ءمينيستردىڭ ءسوزىن ءىلىپ اكەتكەن الەۋمەتتىك جەلى قولدانۋشىلارى جۇرتتى جاپپاي مەديتسينالىق قىزمەتكەرلەردى قولداۋعا شاقىردى. ال كەشە كوپقاباتتى ءۇيدىڭ تۇرعىندارى كەشكى ساعات تۋرا 21.00-دە بالكونعا شىعىپ, كوروناۆيرۋسپەن كۇندىز-ءتۇنى كۇرەسىپ جاتقان اقحالاتتىلارعا دۋ قول شاپالاقتاپ, قوشەمەتىن ءبىلدىردى. مۇنداي قوشەمەت ءۇش كۇن بويى جالعاسادى.
الەۋمەتتىك جەلىدە ارنايى قۇرىلعان توپتىڭ اكتسياسىن قاراپايىم حالىق عانا ەمەس, ۇكىمەت مۇشەلەرى, ەلگە تانىمال ازاماتتار دا قولداپ, جان-جاقتان العىس ايتتى. ال مينيستر فاحرەتتين كوجا بولسا, الەۋمەتىك جەلى پاراقشاسىنا: «راحمەت, تۇركيا. سىزدەردىڭ قولداۋىڭىز ءبىزدى جىگەرلەندىرىپ, كۇش سىيلادى» دەپ جازدى.
دۇنيەجۇزىن دۇربەلەڭگە سالعان پاندەميا اسىرەسە, اقجەلەڭدىلەر جۇمىسىنا اۋىر ءتيىپ تۇر. بۇل دەرتتى مەديتسيناسى دامىعان الپاۋىت ەلدەردىڭ ءوزى اۋىزدىقتاي الماي, دارمەنسىزدىك تانىتۋدا. سوندىقتان ءبىز دە اتى جامان اۋرۋمەن بەتپە-بەت كەلىپ وتىرعان مەديتسينالىق قىزمەتكەرلەرىمىزگە قولداۋ بىلدىرەيىك. ولار ءۇشىن ەڭ باستى قولداۋىمىز – كوپشىلىك ورىندارعا بارۋدى ازايتىپ, مۇمكىندىگىنشە ۇيدە وتىرۋ. ءبىر مەزەتتە كوپ ادام اۋىرسا, دارىگەر دە, مەدبيكە دە, ءتيىستى قۇرال-جابدىق تا جەتپەي قالۋى مۇمكىن. بۇل اينالىپ كەلىپ, حالقىمىزدىڭ دەنساۋلىعىنا قاۋىپ توندىرەدى. ەشقايدا بارماي ۇيدە وتىرۋ, اينالاڭدى تازا ۇستاۋ, گيگيەنا ساقتاۋ سەكىلدى قاراپايىم قاعيدانى ەستە ۇستاساق, ىندەتتەن دە جەڭىل وتەتىنىمىز انىق.
قىمبات توقتامۇرات
