دەسەك تە ايتۋلى ۇيىمنىڭ پرەزيدەنتى دانا ۋايت 18 ساۋىردە اقش-تىڭ نيۋ-يورك قالاسىندا جالاۋى جەلبىرەۋگە ءتيىس UFC 249 جارىسىن قالاي دا بەلگىلەنگەن مەرزىمدە وتكىزۋدى كوزدەپ وتىر. سەبەبى, ول ءتۋرنيردىڭ باستى جەكپە-جەگىندە جەڭىل سالماقتىڭ چەمپيوندىق بەلبەۋى ءۇشىن رەسەيلىك حابيب نۇرماگومەدوۆ پەن امەريكالىق توني فەرگيۋسون كۇش سىناسادى.
ەكەۋىنىڭ دە ەسىمدەرى تورتكۇل دۇنيەگە ءماشھۇر. ماسەلەن, 31 جاستاعى داعىستاندىق جىگىتتىڭ وسى سپورت ءتۇرىن سەرىك ەتكەنىنە 12 جىلعا جۋىقتادى. سول ۋاقىت ارالىعىندا 28 كەزدەسۋ وتكىزگەن ول بارلىعىندا باسىمدىق تانىتتى. 18 باسەكەنى مەرزىمىنەن بۇرىن اياقتادى. 2018 جىلدىڭ 7 ساۋىرىندە حابيب ەل ياكۆينتانى ۇپاي سانىمەن ۇتىپ, التىن بەلبەۋدى يەلەندى. كەيىننەن كونور ماكگرەگور مەن داستين پۋارەنى «اۋىرتۋ» جانە «قىلقىندىرۋ» ادىستەرىمەن جەڭىپ, ءوز اتاعىن قورعادى.
36 جاستاعى كاليفورنيا شتاتىنىڭ تۋماسى دا 28 مارتە وكتوگونعا شىعىپ, 25 رەت ۇستەمدىك تانىتتى. 20 كەزدەسۋدە ايقىن باسىمدىققا يە بولدى. سوڭعى رەت توني وسىدان سەگىز جىل بۇرىن مايكل دجونسونعا ەسە جىبەرگەن ەدى. سودان كەيىنگى 12 جەكپە-جەگىنىڭ بارلىعىن ول ءوز پايداسىنا شەشتى.
باق وكىلدەرىنە سۇحبات بەرگەن دانا ۋايت: «ارينە, ءبىز بيلىك تاراپىنان بەلگىلەنگەن بارشاعا ورتاق تارتىپكە مويىنۇسىنامىز. الايدا حابيب نۇرماگومەدوۆ پەن توني فەرگيۋسون اراسىنداعى كەزدەسۋدى ميلليونداعان جانكۇيەر تاعاتسىزدانا كۇتۋدە. سول سەبەپتى دە سول جەكپە-جەكتى اقش-تا بولماسا دا, باسقا ەلدە, تىپتەن كورەرمەنسىز دە وتكىزۋگە ءازىرمىز», - دەپ مالىمدەدى.
