زاڭ جوباسى ونەركاسىپتىك قاۋىپسىزدىك سالاسىنداعى زاڭناما نورمالارىن جەتىلدىرۋ, قاۋىپتى وبەكتىلەردە ونەركاسىپتىك قاۋىپسىزدىك سالاسىنداعى مەملەكەتتىك قاداعالاۋدى جۇزەگە اسىرۋ تيىمدىلىگىن ارتتىرۋعا, ونەركاسىپتىك قاۋىپسىزدىك سالاسىندا جۇمىس ىستەۋگە تارتىلاتىن اتتەستاتتالعان جانە اپاتتىق-قۇتقارۋ جۇمىستارىن جۇرگىزۋ بويىنشا قىزمەت كورسەتەتىن ۇيىمدار قىزمەتىن رەتتەۋگە, قولدانىستاعى زاڭناماداعى ولقىلىقتاردى جويۋعا باعىتتالعان.
كەز كەلگەن كاسىپورىننىڭ قاۋىپسىزدىگىن قامتاماسىز ەتۋدىڭ نەگىزى -قاۋىپسىزدىك تەحنيكاسى جانە تەحنولوگيالىق پروتسەستەردى جۇرگىزۋ بويىنشا بارلىق بەلگىلەنگەن نورمالار مەن نۇسقاۋلاردى ساقتاۋ. ايتالىق, شيكىزاتتى قويماعا قويۋ نەمەسە جانعىش زاتتاردى ساقتاۋدىڭ بەلگىلەنگەن ەرەجەلەرىنىڭ بۇزىلۋى, تەحنيكاعا ساپاسىز قىزمەت كورسەتۋ سياقتى جاعدايلار وقىس وقيعاعا اپارىپ سوعۋى مۇمكىن. سالادا اتقارىلعان جۇمىستارعا جانە قاداعالاۋ شارالارىنىڭ جوعارى كورسەتكىشتەرىنە قاراماستان, تالداۋ قورىتىندىcى ەلىمىزدە ونەركاسىپتىك قاۋىپسىزدىكتىڭ جاي-كۇيى ايتارلىقتاي كۇردەلى ەكەنىن كورسەتتى. 2019 جىلى 28 اپات ورىن الدى, بۇل 2018 جىلمەن سالىستىرعاندا 1 وقىس وقيعاعا كوپ. اپات سالدارىنان 24 ادام زارداپ شەكتى, ونىڭ ىشىندە 11 ادام كوز جۇمسا, 7 ادام اۋىر جاراقاتتانىپ, 6 ادام جەڭىل دارەجەدە جاراقات العان.
تەكسەرۋ اكتىلەرىنە سايكەس جازاتايىم وقيعالاردىڭ نەگىزگى سەبەبى ەسكىرگەن, مورالدىق جانە فيزيكالىق تۇرعىدان توزعان, قىزمەتتىڭ نورماتيۆتىك مەرزىمىن وتەگەن جابدىقتاردى پايدالانۋ بولىپ وتىر. تىركەلگەن وقىس وقيعالاردىڭ تاعى ءبىر سەبەبى - ونەركاسىپتىك قاۋىپسىزدىك تالاپتارى مەن ەرەجەلەرىن بۇزۋ. ۇشىنشىدەن, وندىرىستىك باقىلاۋدىڭ ازدىعى, يا بولماسا تىپتەن جۇرگىزىلمەۋى جانە قىزمەتكەرلەر بىلىكتىلىگىنىڭ تومەندىگى.
جۇمىس توبىنا قاتىسۋشىلاردىڭ پىكىرىنشە, زاڭ جوباسى ازاماتتاردى زياندى اسەردەن قورعاۋ دەڭگەيىن ارتتىرۋعا جانە وندىرىستىك جاراقاتتانۋدى تومەندەتۋگە مۇمكىندىك بەرەدى. سونداي-اق اتتەستاتتالعان ۇيىمدار مەن اپاتتىق-قۇتقارۋ قىزمەتتەرى جۇمىسىنا پروفيلاكتيكالىق قاداعالاۋ جۇرگىزۋ شەڭبەرىندە قۇقىق بۇزۋشىلىقتاردىڭ الدىن الۋ كوزدەلگەن.
بۇل تۇزەتۋلەر قاۋىپتى وندىرىستىك وبەكتىلەردە ونەركاسىپتىك قاۋىپسىزدىكتى قامتاماسىز ەتۋ جۇيەسىنىڭ تيىمدىلىگىن ارتتىرۋعا مۇمكىندىك بەرەدى.
