتا كۇشتىك اكتسيانى جۇزەگە اسىرۋعا امەريكالىق قارۋلى كۇشتەردىڭ دايىندىققا كەلتىرىلۋىنە ايتارلىقتاي نازار اۋدارىپ وتىر. رەسەي سىرتقى ىستەر مينيسترلىگىنىڭ رەسمي وكىلى ا.لۋكاشەۆيچتىڭ مالىمدەمەسىندە وسىلاي اتاپ كورسەتىلگەن.
رەسەي بىرجاقتى شەشىمگە قارسى
ماسكەۋ اقش قورعانىس ءمينيسترى چ.حەيگلدىڭ پرەزيدەنت ب.وبامانىڭ تاپسىرماسى بويىنشا سيرياعا قارسى كەز كەلگەن ۋاقىتتا كۇشتىك اكتسيانى جۇزەگە اسىرۋعا امەريكالىق قارۋلى كۇشتەردىڭ دايىندىققا كەلتىرىلۋىنە ايتارلىقتاي نازار اۋدارىپ وتىر. رەسەي سىرتقى ىستەر مينيسترلىگىنىڭ رەسمي وكىلى ا.لۋكاشەۆيچتىڭ مالىمدەمەسىندە وسىلاي اتاپ كورسەتىلگەن.
وسىنىڭ ءبارى يراكتا جاپپاي قىرىپ-جوياتىن قارۋ بار دەگەن جەلەۋمەن اقش-تىڭ وسىدان ون جىل بۇرىن بۇۇ-نى اينالىپ ءوتىپ, اۆانتيۋراعا بارعان وقيعالارىن ەسكە تۇسىرۋگە ماجبۇرلەيدى, دەلىنگەن اتالعان مالىمدەمەدە. كەز كەلگەن بۇۇ-دان تىس بىرجاقتى كۇش كورسەتۋ ءىس-ارەكەتتەرى سيرياداعى داۋ-جانجالدى ساياسي-ديپلوماتيالىق جولمەن شەشۋدى ىزدەستىرىپ جاتقان حالىقارالىق قوعامداستىقتىڭ كۇش-جىگەرىنە نۇقسان كەلتىرەدى, دەپ ەسەپتەيدى رەسەي سىرتقى ىستەر مينيسترلىگى.
تاراقاندار فەرمادان قاشىپ كەتتى
بۇل وقيعا قىتايدىڭ شىعىسىنداعى تسزيانسۋ پروۆينتسياسىنداعى دافەن قالاسىندا ورىن العان. وسىندا شىعىس مەديتسيناسى ءۇشىن قولدانۋ ماقساتىندا ءوسىرىلىپ جاتقان تاراقاندار فەرمادان قاشىپ كەتكەن.
1,5 ميلليونعا جۋىق جاندىك پارنيكتە قاماۋدا تۇرادى ەكەن. بەلگىسىز ءبىر قىلمىسكەر ونىڭ پلاستيك قابىرعالارىن سىندىرىپ تاستاعان. سونىڭ سالدارىنان ەم ءۇشىن قولدانىلاتىن تاراقاندار جان-جاققا تاراپ كەتكەن. وسىنداي ەرەكشە فەرمانىڭ قوجايىنى ۆان پەنشەن وسىدان بىرنەشە اي بۇرىن امەريكالىق تاراقاننىڭ 102 كگ. جۇمىرتقاسىن ساتىپ العان. ءسويتىپ, جاندىكتەر ءوسىپ شىققاننان كەيىن ولاردىڭ ءار كيلوگرامىن 1000 يۋاننان ساتپاق بولعان ەكەن. ايتا كەتۋ كەرەك, ءداستۇرلى قىتاي مەديتسيناسىندا وسى جاندىكتەردەن الىنعان ەكستراكت ونكولوگيالىق اۋرۋلاردى ەمدەۋگە, يممۋنيتەتتى كۇشەيتۋگە پايدالانىلادى.
