ارادا كوپ ۋاقىت وتپەي, 9 ماۋسىمدا قازاقستان پرەزيدەنتىنىڭ كەزەكتەن تىس سايلاۋىندا مەملەكەتتىك باسقارۋ ىسىندەگى ساياسي مول تاجىريبەسىمەن جانە كوشباسشىلىق قابىلەتىمەن ايقىن جەڭىسكە جەتكەن قاسىم-جومارت كەمەل ۇلى توقاەۆ قازاقستان رەسپۋبليكاسىنىڭ پرەزيدەنتى بولىپ سايلاندى.
ەلباسىنىڭ تاعدىرلى شەشىمى, بۇكىل حالىق ءۇشىن توسىن بولعان قادامى الەمدىك دەڭگەيدە, بولاشاقتى بولجاي الاتىن تاريحي اۋقىمدا ونىڭ تاعى دا ساياسي ءارى مەملەكەتتىك قايراتكەر رەتىندەگى كەمەڭگەرلىگى مەن پاراساتتىلىعىن كورسەتتى. ونىڭ ءىس جۇزىندەگى ساياسي ەرىك-جىگەرى, تاۋداي تالابى مەن تاڭداۋى مەملەكەتتى باسقارۋدىڭ جانە ساباقتاستىقتىڭ وزىق ۇلگىسىن عانا جاساپ بەرگەن جوق, سونداي-اق مەملەكەتشىلدىكتىڭ ماڭگىلىك يدەياسى مەن ءداستۇردىڭ جالعاستىعىن قالىپتاستىردى. قازاقستاندىق دامۋ داڭعىلىنىڭ جاڭا جولىن سالىپ بەرىپ, ىرگەسىن قالادى. وسى رەتتە مەملەكەت باسشىسى قاسىم-جومارت كەمەل ۇلى توقاەۆ: «ەلباسىنىڭ دانا شەشىمىنىڭ ارقاسىندا بيلىك ساباقتاستىعى ەشبىر دۇربەلەڭسىز, شيەلەنىسسىز جۇزەگە استى. بۇل بولاشاق ءۇشىن, مەملەكەتتىڭ تۇراقتىلىعى مەن ۇدايى دامۋى ءۇشىن جاسالعان بىرەگەي قادام ەكەنىن ۇمىتپاۋىمىز كەرەك. ءبىزدىڭ ەندىگى مىندەتىمىز – وسى جولدان, وسى باعىتتان اۋىتقىماي, تەك العا باسۋ, ءوسۋ, وركەندەۋ», دەپ ءوز باعاسىن بەردى.
تۇڭعىش پرەزيدەنتىمىز بيلىك ساباقتاستىعى تۋرالى ءسوز ەتكەندە, دۇنيە ءجۇزىنىڭ تاريحىندا ورىن العان بۇل جاعدايدىڭ ءبىرىنشى ەلەۋلى وقيعا ەمەس ەكەنىن ايتتى. تاريحتا ءبىر كەزدەرى شارل دە گولل, لي كۋان يۋ, ماحاتحير سىندى ەل باسقارعان مەملەكەت قايراتكەرلەرى لاۋازىمدارىنان باس تارتقان-دى. دەگەنمەن, بۇل قول سىلتەپ, جەڭىل باعا بەرە سالاتىن ماسەلە ەمەس. بيلىككە تالاس-تارتىستىڭ نەبىر مىسالدارى تولىپ جاتقان قازىرگى كەزدە مەملەكەتشىلدىك پەن ءداستۇردىڭ جالعاستىعىن ساقتاۋ ەڭ وزەكتى ماسەلەلەردىڭ ءبىرى ەكەنى انىق. سوندىقتان الەمدىك دەڭگەيدەگى ساراپشىلاردىڭ ءبىر پاراسى جاسالعان وسى باتىل قادامدى ءوز اقىلدارىنا قوندىرا المادى. ەلباسىنىڭ مانداتى بيىلعى جىلدىڭ اياعىنا دەيىن جالعاسۋى كەرەك ەدى. بىراق ۇزاق تولعانىستىڭ ناتيجەسىندە ونى كۇتپەستەن ءدال وسىنداي توسىن شەشىم قابىلدادى. اتى اڭىزعا اينالعان, پرەزيدەنت لاۋازىمىنان اتاعى دۇركىرەپ تۇرعان شاقتا وكىلەتتىگىن تاپسىردى. ونى سۇيگەن حالقى دا زور وكىنىشپەن قابىل الدى.
