بۇگىنگى تاڭدا قۇقىقتىق ءتارتىپ اسكەرىنىڭ جەكە قۇرامى توتەنشە جاعداي مەن كارانتينگە بايلانىستى بارلىق شارالارعا جۇمىلدىرىلدى. ەل استاناسىندا كۇندەلىكتى 600-گە تارتا ۇلاندىق قىزمەت اتقارادى. ودان بولەك جەكەلەنگەن باعىت بويىنشا توسقاۋىل بەكەتتەرى اراسىندا ەكى اۋىسىممەن تاۋلىك بويى 72 اسكەري قىزمەتشى جۇمىلدىرىلعان. پوليتسيا قىزمەتكەرلەرىمەن بىرلەسىپ 18 اۆتوپاترۋلدىك كولىكپەن اينالما جول ارقىلى ترانزيتتىك كولىك قاۋىپسىزدىگىن قامتاماسىز ەتەدى.
سونداي-اق, ۇلاندىقتار قۇقىق قورعاۋ ورگاندارى مەن سانيتارلىق-ەپيدەميولوگيالىق ستانتسيا جانە قورعانىس مينيسترلىگى قىزمەتكەرلەرىمەن بىرگە 7 بىردەي ەلورداعا كىرىپ, شىعۋ توسقاۋىل بەكەتتەرىندە كۇشەيتىلگەن كۇزەتۋ رەجيمىنە كوشكەن.
كەزەكشىلىك 12 ساعاتتىق اۋىسىم بويىنشا جاسالىنعان. توتەنشە جاعدايعا جۇمىلدىرىلعان قىزمەتكەرلەردىڭ بارلىعى قورعانىس قۇرالدارىمەن جابدىقتالعان.
قازىرگى ۋاقىتتا نۇر-سۇلتان قالاسىنا كىرىپ-شىعۋ بارلىق ادامدارعا رۇقسات ەتىلگەن, الايدا 22 ناۋرىز كۇنى 00:00 ساعاتتان باستاپ توقتاتىلادى. تەك مەديتسينالىق جابدىقتار مەن ازىق-ت ۇلىك تيەگەن كولىكتەرگە رۇقسات.
ۇلتتىق ۇلان قىزمەتشىلەرى وڭتۇستىك استانادا دا كۇشەيتىلگەن رەجيمدە قىزمەت اتقارىپ جاتىر. الماتىدا قوعامدىق ءتارتىپتى ساقتاپ, تىنىشتىقتى كۇزەتۋ بويىنشا 09:00-01:00 ساعات ارالىعىندا 900-دەن اسا ۇلاندىق جۇمىلدىرىلعان. سونىمەن قوسا, ۇلاندىقتار وسى كۇنگە دەيىن الماتىدا ۆيرۋس جۇقتىرىلعان وشاق – كوپقاباتتى تۇرعىن ۇيلەردى كۇزەتۋدى دە قامتاماسىز ەتتى.
ەل تىنىشتىعى مەن قوعامدىق ءتارتىپتى قامتاماسىز ەتۋگە رەسپۋبليكا بويىنشا جالپى سانى 4 مىڭنان اسا ۇلتتىق ۇلان اسكەري قىزمتشىسى جۇمىلدىرىلعان.
