پرەزيدەنتتىڭ باستاماسىمەن ەلدە توتەنشە جاعداي جاريالانۋىنا بايلانىستى دوڭگەلەك ۇستەل 9 ايماقپەن بەينە بايلانىس فورماتىندا ۇيىمداستىرىلدى. وعان دەپۋتاتتارمەن قاتار مەملەكەتتىك ورگان باسشىلارى, ماجىلىسكە كىرمەگەن ساياسي پارتيالار, قوعامدىق جانە مەملەكەتتىك ەمەس ۇيىم مۇشەلەرى, اقپارات قۇرالدارى وكىلدەرى قاتىستى.
العاش بولىپ ءسوز العان ءماجىلىس توراعاسى بۇل قۇجات ەلىمىز ءۇشىن وتە ماڭىزدى ەكەنىن ايتا كەلىپ, مەملەكەت باسشىسى قاسىم-جومارت كەمەل ۇلى توقاەۆ قازاقستان حالقىنا جولداۋىندا ميتينگتەر تۋرالى زاڭدى جەتىلدىرۋ تۋرالى تاپسىرما بەرگەنىن اتاپ ءوتتى. وسىعان وراي, ازىرلەنگەن زاڭ جوباسى قوعامدىق دەڭگەيدە ۇزاق تالقىلانىپ, ءماجىلىس قاراۋىنا ەنگىزىلدى. بۇگىندە جۇمىس توبى بەلسەندى ىسكە كىرىسكەن.
دوڭگەلەك ۇستەلدە زاڭ جوباسىنىڭ حالىق اراسىندا پىكىرتالاس تۋدىرعان نورمالارىنا باسا نازار اۋدارىلدى. ماسەلەن, بەيبىت جينالىستاردى ۇيىمداستىرۋ مەن وتكىزۋ ورىندارىنا قاتىستى سۇراققا كەلگەندە ءماجىلىس سپيكەرى بارلىق دامىعان ەلدەردە ميتينگ, جيىن, شەرۋ, باسقا دا بەيبىت جينالىستاردى وتكىزۋ ءۇشىن ارنايى تالاپ بارىن ايتتى. مىسالى, جينالىستى ۇيىمداستىرۋشىلار ونىڭ ماقساتىن, تاقىرىبىن الدىن الا ايتۋى كەرەك.
بۇل - الەمدىك تاجىريبە. تاقىرىپ توڭىرەگىندە, ادام قۇقىقتارى جونىندەگى ۋاكىل ەلۆيرا ازيموۆا, قازاقستاندا پارلامەنتاريزمدى دامىتۋ قورىنىڭ ءتورايىمى زاۋرەش باتتالوۆا, قۇقىققورعاۋشى ەۆگەني جوۆتيس, قوعام قايراتكەرى مۇحتار تايجان, «قازاقستاننىڭ ازاماتتىق اليانسى» زاڭدى تۇلعالار بىرلەستىگىنىڭ پرەزيدەنتى اسىلبەك قوجاحمەتوۆ جانە باسقا دا قوعام بەلسەندىلەرى ءوز پىكىرلەرىن ورتاعا سالدى. ن.نىعماتۋلين بۇل نورمانى ەكىنشى وقىلىمعا دەيىن پىسىقتاۋ كەرەكتىگىن ايتتى.
زاڭ جوباسىنىڭ پىكىر تۋدىرعان تاعى ءبىر نورماسى, ول - وتىنىشتەر مەن حابارلاندىرۋلاردى قاراۋ مەرزىمىنە بايلانىستى. ۇكىمەتتىك جوبادا ميتينگتەر مەن جينالىستاردى وتكىزۋ ءۇشىن جەرگىلىكتى اتقارۋشى ورگانعا 15 كۇننەن كەشىكتىرمەي, ال ەرەۋىل ۇيىمداستىرۋ ءۇشىن 10 كۇننەن كەشىكتىرمەي حابارلاندىرۋ جىبەرۋ كەرەكتىگى تۋرالى نورما بار. قوعامدىق وكىلدەر بۇل مەرزىمدى قىسقارتۋ تۋرالى پىكىردى العا تارتتى. ءماجىلىس توراعاسى دا وسى پىكىردى قوستاي كەلىپ, ەكىنشى وقىلىمعا دەيىن ناقتىلاۋدى تاپسىردى.
تالقىلانىپ وتىرعان قۇجاتتىڭ جۋرناليستەرگە قاتىستى نورماسىندا دا پىكىر الۋاندىعى بار. ميتينگتى جازىپ, كورسەتۋ ءۇشىن جۋرناليستەرگە قويىلاتىن تىيىمدار مەن مىندەتتەمەلەر ءتىزىمى نارازىلىق تۋدىرعان. ءماجىلىس توراعاسىنىڭ ايتۋىنشا, جۋرناليستەردىڭ قۇقىقتارى مەن مارتەبەسى قورعالۋى كەرەك. سەبەبى, جۋرناليستەردى جان-جاقتى قولداعان كەزدە عانا ەركىن جۇمىس ىستەپ, حالىقتى بارلىق اقپاراتپەن قامتاماسىز ەتە الادى. سول ءۇشىن جۋرناليستەرگە بەيبىت شەرۋگە قاتىسۋمەن قاتار بارلىق اقپاراتقا اشىق جانە تەز قول جەتكىزۋگە مۇمكىندىك جاساۋ كەرەك. دوڭگەلەك ۇستەل بارىسىندا زاڭ جوباسىنىڭ باسقا دا نورمالارىنا قاتىستى وزەكتى سۇراقتار كوتەرىلدى.
ءماجىلىس توراعاسى ايتىلعان پىكىرلەر مەن ۇسىنىستاردىڭ بارلىعى ەكىنشى وقىلىمعا دەيىن جۇمىس توبىندا سارالانىپ, پىسىقتالاتىنىن العا تارتا كەلىپ, حالىققا قاجەتتى, شىنايى جۇمىس ىستەيتىن زاڭ قابىلداۋ قاجەتتىگىن ايتتى.
