قاراۋىل سوڭعى ۋاقىتتا تۇرلەنىپ, گۇلدەنىپ كەلەدى.
اباي ەلىنىڭ ورتالىعى ءتۇرلى حالىقارالىق, رەسپۋبليكالىق, وبلىستىق ءىس-شارالاردىڭ ورتالىعىنا اينالدى. اۋدان اكىمى تۇرسىنعازى مۇساپىربەكوۆتىڭ جەتەكشىلىگىمەن اۋقىمدى شارالاردى قىسىلماي-قىمتىرىلماي وتكىزەرلىك احۋال قالىپتاستى. ماسەلەن, قاراۋىلداعى اباي كوشەسى تولىق اسفالتتالدى. ق. مۇحامەتحان, قۇنانباي كوشەلەرى جوندەلىپ, جارىقتاندىرىلدى. قۇنانباي الاڭى جايقالعان گۇلزارلارىمەن, ساياباعىمەن ەرىكسىز باۋرايدى.
قاراۋىل سوڭعى ۋاقىتتا تۇرلەنىپ, گۇلدەنىپ كەلەدى.اباي ەلىنىڭ ورتالىعى ءتۇرلى حالىقارالىق, رەسپۋبليكالىق, وبلىستىق ءىس-شارالاردىڭ ورتالىعىنا اينالدى. اۋدان اكىمى تۇرسىنعازى مۇساپىربەكوۆتىڭ جەتەكشىلىگىمەن اۋقىمدى شارالاردى قىسىلماي-قىمتىرىلماي وتكىزەرلىك احۋال قالىپتاستى. ماسەلەن, قاراۋىلداعى اباي كوشەسى تولىق اسفالتتالدى. ق. مۇحامەتحان, قۇنانباي كوشەلەرى جوندەلىپ, جارىقتاندىرىلدى. قۇنانباي الاڭى جايقالعان گۇلزارلارىمەن, ساياباعىمەن ەرىكسىز باۋرايدى.
التىن بالىق پەن قولتىراۋىن ءمۇسىندى سۋبۇرقاق جانعا جايلى دەمالىس ورنىنا اينالدى. مۇنىڭ ءبارى بيىل جۇزەگە اسقان قۇرىلىستار. اۋدانداعى التى ساياباقتى گۇلمەن قامتاماسىز ەتەتىن جىلىجايدا 25 مىڭ ءتۇپ گۇل وسىرىلەدى. ونىڭ 15 مىڭ ءتۇبى – ءبىر جىلدىق شىرايگۇل. ودان وزگە شىرماۋىق, بالدىرگۇل, كوپجىلدىق گوللاندىق كاننا, دەكوراتسيالىق ماقساتتا ءۇش مەترلىك پالما, قۇرما وسىمدىكتەرى دە ءوسىرىلىپ وتىر. جىلىجايعا جىلۋ قازاندىقتان بەرىلەدى. ال توبەسىندەگى اينەكتەر ەسكى اۋرۋحانانىڭ بۇزىلعان تەرەزەلەرىنەن قۇرالدى. گۇلدەردىڭ تۇقىمى مەن توپىراعىنا, ءوسىرۋ جۇمىستارىنا بارلىعى 1 ملن. تەڭگەگە جۋىق قاراجات جۇمسالدى. ال گۇلدى ساتىپ السا 7-8 ملن. تەڭگە جۇمسالادى ەكەن. بۇل اۋداننىڭ بيۋدجەتىن ۇنەمدەۋگە ۇلكەن مۇمكىندىك بەرىپ وتىر.
جۋىردا ابايلىق بۇلدىرشىندەرگە ارنالعان بالالار الاڭقايى پايدالانۋعا بەرىلدى. بالاباقشا جاسىنداعى بالالاردىڭ الاڭسىز ويناۋىنا جاعداي جاسالعان الاڭقاي قۇرىلىسىنا اۋداندىق بيۋدجەتتەن 25 ملن. تەڭگە ءبولىندى. اۋداندىق ونەر مەكتەبىنىڭ شەبەرلەرى جاساعان اڭدار مەن جانۋارلاردىڭ مۇسىندەرى ساپالى ءارى كوز تارتارلىقتاي ادەمى. ويىن الاڭىندا اتكەنشەك, باتۋت, بالالاردىڭ ويىنشىق كولىكتەرى قويىلعان, ورىندىق, جارىقپەن قامتاماسىز ەتىلگەن.
