ەلوردالىق پوليتسيا دەپارتامەنتىنىڭ قىزمەتكەرلەرى توتەنشە جاعداي مەن جاريالانعان كارانتينگە ساي شاعىن جانە ورتا بيزنەستىڭ قىزمەتىنە تەكسەرىس جۇرگىزدى. قازىرگى ۋاقىتتا پوليتسيا قىزمەتكەرلەرىنە 235 ەرىكتى كومەك كورسەتەدى, ولار باقىلاۋ بەكەتتەرىندەگى, رەيد كەزىندەگى جۇمىستارعا تارتىلعان.
«ەلوردادا كارانتين رەجيمى جاريالانعاندا ۆولونتەرلەر پوليتسەيلەرگە كومەككە كەلدى. ولاردىڭ ارقايسىسى ازاماتتىق ۇستانىمىن كورسەتىپ, بىزبەن بىرگە جۇمىس جاساۋدى ءوزىنىڭ مىندەتى دەپ سانايدى. ءبىز ولاردىڭ ۇسىنىستارىن قۋانا قابىلدادىق. ءبىز بىرلەسىپ كوروناۆيرۋستىڭ تارالۋىنا قارسى تۇرا الامىز. بولاشاقتا ەرىكتىلەرمەن بىرلەسكەن جۇمىس تاجىريبەسىن قولدانا الامىز دەپ ۇمىتتەنەمىز», - دەدى ەلوردانىڭ باس پوليتسەيى ەرجان سادەنوۆ.
تەكسەرىس بارىسىندا ەلدەگى توتەنشە جاعدايعا قاراماستان, قالاداعى بىرقاتار ۇيىمداردىڭ شتاتتىق رەجيمدە جۇمىس ىستەگەنى بەلگىلى بولدى. ماسەلەن, «تۇلپار» ساۋدا ورتالىعىندا اۆتوجۋ, «تاپچان-7» كافەسى, «دونەر ميكس» قوعامدىق تاماقتانۋ پۋنكتى, «جىگەر» بيليارد كلۋبى جانە باسقا دا ۇيىمدار جۇمىسىن جالعاستىرعان. رەجيمدى بۇزعان مەنشىك يەلەرى, شاعىن جانە ورتا بيزنەس سۋبەكتىلەرىنە اكىمشىلىك حاتتامالار جاسالدى. اتالعان زاڭ بۇزۋشىلىقتار تۋرالى ماتەريالداردى ەلوردانىڭ مامانداندىرىلعان اۋدانارالىق اكىمشىلىك سوتى بەينەكونفەرەنتسيا رەجيمىندە قاراستىرعانىن اتاپ وتكەن ءجون. بارلىق مەكەمە يەلەرىنە 10 اەك مولشەرىندە اكىمشىلىك ايىپپۇل سالىندى.
سونىمەن قاتار رەيد كەزىندە ۋچاسكەلىك پوليتسيا ينسپەكتورلارى ەرىكتىلەرمەن بىرگە مەديتسينالىق بەتتۇمشالار مەن انتيسەپتيكتەردى ساتۋدىڭ زاڭسىز جاعدايلارىن انىقتادى. قۇقىق بۇزۋشىلاردان 188 بەتپەردە جانە 112 دانا انتيسەپتيكتەر تاركىلەندى. ساتۋشىلارعا اكىمشىلىك حاتتاما جاسالدى.