بريتانيا فلوتى سوعىسقا دايىن
ۇلىبريتانيا وكىمەتى اقش-پەن بىرگە سيرياعا قارسى اسكەري ءىس-قيمىلدارعا قاتىسۋعا نيەت ءبىلدىرىپ وتىر. كورولدىك اسكەري-تەڭىز فلوتى بىرلەسكەن وپەراتسيالارعا دايىندىقتى باستاپ تا كەتتى.
The Telegraph باسىلىمىنىڭ ۇكىمەتكە سىلتەمە جاساي وتىرىپ جازۋىنا قاراعاندا, بريتانيا پرەمەر-ءمينيسترى دەۆيد كەمەرون مەن اقش وكىمەتى, سونىڭ ىشىندە پرەزيدەنت باراك وبامامەن اراداعى كەلىسسوزدەر ودان ءارى جالعاسۋدا. بىرلەسكەن وپەراتسيانى جۇزەگە اسىرۋدىڭ كەيبىر شارتتارى كەلىسىلگەن جاعدايدا اسكەري ءىس-قيمىلدار الداعى اپتانىڭ ىشىندە باستالماق.
تەررورلىق اكتىلەر ازايماي تۇر
يراكتا جەكسەنبى كۇنى بولعان تەررورلىق شابۋىلدار سالدارىنان 47 ادام قۇربان بولىپ, ونداعان ادام ءتۇرلى دەنە جاراقاتتارىن العان. ەڭ ءىرى شابۋىل ەل استاناسىنىڭ سولتۇستىگىندەگى بااكۋبا قالاسىنىڭ ورتالىعىندا ورىن العان.
سول سياقتى, باعدادتىڭ بىرنەشە اۋداندارى مەن جاقىن جاتقان پروۆينتسيالاردا دا دۇركىن-دۇركىن جارىلىستىڭ بولعانى بەلگىلى بولىپ وتىر. جارىلعىش قۇرىلعىنىڭ بىرەۋى حالىق كوپ جينالاتىن ءدامحانانىڭ الدىندا تۇرعان اۆتوموبيلدە ىسكە قوسىلسا, ەكىنشى جارىلعىش زات ۇيلەنۋ تويىن تويلاپ جاتقان جاستاردىڭ جۇرەتىن جولىنا قويىلعان. ازىرگە بۇل جارىلىستار ءۇشىن جاۋاپكەرشىلىكتى يراكتاعى راديكالدى توپتاردىڭ بىردە-ءبىرى ءوز مويىندارىنا العان جوق.
مۇباراك سوت وتىرىسىنا قاتىستى
ەگيپەتتىڭ ەكس-پرەزيدەنتى حوسني مۇباراك بۇرىنعى مەملەكەت باسشىسىنىڭ ەرەۋىلشىلەردى ولتىرۋگە قاتىستىلىعى جونىندەگى ايىپتاۋلاردى قايتا قاراۋعا ارنالعان سوت وتىرىسىنا قاتىستى.
85 جاستاعى ح.مۇباراك سوتقا مااديدەگى اسكەري گوسپيتالدان تىكۇشاقپەن جەتكىزىلگەن. سوت كاير پوليتسيا اكادەمياسىنىڭ ايرىقشا كۇزەتتەگى عيماراتىندا وتۋدە. سوتتا قورعاۋشى جاقتىڭ كۋالەرى رەتىندە ەكس-پرەزيدەنتتىڭ ەكى ۇلى, سول سياقتى, بۇرىنعى ىشكى ىستەر ءمينيسترى حابيب-ءال-ادلي جانە قاۋىپسىزدىك قىزمەتىنىڭ وفيتسەرلەرى ءسوز سويلەيتىن بولادى. سوت وتىرىسى وتە قىسقا بولدى. ءسويتىپ, ءىستى قاراۋ ۇستىمىزدەگى جىلدىڭ 14 قىركۇيەگىنە قالدىرىلدى.
