– سىزدەردى ناۋرىز مەرەكەسىن تۋعان-تۋىستار مەن جاقىندارىڭىزدىڭ ورتاسىندا وتكىزۋگە, ادامدار كوپ شوعىرلاناتىن ورىندارعا بارماۋعا, وبلىستان تىس جەرلەرگە الىس ساپارلاردى جوسپارلاماۋعا شاقىرامىن, – دەدى قانات اسقاروۆ.
سونىمەن قاتار, ول كوروناۆيرۋسپەن اۋىرعاندار اراسىندا تۋريستىك ارزان تۋرلارعا قىزىعىپ, ينفەكتسيالىق جاعدايى قولايسىز ەلدەرگە بارعانداردىڭ بار ەكەنىن ەسكە سالدى. «تومەن باعاعا قىزىقپاڭىزدار. ارزان تۋرلار ءسىزدىڭ جاقىندارىڭىزدىڭ دەنساۋلىعى مەن ومىرىنەن ارتىق ەمەس», دەدى وبلىستىڭ باس سانيتار دارىگەرى.
سونداي-اق, قانات اسقاروۆ كوروناۆيرۋس جۇقتىرعان ەكى ناۋقاستىڭ وبلىس ورتالىعىنداعى مەديتسينالىق مەكەمەلەردىڭ بىرىندە تولىققاندى ەم الىپ جاتقانىن, بۇگىنگى كۇندە ولاردىڭ دەنساۋلىق جاعدايى قاناعاتتانارلىق ەكەنىن حابارلادى.
بريفينگ بارىسىندا وبلىستاعى بالاباقشالاردىڭ جابىلۋى مۇمكىن ەكەندىگى بەلگىلى بولدى. بۇل تۋراسىندا وبلىستىق ءبىلىم باسقارماسىنىڭ باسشىسى ەسەنعازى يمانعاليەۆ مالىمدەدى.
– ءبىزدىڭ بالالارىمىزدىڭ دەنساۋلىعى مەن اماندىعى باستى بايلىعىمىز. ستاتيستيكاعا سۇيەنسەك, قازىر اتا-انالاردىڭ 20%-ى بالالاردى بالاباقشالارعا اكەلەدى. ءوز ەركىمەن كەلۋدەن باس تارتقان ادامدار ءۇشىن ونداعى ورىندار ساقتالادى. بالالاردىڭ از كەلۋى قىزمەتكەرلەردىڭ ەڭبەكاقىسىنا اسەر ەتپەيدى. ەگەر ءبىز بالاباقشالاردىڭ قىزمەتىن توقتاتاتىن بولساق, بۇل قاۋىپسىزدىكتى كۇشەيتەدى دەپ ويلايمىن, – دەدى ول.
ءساۋىردىڭ 6-سىنان باستاپ مەكتەپ وقۋشىلارىنىڭ كەزەكتەن تىس دەمالىسى اياقتالادى. وسى ۋاقىتقا قاراي جاعدايعا بايلانىستى قالاي ارەكەت ەتۋ كەرەكتىگى ويلاستىرىلۋدا ەكەندىگىن جەتكىزدى باسقارما باسشىسى. ال كوللەدج ستۋدەنتتەرى 16 ناۋرىزدان باستاپ قاشىقتان ءبىلىم الۋعا كوشكەن.
بريفينگتە قاراعاندى وبلىستىق ەڭبەك ينسپەكتسياسى جونىندەگى باسقارمانىڭ باسشىسى يرينا ليۋبارسكايا قاشىقتان جۇمىس ىستەۋگە كوشكەن ۇيىمدار مەن كاسىپورىنداردىڭ قىزمەتكەرلەرىنە اقى تولەۋ جۇيەسىنىڭ قالاي جۇزەگە اساتىنىن ءتۇسىندىردى. اتاپ ايتقاندا, ول مۇنداي جاعدايعا ۇشىراعان ازاماتتاردىڭ قولداۋسىز جانە قامقورلىقسىز قالمايتىنىن مالىمدەدى.
بريفينگ جۇمىسىنىڭ سوڭىندا سپيكەرلەر وبلىس تۇرعىندارىن ناۋرىز مەرەكەسىمەن قۇتتىقتادى.
قاراعاندى وبلىسى
