«قازىر وسى كۇردەلى احۋالدان شىعۋ ءۇشىن قازاقستاندا بارلىق قاجەتتى رەسۋرس بار, قور دا جەتكىلىكتى. بۇل – ءبىزدىڭ «الدىمەن ەكونوميكا, سوسىن ساياسات» قاعيداتىنا نەگىزدەلگەن باعىت-باعدارىمىزدىڭ ناقتى ناتيجەسىنىڭ ءبىرى. جاڭادان مەملەكەت قۇرۋ وڭاي ەمەس, ال ونى سىن-قاتەردەن قورعاۋ جانە تاۋەلسىزدىكتى ساقتاپ قالۋ ودان دا قيىن» دەدى ەلباسى.
سونىمەن قاتار تۇڭعىش پرەزيدەنت بىزدە تاجىريبە دە, ناقتى ءىس-ارەكەت الگوريتمى دە بار ەكەنىن مالىمدەدى.
«مەن ۇلتتى ۇيىستىرۋدىڭ, بىرلىك پەن قوعامداعى كەلىسىمنىڭ ماڭىزدىلىعىن ۇنەمى ايتىپ كەلەمىن. تۇتاستىعىمىزدى تاعى ءبىر رەت دالەلدەيتىن كۇن تۋدى. ەلىمىزدىڭ بارلىق ازاماتتارىن توزىمدىلىك تانىتۋعا, مەملەكەت قابىلداپ جاتقان شارالاردى قولداۋعا شاقىرامىن. بىرلىك باردا الىنبايتىن اسۋ جوق» دەگەن نۇرسۇلتان نازارباەۆ قازاقستان حالقىن الدا كەلە جاتقان ۇلىستىڭ ۇلى كۇنى - ناۋرىز مەرەكەسىمەن قۇتتىقتادى.
«كەلە جاتقان ناۋرىز مەيرامى ء– بىزدىڭ بىرلىگىمىزدىڭ نىشانى. شۋاقتى مەرەكە قارساڭىندا ءاربىر شاڭىراققا شاتتىق پەن يگىلىك تىلەيمىن! بارلىق اۋىرتپالىق ءبىزدى اينالىپ وتكەي.
قازاقستان بۇل قيىندىقتى دا ەڭسەرىپ, دامۋدىڭ جاڭا كەزەڭىنە اياق باسادى دەپ نىق سەنەمىن. ءبىز بىرگەمىز!» دەدى ەلباسى.