«تۋعان جەرگە تاعزىم» اكتسياسى اياسىندا قۇنى 171 ملن. تەڭگە تۇراتىن سپورت كەشەنىن سالۋعا قولۇشىن سوزعان قۇلجانوۆتار اۋلەتىنىڭ ەڭبەگى اتاپ ايتۋعا تۇرارلىق. بۇگىندە لوندوندا تۇراتىن مەدعات قۇلجانوۆتىڭ جەرلەستەرىنە مۇنداي اۋقىمدى سىيدى جاساۋى تەگىن ەمەس. جاقىندا وتكەن ەلباسى جۇلدەسىنە ارنالعان قازاق كۇرەسى تۋرنيرىندە «قازاقستان بارىسى» اتاعىن جەڭىپ العان ايبەك نۇعىماروۆ – قاراۋىلدىڭ تۇلەگى. اقىندار مەن بالۋاندار اۋىلىندا بىلتىر دا ءبىر سپورت عيماراتى مەن سىڭعىرلاعان مادەنيەت ءۇيى پايدالانۋعا بەرىلگەن.
بيىل 350 ورىنعا ارنالعان اۋداندىق اۋرۋحانا كۇردەلى جوندەۋدەن وتكىزىلۋدە. اۋدان ورتالىعىندا 27 پاتەرلى تۇرعىن ءۇي پايدالانۋعا بەرىلدى. جۇمىسپەن قامتۋ باعدارلاماسىنا وراي 121 ادامعا 50 ميلليون تەڭگە نەسيە ءبولىندى.
باسقاسىن بىلاي قويعاندا, اباي اۋدانىندا بۇگىندە 460 مىڭ قوي-ەشكى, 50 مىڭ ءمۇيىزدى ءىرى قارا, 25 مىڭ جىلقى وسىرىلەدى. ال كەڭەس وكىمەتى كەزىندە اۋدان شوپاندارى 430 مىڭ قوي باققان ەكەن. ياعني, مال باسى كەڭەس وكىمەتى كەزىندەگىدەن دە كوبەيگەن. بۇگىندە كۇنىنە 4 توننا شيپالى سۋسىن وندىرەتىن سارجال اۋىلى قىمىزىنىڭ داڭقى الىسقا كەتتى. تۇرعىندار شىڭعىستاۋ قىمىزىنىڭ ءدامى يتاليا بالمۇزداعىمەن سايما-ساي كەلەدى دەسەدى.
بۇرىن اباي اۋدانىنىڭ ءجۇن شيكىزاتى ەشقايدا وتپەي, دالاعا توگىپ تاستايتىندىقتان, ساي-سالانىڭ بارلىعى اق-ايران بولىپ شاشىلىپ جاتاتىن. ەندى اۋداننىڭ شارۋا قوجالىقتارى جۇننەن دە تابىس تاباتىن بولادى. اۋداندا جاڭادان «دەريكار» جشس-ءى ىسكە قوسىلدى. اتالعان كاسىپورىن «ەرتىس» اكك ارقىلى 20 ملن. تەڭگە العان بولاتىن. قازىرگى كەزدە تسەحتىڭ وبلىس كولەمىندە 40-قا جۋىق شيكىزات دايىنداۋشىسى بار. 1 كەلى ءجۇندى 40 تەڭگەدەن قابىلدايدى. ايىنا 200 توننا ءجۇن وڭدەۋگە قۋاتى جەتەدى. كاسىپكەرلەر ەرتىس وماروۆ پەن تاسبولات بيتەنوۆ تسەحتىڭ ءجۇن جۋاتىن قۇرال-جابدىقتارىن 150 مىڭ اقش دوللارىنا ساتىپ الىپتى. قازىرگى ۋاقىتتا قىتاي كاسىپكەرلەرىمەن 2 جارىم مىڭ توننا ءجۇن وتكىزۋگە كەلىسىم-شارت جاسالعان.
دۋمان اناش,
جۋرناليست.
شىعىس قازاقستان وبلىسى,
اباي اۋدانى.
