س. امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىندە «التاي - تۇركى الەمىنىڭ التىن بەسىگى» ءىى حالىقارالىق فورۋمىنىڭ اياسىندا ءوتىپ جاتقان عىلىمي-پراكتيكالىق كونفەرەنتسيادا بۇگىن «التايتانۋ» ورتالىعى اشىلدى. بۇل تۋرالى «قازاقپارات» ءتىلشىسى حابارلادى.
عىلىمي-پراكتيكالىق كونفەرەنتسياعا الەمدىك دەڭگەيدەگى تانىمال تۇركىتانۋشىلار, عالىمدار مەن ديپلوماتتار قاتىسۋدا. كونفەرەنتسيا بارىسىندا ءتۇرلى تاقىرىپتىق كورمەلەر تانىستىرىلدى.
اتاپ ايتقاندا, «تۇركى الەمىنىڭ قۇجاتتار شەجىرەسى» كورمەسىندە سەمەي قالاسىنىڭ اباي مۇراجايىنىڭ «سيرەك قولجازبالار قورىنان» الىنعان كىتاپتار, وڭتۇستىك قازاقستاننىڭ امبەباپ كىتاپحاناسى مەن شقمۋ كىتاپحاناسىنىڭ كىتاپتارى قويىلدى. ال «التاي-ەرتىس كىتاپحاناسى» كورمەسىن پۋشكين اتىنداعى كىتاپحانا تانىستىردى.
ءوڭىر مۇراجايى تۇركى الەمىنىڭ ونەرى, تاريحى مەن ارحەولوگياسىنان سىر شەرتەتىن بىرەگەي ەكسپوزيتسياسىن جۇرت نازارىنا ۇسىندى. التاي تابيعاتىنىڭ فلوراسى مەن فاۋناسى «التايدىڭ عاجايىپ تابيعات الەمى» كورمەسىندە تانىستىرىلدى.
ەسكە سالا كەتسەك, بۇگىن تۇستەن كەيىن وسكەمەندە قر يۋنەسكو جانىنداعى تۇراقتى وكىلى ولجاس سۇلەيمەنوۆ, قر جۋرناليستيكا اكادەمياسىنىڭ پرەزيدەنتى, پروفەسسور, تاريح عىلىمدارىنىڭ دوكتورى ساعىمباي قوزىباەۆ, ىستامبۇلداعى Mimar Sinan ۋنيۆەرسيتەتىنىڭ پروفەسسورى ابدىۋاقاپ قارانىڭ قاتىسۋمەن ءباسپاسوز ءماسليحاتى وتەدى.
مۇرات ايتقوجا.