مەكسيكاداعى تەمىر جول اپاتى
مەكسيكانىڭ وڭتۇستىك-شىعىسىنداعى تاباسكو شتاتىندا بولعان تەمىر جول اپاتى سالدارىنان كەم دەگەندە 5 ادام قازا تاۋىپ, 20-دان استام ادام اۋىر جاراقاتتار العان. توبەسىندە ورتالىق امەريكا ەلدەرىنەن كەلە جاتقان 300-گە تارتا زاڭسىز يمميگرانتتار وتىرعان جۇك پويىزى رەلستەن شىعىپ كەتكەن كورىنەدى.
اپاتتان زارداپ شەككەندەر, ولاردىڭ دەنى گوندۋراس ازاماتتارى, گوسپيتالدارعا جەتكىزىلگەن. جاراقاتتانعانداردىڭ بىرقاتارىنىڭ جاعدايى وتە اۋىر كۇيدە. قايعىلى وقيعا ورىن العان جەردەگى قۇتقارۋ جۇمىستارى ءالى اياقتالماعان. سوعان بايلانىستى مەكسيكا وكىمەتى قۇربان بولعاندار سانىنىڭ كوبىرەك بولۋ مۇمكىندىگىن دە جوققا شىعارمايدى.
قولتىراۋىن جاس جىگىتتى مەرت قىلدى
اۆستراليادا 26 جاستاعى جىگىت 5 مەترلىك قولتىراۋىننىڭ شابۋىلىنان قازا تاپقان. بۇل تۋرالى جەرگىلىكتى پوليتسيا حابارلاپ وتىر.
جاس جىگىت قولتىراۋىنداردىڭ مەكەنى رەتىندە اتى شىققان مەري وزەنىنىڭ جيەگىندە دوسىنىڭ 30 جىلدىعىن اتاپ وتپەك بولىپتى. ءبىر ءسات قۇربان بولعان جىگىت پەن تاعى ءبىر ەر ادام سۋدا شومىلۋعا نيەت بىلدىرەدى. وسىلايشا, ولار سۋ ورتاسىنان كەيىن قاراي ءجۇزىپ كەلە جاتقاندا جاس جىگىتكە قولتىراۋىن شابۋىل جاسايدى. وقيعا بولعان جەرگە دەرەۋ جەتكەن پوليتسەيلەر مەن قولتىراۋىندار جونىندەگى مەملەكەتتىك باسقارما وكىلدەرى سول جەردە كەزدەسكەن ءبىر قولتىراۋىندى اتىپ ولتىرگەن كورىنەدى.
ىشىمدىك بانك كارتالارى ارقىلى ساتىلماق
«سپراۆەدليۆايا روسسيا» پارتياسىنان سايلانعان مەملەكەتتىك دۋمانىڭ دەپۋتاتى ولەگ ميحەەۆ الكوگولدى ىشىمدىكتى تەك بانك كارتاسى بويىنشا عانا ساتۋعا رۇقسات بەرەتىن زاڭ جوباسىن دايىنداعان.
قۇجات اۆتورىنىڭ پىكىرىنشە, بۇل شارا الكوگول رىنوگىنا باقىلاۋدى كۇشەيتۋگە, سونداي-اق, كامەلەتكە تولماعاندارعا ءسپيرتتى ىشىمدىكتەردى ساتۋدىڭ الدىن الۋعا جاعداي جاسايدى. ونىڭ تۇسىندىرۋىنشە, بۇل زاڭ ىشىمدىك ساتۋ ەرەجەلەرى نەعۇرلىم ءجيى بۇرمالاناتىن ورىنداردا, ياعني دۇڭگىرشەكتەر مەن شاعىن دۇكەندەردە الكوگولدى ونىمدەر ساتۋعا شەكتەۋ قويادى. سونىمەن بىرگە, دەپۋتات الكوگولدى قولما-قول اقشاعا ساتۋعا تىيىم سالۋ كەيبىرەۋلەردىڭ ىشىمدىك الۋعا اتا-انالارىنان اقشا سۇراۋىنا دا توسقاۋىل قويادى دەپ ەسەپتەيدى.
ينتەرنەت ماتەريالدارى نەگىزىندە ازىرلەندى.