پاراسات بيىگىنەن كورىنەتىن تۇلعانىڭ عانا وسىنداي قادامعا باراتىنى انىق. ەلى سۇيگەن, ەلىن سۇيگەن باسشىنىڭ عانا قولىنان كەلەتىن ءىس. ايتپەسە تاۋەلسىزدىك جىلدارىندا مەملەكەتىمىزدەگى بارلىق جەتىستىكتەر مەن تابىستاردىڭ تاعدىرلى, قيىن ساتتەردى ەڭسەرگەن ەلباسىنىڭ ەسىمىمەن تىكەلەي بايلانىستى ەكەنى ءدۇيىم جۇرتقا بەلگىلى. وسى تۇستا مەملەكەت باسشىسىنىڭ «ول تاريحتى جاسايدى» اتتى كىتابىندا تاۋەلسىزدىكتىڭ سول ءبىر قيىن-قىستاۋ كەزەڭىندەگى نۇرسۇلتان نازارباەۆ فەنومەنى مەن ءرولى تۋرالى وتە ورىندى باياندالعان: «بۇگىنگى كۇننىڭ بيىگىنەن قاراعاندا, قازاقستان تابىستى رەفورمالاردىڭ, تۇرلاۋلى دامۋدىڭ جولىنا تۇسكەن ەل رەتىندە بۇكىل الەمگە تانىمال بولىپ تۇرعان كەزدە كەيبىر كىسىلەرگە, اسىرەسە, جاس بۋىن وكىلدەرىنە قول جەتكەن تابىستار وزىنەن ءوزى كەلىپ جاتقانداي, ءبارى وسىلاي بولۋعا تيىستەي كورىنۋى مۇمكىن. الايدا, مىنا ءبىز, مەملەكەتتى قۇرۋدىڭ قاتىسۋشىلارى مەن كۋاگەرلەرى, ولاي ەمەس ەكەندىگىن بىلەمىز عوي. بەلدى ساياساتكەرلەر مەن ساراپشىلار كەزىندە قازاقستاننىڭ كەلەشەگىن كۇڭگىرت ەتىپ كورسەتكەن بولاتىن.
كۇردەلى ىشكى ساياسي, ەكونوميكالىق, دەموگرافيالىق جاعدايلارى, شەكاراسىنىڭ زاڭدى تۇرعىدان بەكىتىلمەگەنى بۇرىنعى وداقتىق رەسپۋبليكاعا شىنايى تاۋەلسىزدىككە قول جەتكىزۋگە, الەمدىك قوعامداستىقتىڭ تولىققاندى مۇشەسى بولۋعا مۇمكىندىك بەرمەيدى-ءمىس دەسىپ جاتتى. بىراق ولار 90-شى جىلداردىڭ باسىندا مەملەكەت قۇرۋشىنىڭ تار جول, تايعاق كەشۋىنە تۇسكەن نۇرسۇلتان نازارباەۆتىڭ وزەكتى ءرولىن ەسكەرمەگەن ەدى.
جاڭا قازاقستاندى قۇرۋدىڭ بۇكىل جاۋاپكەرشىلىگىن ەلباسى ءوز موينىنا جۇكتەدى. كەڭەس وداعى ىدىراعاننان كەيىنگى تارتىستى كەرنەۋگە تولى سول ءبىر كۇندەردە, ەكونوميكا تولىقتاي كۇيرەپ, كاسىپورىندار توقتاپ, ەرەۋىلدەر بىرىنە ءبىرى جالعاسىپ جاتقان كەزدە, دۇكەندەردىڭ سورەلەرى تىپ-تيپىل بولىپ, ينفلياتسيا 3 مىڭ پايىزدىق دەڭگەيدەن اسىپ كەتكەن شاقتا حالىقتىڭ اراسىندا تورىعۋشىلىق, دۇربەلەڭگە تۇسۋشىلىك كۇشەيدى, تالايلارعا مەملەكەتتىڭ تاۋەلسىزدىگى دەگەن انشەيىن ادەمى ءسوز كۇيىندە قالاتىنداي كورىندى. سول سىن ساعاتتا رەفورمالار بويىنشا قيىن شەشىمدەر قابىلداعاندا ەلباسىنىڭ نەندەي كۇيدى كەشكەنىن ونى ءوزى عانا بىلەدى».
