پوليتسيا گەنەرال-مايورى قايرات دالبەكوۆ باسقاراتىن تۇركىستان وبلىسى پوليتسيا دەپارتامەنتىنىڭ قىزمەتكەرلەرى بۇگىندە كۇشەيتىلگەن رەجيمدە قىزمەت اتقارۋدا. ياعني, توتەنشە جاعداي كەزىندەگى تالاپتاردىڭ ساقتالۋى كۇندىز جانە تۇنگى رەيدتەر ارقىلى دا قاداعالانۋدا. «وسىنداي كەزەكتى رەيد بارىسىندا وبلىس اۋماعىنداعى اۋىلداردىڭ بىرىندەگى تويحانادا جيىن وتكىزىلگەنى انىقتالدى. اتالعان جايتقا بايلانىستى پوليتسەيلەر تويحانا يەسى مەن توي يەسىنە اكىمشىلىك قۇقىق بۇزۋ كودەكسىنىڭ 476-بابى «توتەنشە جاعداي رەجيمiن بۇزۋ» بويىنشا حاتتاما تولتىردى. سونداي-اق شارا قابىلداۋ ءۇشىن قۇجاتتار قالالىق مامانداندىرىلعان اكىمشىلىك سوتىنا جولداندى», دەپ حابارلادى وبلىستىق پوليتسيا دەپارتامەنتى.
سونداي-اق سارىاعاش اۋدانىنىڭ تۇرعىنى «كوروناۆيرۋس جۇقتىرعان ايەل ارامىزدا ءجۇر» دەپ الەۋمەتتىك جەلىلەردە جالعان اقپارات تاراتقان. جالعان اقپارات تاراتۋشىلاردى جاۋاپكەرشىلىككە تارتۋ تۋرالى جابىرلەنۋشىنىڭ وتىنىشىنە بايلانىستى شۇعىل ىزدەستىرۋ جۇمىستارىن جۇرگىزگەن كەلەس اپب-نىڭ پوليتسيا قىزمەتكەرلەرى كۇدىكتىنى انىقتاپ, ۇستاعان. قازىرگى ۋاقىتتا اتالعان جايت بويىنشا سوتقا دەيىنگى تەرگەۋ امالدارى جۇرگىزىلىپ, ءتيىستى ساراپتامالار تاعايىندالدى. كۇدىكتى قولحاتپەن بوساتىلعان. ال, جەلىدە تارالعان اۋديوحابارلاماداعى ايەلدىڭ 10 ناۋرىزدا ماسكەۋ-شىمكەنت رەيسىمەن گەرمانيادان ۇشىپ كەلگەنى بەلگىلى بولعان. اۋەجايدا ونى مەديتسينا قىزمەتكەرلەرى قارسى الىپ, شىمكەنت قالاسىنداعى پاتەرىنە ءۇي جاعدايىنداعى كارانتينگە جاتقىزعان. قازىرگى ۋاقىتتا ول امبۋلاتوريالىق ەم قابىلداۋدا جانە دەنساۋلىعىنا ءتونىپ تۇرعان قاۋىپ جوق ەكەنى انىقتالعان.
