تۇركىستان وبلىسىنىڭ حالقىنا ارنايى مالىمدەمە جاساعان وبلىس اكىمى ومىرزاق شوكەەۆ وسىنداي دەرەكتەر كەلتىردى. كوروناۆيرۋس دەرتىنە بايلانىستى وڭتۇستىككە كىرىپ-شىعۋدى تاۋلىك بويى قاداعالاۋ ءۇشىن اشىلعان ارنايى جاساقتالعان بەكەتتە بولعان وبلىس باسشىسى تۇرعىندارمەن اڭگىمەلەستى. جامبىل وبلىسىنان تۇلكىباس اۋدانىنا كىرەبەرىستەگى «شاقپاق» بەكەتىندە ورناتىلعان بلوك-پوست ارقىلى الماتى, نۇر-سۇلتان قالالارى مەن جامبىل وبلىسىنان كەلەتىن بارلىق اۆتوكولىكتەر ءجۇرىپ وتەدى. كۇرە جولدىڭ بويىندا اشىلعان بەكەتتە پوليتسيا مەن دارىگەرلەر ءاربىر كولىكتى توقتاتىپ, ارنايى قۇرىلعىمەن ازاماتتاردىڭ دەنە قىزۋلارىن ولشەپ, تەكسەرۋدەن وتكىزۋدە. ەكى تاۋلىك ىشىندە «شاقپاق» بەكەتتەرى ارقىلى وتكەن 6000-عا جۋىق ادام تەكسەرىلگەن. بلوك - پوستتا ارنايى 4 تەپلوۆيزور ورناتىلعان. شۇعىل ارەكەت ەتۋ ماقساتىندا 30-دەن استام دارىگەر, مەديتسينالىق جەدەل-جاردەم قىزمەتىنىڭ بريگاداسى دا جۇمىلدىرىلىپ وتىر. بۇدان بولەك, تەمىرجول, اۋەجاي, قالاارالىق بەكەتتەر مەن شەكارالاردا سانيتارلىق جۇمىستار قىزۋ جۇرۋدە. ىندەتپەن كۇرەستىڭ كۇندەلىكتى جۇمىس بارىسى وبلىس اكىمدىگىندە اشىلعان سيتۋاتسيالىق ورتالىق ارقىلى قالىڭ حالىق حاباردار ەتىلۋدە.
«بۇل ىندەتتىڭ تاراۋىنا توسقاۋىل قويۋ ءۇشىن ادامدار كۇندەلىكتى ءجۇرىس-تۇرىسىن شەكتەپ, قوعامدىق ورىندارعا بارماۋى قاجەت. تويحانا, مەيرامحانالار جابىلدى, قوعامدىق كولىكتەردى دە توقتاتامىز. ءبىز وسىنداي جۇمىستار ارقىلى ءبىر جەڭنەن قول, ءبىر جاعادان باس شىعارىپ, ىندەتتى جەڭۋىمىز كەرەك», – دەدى ومىرزاق شوكەەۆ.
ەلباسى ءوز ۇندەۋىندە قيىن كەزەڭدە ەل-جۇرتقا كومەكتەسكىسى كەلەتىن جانە جاردەم بەرە الاتىن ادامداردىڭ قاراجاتى جيناقتالاتىن رەسپۋبليكالىق قور قۇرۋدى ۇسىندى. بۇل ورايدا اتالعان قورعا وبلىس اكىمدىگى, باسقارمالار مەن وعان قاراستى مەكەمەلەر ءبىر كۇندىك جالاقىلارىن اۋدارادى. باستامانى قولداعان بيزنەس وكىلدەرى تاراپىنان دا قورعا اقشا اۋدارىلماق. توتەنشە جاعدايعا بايلانىستى «تۇركىستان» كورپوراتيۆتىك الەۋمەتتىك دامۋ قورىنىڭ جانىنان قامقورشىلىق كەڭەسى قۇرىلعان. بۇل قور وبلىستاعى از قامتاماسىز ەتىلگەن وتباسىلارعا ازىق-ت ۇلىك پەن گيگيەنالىق زاتتار بولەدى. قاجەتتى زاتتاردى تاراتۋعا ەرىكتىلەر, «جاس وتان» جاستار قاناتى بەلسەنە كىرىسۋگە نيەت ءبىلدىرىپ وتىر.
«الاڭداۋعا نەگىز جوق. تۇركىستان وبلىسىنىڭ اۋماعىندا كوروناۆيرۋس تىركەلگەن جوق. ساقتىق شارالارى كۇشەيتىلگەن تارتىپتە ءجۇرىپ جاتىر. ازىق-ت ۇلىك قورى جەتكىلىكتى, باعالاردى نەگىزسىز وسىرۋگە جول بەرمەيمىز. ءدال قازىر بۇكىل الەم قيىن كەزەڭدە تۇر. الايدا, ءبىز بۇل قيىن-قىستاۋ ۋاقىتتان دا بىرلىك پەن ىنتىماقتىڭ ارقاسىندا امان-ەسەن وتەمىز دەپ سەنەمىن! قازىرگى تاڭدا بىزگە تىنىشتىق كەرەك, جالعان اقپاراتتارعا سەنبەڭىزدەر. رەسمي اقپارات پەن بۇقارالىق اقپارات قۇرالدارىنا عانا سەنىڭىزدەر. ءبىز كۇندەلىكتى جاعدايدى قاتاڭ باقىلاۋدا ۇستاپ وتىرمىز. ءبىز بىرگەمىز!», دەپ تۇيىندەدى مالىمدەمەسىن ومىرزاق ەستاي ۇلى.
وبلىس باسشىسى تۇلكىباس اۋدانىنىڭ اكىمى نۇربول تۇراشبەكوۆپەن بىرگە تەمىرجول ۆوكزالىنداعى قولعا الىنعان ساقتىق شارالارىن پىسىقتادى. جاۋاپتى سالا ماماندارىنىڭ جۇمىلدىرۋىمەن شويىن جول بەكەتتەرىندە قاۋىپتى ىندەتتىڭ تارالۋىنا جول بەرمەۋ ءۇشىن ارنايى تەكسەرۋ ورنى جاساقتالعان. مىسالى, سوڭعى ەكى تاۋلىكتە 16 پوەزد ءجۇرىپ ءوتىپ, 200-دەن استام جولاۋشى تەكسەرىلگەن.
تۇركىستان وبلىسى