راسىندا, سول ءبىر الاساپىران كەزەڭدە مەملەكەتتى ساقتاپ قالۋدىڭ, ءتىپتى ءارى قاراي دامىتۋدىڭ كۇردەلىلىگى مەن اۋىرتپالىعى تۇڭعىش پرەزيدەنتىمىزگە عانا ايان. جەتىستىككە جەتۋ جولىنىڭ تار دا, تايعاق كەشۋ ەكەنى بەسەنەدەن بەلگىلى. سول كەزدەردى ەسىنە العان ەلباسىمىز: «مەن قازاقستاندى كەڭەس زامانىنان بەرى باسقاردىم, 1984 جىلى قازاقستان مينيسترلەر كەڭەسىنىڭ توراعاسى بولىپ سايلاندىم. مىنە, 35 جىل ءوتتى, كسرو ىدىراعاننان كەيىن جانە سوڭعى 30 جىل اسا اۋىر جىلدار بولدى. ىدىراعان مەملەكەتتەردە, سونىڭ ىشىندە كسرو-نىڭ ءبىر بولىگى بولعان قازاقستاندا سىنعان ىدىس سياقتى تۇك جوق. بارلىق بايلانىس ءۇزىلدى, 2 ميلليون ادام جۇمىسسىز, ەلەكتر جوق, دۇكەندەردە نان جوق, ءسۇت جوق, شۇجىق جوق. مىنە, وسىنداي قازاقستاندى كەزىندە مەن قابىلداپ الدىم», دەدى.
ەلباسى باسقارعان تاۋەلسىزدىك جىلدارىنىڭ ىشىندە ءبىزدىڭ ەلىمىزدىڭ ەكونوميكاسى 20 ەسەگە ارتىپ, حالىقتىڭ ءال-اۋقاتى 19 ەسەگە كوتەرىلدى. الەمدىك قوعامداستىق مويىنداعان, بۇدان بۇرىن بەيبىتشىلىك كارتاسىندا بولماعان مەملەكەت قۇرىلدى. ەلىمىز الەم سىيلاپ, قۇرمەتتەيتىن مەملەكەتكە اينالدى. وعان قوسا بۇگىن نۇر-سۇلتان دەپ اتالاتىن استانامىز بوي كوتەردى. الەمگە ۇلگى بولعان باس قالامىز قيىن كەزەڭدە سالىندى. مەملەكەتىمىز تاۋەلسىزدىگىن نىعايتىپ, ونى دامىتاتىن ينستيتۋتتار قالىپتاستى. قورعانىس قابىلەتى مەن قاۋىپسىزدىگى قامتاماسىز ەتىلدى. ەڭ باستىسى – شەكارامىز بەكىتىلدى. كورشىلەس, باۋىرلاس مەملەكەتتەرمەن, الەمنىڭ الپاۋىت ەلدەرىمەن دوستىق قارىم-قاتىناس ورناتىلدى.
سول جىلدارى قازاقتىڭ سانى 40 پروتسەنتكە جەتەر جەتپەس ەدى. وزگە ەتنوس وكىلدەرىنىڭ سانى قازاققا قاراعاندا ەداۋىر جوعارى بولدى. ىشكى ساياسي جاعدايدى تۇراقتاندىرىپ, بىرلىك پەن ىنتىماقتى ساقتاۋ ماقساتىندا تۇڭعىش پرەزيدەنتىمىزدىڭ باستاماسىمەن قازاقستان حالقى اسسامبلەياسى قۇرىلدى. شيرەك عاسىردا اتقارعان جۇمىستارى ارقىلى اسسامبلەيا ءوز-ءوزىن تولىعىمەن اقتادى. بۇگىندە ء«بىر حالىق – ءبىر وتان – ءبىر تاعدىر» يدەياسىن جۇزەگە اسىرىپ وتىر. تاۋەلسىزدىگىمىزدىڭ قۇرداستارى – وزگە ەتنوس وكىلدەرى قازاق تىلىندە ءبىلىم الىپ, ەمىن-ەركىن سويلەپ, قازاقتىڭ مۇڭىن مۇنداپ, جوعىن جوقتاپ كەلەدى. بۇل دا ەلباسىنىڭ كورەگەن ساياساتىنىڭ جەمىسى.
ءيا, نۇرسۇلتان ءابىش ۇلى نازارباەۆ جاڭا مەملەكەتتىلىك جۇيەسىن جاساۋدىڭ بارلىق تاۋقىمەتىن باسىنان وتكەردى. وسى جولدا تولاعاي تابىستارعا قول جەتكىزدى. نارىقتىڭ قاتاڭ تەزىنەن, كورشىنىڭ سۇق كوزىنەن جول تاۋىپ وتىرىپ, بەرەكەسى بار كەلەشەگى زور مەملەكەت قۇردى. ەلىمىزدى تورتكۇل دۇنيەگە ايگىلەپ, دۇنيە جۇزىنە مويىنداتا ءبىلدى. مىنە, سوندىقتان پرەزيدەنتىمىز قاسىم-جومارت كەمەل ۇلى توقاەۆ ايتقانداي, بيلىك ساباقتاستىعىنىڭ وزىق ۇلگىسى رەتىندە ەلباسى سالعان سارا جول ءوز جالعاسىن تابا بەرەتىن بولادى.
بىلتىرعى جىلى مەملەكەتىمىز بيلىكتىڭ اۋىسۋىن تۇراقتى جاعدايدا وتكىزدى. بۇل ءۇردىس ەلباسىنىڭ پاراساتتىلىعىن جانە حالقىمىزدىڭ دانالىعىن كورسەتتى. وركەنيەتتى ەل ەكەنىمىزدى, قازاقستانىمىزدىڭ ەشكىمگە ۇقسامايتىن, تەڭدەسسىز دامۋ جولىنىڭ بار ەكەندىگىن دالەلدەدىك.
ال كەڭەس وداعىنىڭ شەكپەنىنەن شىققان تاۋەلسىز ەلدەردىڭ تاعدىرى ارقيلى ەكەنى بەلگىلى. كەيبىر مەملەكەتتەر وزدەرىنىڭ ايماقتىق تۇتاستىعىنا نۇقسان كەلتىرسە, كەي ەلدەر توڭكەرىس وشاعىنا اينالىپ كەتتى. بازبىرەۋلەر مۇراگەرلىك جولعا ءتۇستى. ءبىزدىڭ مەملەكەتىمىز تۇتاستىعىن ساقتاپ, شەتەلدىك ينۆەستيتسيا تارتۋ, يننوۆاتسيالىق جوبالاردى ىسكە قوسۋ سىندى ساياسي-ەكونوميكالىق احۋالعا ىقپال ەتەتىن دامۋ جولىنا ءتۇسىپ, ەلدىك پەن ۇلتتىق قۇندىلىقتاردى پاش ەتىپ, الەم جۇرتشىلىعىنا ۇلگى بولدى.
تۇڭعىش پرەزيدەنتىمىز قاۋىپسىزدىك كەڭەسىنىڭ, Nur Otan پارتياسىنىڭ جانە قازاقستان حالقى اسسامبلەياسىنىڭ توراعاسى بولىپ قالدى. بۇل دا پاراساتتى شەشىم. ءبارىمىز تاريحتان ۇلگى الامىز. شەشۋشى كەزەڭدەردە تاريحي تۇلعالاردىڭ اتقارعان ءرولى وراسان زور. سول سياقتى ۇلت پەن مەملەكەت تاعدىرى سىنعا تۇسكەندە تاريحتىڭ تاڭداۋى, حالىقتىڭ قالاۋى, مەملەكەتتىڭ قاجەتتىلىگى تۇلعاعا تۇسەتىنى بەسەنەدەن بەلگىلى.
حالىقتىڭ سەنىمىن ارقالاپ, پرەزيدەنت بولىپ سايلانعان قاسىم-جومارت كەمەل ۇلى توقاەۆتىڭ بيلىكتى قولىنا الۋى ءبىر كۇننىڭ, ءبىر ءساتتىڭ نەمەسە ءبىر كەزدىڭ عانا شەشىمى ەمەس. ول – ۇلكەن ساياسي مەكتەپتەن وتكەن, ەلباسىنىڭ قاسىندا ءجۇرىپ, تاۋەلسىزدىككە قاتىستى مەملەكەتتىڭ ىشكى-سىرتقى ساياساتىنا جان تانىمەن ارالاسقان, ۇلكەن جاۋاپكەرشىلىكتى سەزىنەتىن تۇلعا, مەملەكەت قايراتكەرى. الەمدىك جاعدايمەن ەتەنە تانىس, بۇدان بۇرىن اتقارۋشى بيلىك پەن زاڭ شىعارۋشى بيلىكتىڭ تۇتقاسىن ۇستاعان مەملەكەت باسشىسى ەلدىڭ ءۇمىتىن, ەلباسىنىڭ سەنىمىن ابىرويمەن اقتاپ كەلەدى.
قاسىم-جومارت كەمەل ۇلى توقاەۆ ءوزىنىڭ ءبىرىنشى ۇستانىمىنىڭ ەلباسى جاساپ بەرگەن ساياسي باسقارۋ مەن ساباقتاستىقتى جالعاستىرۋ ەكەنىن ايتادى. ەكىنشى – ادىلەتتىلىك, ءۇشىنشى – العا باسۋ, دامۋ جولىمەن ءجۇرۋ دەپ جەتكىزەدى. بيلىكتى قولىنا العان كۇننەن باستاپ, مەملەكەت باسشىسى بۇل ۇستانىمىنان اينىعان ەمەس. كەرىسىنشە, بارىنشا جاعداي جاساپ, تەرەڭدەتە ءتۇستى. بيلىكتىڭ اۋىسۋىن بەيبىت ءارى ەشقانداي ماسەلەسىز وتۋىنە ىقپال ەتىپ, بەيبىتشىلىك پەن تىنىشتىقتى قامتاماسىز ەتتى. مەملەكەتتىك اعىمداعى ماسەلەلەردىڭ شەشىلۋىنە, جۇمىستاردىڭ ارى قاراي جالعاسۋىنا ىقپال ەتتى, ياعني دامۋ ءۇردىسىن توقتاتقان جوق. بيلىكتىڭ ساباقتاستىعىن قامتاماسىز ەتىپ, قوعاممەن جاڭا فورماتتا سۇحباتتاسۋعا جول اشتى. اقپاراتتىق تەحنولوگيا كەڭ قۇلاش جايعان قازىرگى ۋاقىتقا بەيىمدەلىپ, «حالىق ۇنىنە قۇلاق اساتىن مەملەكەت» قاعيداسىن قالىپتاستىردى. قوعامنىڭ كوكەيىندە جۇرگەن كوپتەگەن كۇرمەۋى كۇردەلى ماسەلەنىڭ دەر كەزىندە شەشىم تابۋى ءۇشىن جانە ەلدەگى نارازىلىقتى توقتاتۋ ءۇشىن ۋاقىت تالابىنا ساي جاڭا ىشكى ساياسي پاراديگمالاردى جاريالاپ, بىرقاتار رەفورمانى باستادى. ۇلتتىق قوعامدىق سەنىم كەڭەسىن قۇرىپ, ۇلتتىق يدەولوگيانىڭ دامۋىنا جاڭا سەرپىن بەردى. ۇلىلارىمىزدى ۇلىقتاپ, ەلدىك, ۇلتتىق قۇندىلىقتاردى الەمگە پاش ەتتى.
پرەزيدەنتىمىز ارقاشان قوعام ءۇشىن وزەكتى دە, كوكەيتەستى وقيعالاردىڭ ورتاسىنان تابىلىپ, الەۋمەتتىك جەلىنىڭ بەلسەندى قولدانۋشىسى رەتىندە جەدەل باعاسىن بەرىپ وتىرادى. رەزونانستى جاعدايلارعا قاتىستى ءوزىنىڭ پوزيتسياسىن ءبىلدىرىپ, مەملەكەتتىڭ نازارىن اۋدارادى. ياعني جاڭا ساياسي مادەنيەتتىڭ قالىپتاسۋىنا جول اشىپ, جاڭا ستاندارتتاردىڭ ورىن الۋىنا ىقپال ەتىپ وتىر. مەملەكەتتى باسقارۋ جۇيەسىنە ەنگىزگەن وسىنداي جاڭاشا فورماتتار ەلباسى باستاعان سارا جولىنىڭ ءارى قاراي دامۋىنا سەرپىن بەرەرى ءسوزسىز.
ادام قۇقىعىن قورعاۋ سالاسىنا بارىنشا كوڭىل اۋدارىپ وتىرعان مەملەكەت باسشىسى ايەلدەر مەن بالالارعا قارسى زورلىق-زومبىلىق, ادام ساۋداسى سىندى قىلمىستاردى قاتاڭداتۋدى تالاپ ەتىپ, الدىن الۋ شارالارىن كۇشەيتتى. تۇرعىنداردىڭ الەۋمەتتىك جاعدايىن جاقسارتۋعا بىرقاتار ءىس-شارا قابىلداپ, ستۋدەنتتەردىڭ شاكىرتاقىلارىنىڭ ارتۋىنا, قىزمەتكەرلەردىڭ جالاقىلارىنىڭ وسۋىنە ىقپالىن تيگىزدى. وسىلايشا مەملەكەتكە دەگەن سەنىمدى ارتتىرىپ, قوعام ىشىندەگى كوزقاراستى وزگەرتتى.
قوعامنىڭ دامۋىنا كەپىلدىك بەرەتىن بىرلىك پەن ىنتىماقتى ساقتاۋ, سونداي-اق ساياسي تۇراقتىلىق پەن بەيبىت قاتار ءومىر ءسۇرۋ مادەنيەتىن قالىپتاستىرۋ جولىندا قاسىم-جومارت كەمەل ۇلى توقاەۆتىڭ اتقارعان قىزمەتى وراسان زور. پرەزيدەنت جانىنداعى كەڭەسشى ورگان بولىپ تابىلاتىن قازاقستان حالقى اسسامبلەياسىنىڭ جۇمىستارىنا تىڭ سەرپىن بەرىپ, ىشكى ساياسي جاعدايدى تۇراقتاندىراتىن ورگانداردىڭ اتقارىپ وتىرعان شارالارىن ودان ءارى كۇشەيتتى. جامبىل وبلىسى قورداي اۋدانىنداعى جاعدايعا بايلانىستى دەر كەزىندە ۇكىمەتتىك كوميسسيا قۇرىپ, قوردالانىپ قالعان بىرقاتار قوعامدىق ماسەلەنىڭ شەشىلۋىنە ىقپال ەتتى. ودان كەيىن رەسمي ساپارمەن اۋداننىڭ تىنىس-تىرشىلىگىمەن تانىسىپ, ەلمەن كەزدەستى. قايتىس بولعانداردىڭ وتباسىلارىنا كوڭىل ايتتى. تىنىشتىق پەن بەيبىتشىلىكتىڭ كەپىلى بولاتىنىن جەتكىزىپ, تولقىعان كوڭىلدەردى جۇباتىپ, حالىقتىڭ سەنىمىنە يە بولدى.
مەملەكەت باسشىسى تاۋەلسىز ەلىمىزدىڭ جاڭا تاريحى مەن تالاي قيىندىقتى ەڭسەرگەن ەلباسىمىز تۋرالى ەستەلىكتەر جازىپ, كىتاپتارى جارىق كورگەن. قازاقستان جانە قازاق قوعامى جاڭا تاريحي كەزەڭنىڭ كۋاسى بولدى. ساياسي ساباقتاستىقتىڭ وزىق ۇلگىسىن كورسەتكەن ەلباسى جانە سول ءداستۇر جالعاستىعىن سارابدال ساياساتكەرلىگىمەن الىپ كەلە جاتقان پرەزيدەنتىمىز مەملەكەتىمىزدى «ماڭگىلىك ەل» يدەياسىنا جەتەلەپ, ابىرويىمىزدى اسقاقتاتىپ, مەرەيىمىمىزدى ءوسىرىپ, جارقىن بولاشاققا قاراي باستاپ وتىر. جاڭا تاريحي كەزەڭ تۋرالى ءالى تالاي جازىلادى. ال سول كەزەڭنىڭ بەلدى كەيىپكەرلەرىنىڭ ءبىرى ءسوزسىز قاسىم-جومارت كەمەل ۇلى توقاەۆ بولاتىنىنا كامىل سەنەمىز. ەلدىڭ قولداۋىمەن, حالىقتىڭ قالاۋىمەن تالاي بەلەستەن وتكەن, تالايدى كورگەن جانە دامۋ جولىنا تۇسكەن مەملەكەتىمىزدىڭ ىرگەسى كۇشەيىپ, بىرلىك جانە ىنتىماق رۋحىمەن الىپ ەلدەردىڭ قاتارىندا بولاتىنىنا ەشقانداي كۇمانىمىز جوق.
جانسەيىت تۇيمەباەۆ,
قازاقستان حالقى اسسامبلەياسى توراعاسىنىڭ ورىنباسارى
