ايماقتار • 16 ناۋرىز، 2020

تۇركىستان: ينفەكتسيانىڭ تارالۋىنا جول بەرمەۋ ءۇشىن جوعارى دەڭگەيدەگى رەجيم ەنگىزىلدى

58 رەتكورسەتىلدى

تۇركىستان وبلىسىندا پرەزيدەنت جارلىعىن جۇزەگە اسىرۋ بويىنشا قاۋلى قابىلدانىپ، بىرقاتار شارالار جۇزەگە اسىرىلا باستادى. وبلىس اۋماعىندا ينفەكتسيانىڭ تارالۋىنا جول بەرمەۋ ءۇشىن جوعارى دەڭگەيدەگى دايىندىق رەجيمى ەنگىزىلدى.

بارلىق جۇمىس ورىندارىندا قىزمەتكەرلەردىڭ دەنە تەمپەراتۋراسىن ولشەي وتىرىپ، قىزۋى كوتەرىلگەن جاعدايدا، مىندەتتى تۇردە جۇمىستان شەتتەتىلەدى. جەرگىلىكتى جەرلەردە ءىرى ساۋدا ورىندارى مەن ويىن-ساۋىق ورتالىقتارى، كينوتەاتر، تەاتر جانە وزگە دە ادام كوپ شوعىرلاناتىن ورىندار قىزمەتتەرىن توقتاتپاق. سونداي-اق وبلىس اكىمى ومىرزاق شوكەەۆتىڭ تاپسىرماسى بويىنشا مەرەكەلىك، سپورتتىق، مادەني ءىس-شارالارمەن قاتار، وتباسىلىق تويلار مەن قوناقاسى وتكىزۋگە تىيىم سالىنادى. الەۋمەتتىك ينفراقۇرىلىم نىساندارىن سانيتايزەرلەرمەن جانە انتيسەپتيكتەرمەن قامتاماسىز ەتۋ، كوروناۆيرۋستىڭ الدىن الۋ جونىندەگى جادىناما تاراتۋ جۇمىستارى جۇرگىزىلەدى.  مەملەكەتتىك قورعاۋعا الىنعان جانە حالىقتىڭ كۇنكورىسى مەن كولىكتەردىڭ جۇمىس ىستەۋىن قامتاماسىز ەتەتىن نىسانداردى قورعاۋدى كۇشەيتۋ، ادام كوپ جينالاتىن ەسكە الۋ شارالارىن شەكتەۋ جونىندە تۇسىندىرمە جۇمىستارىن جۇرگىزۋ، الەۋمەتتىك ماڭىزى بار ازىق-ت ۇلىك باعاسىن تۇراقتاندىرۋ ءىسى دە وبلىس اكىمىنىڭ نازارىندا بولادى.  

1

بارلىق مەديتسينالىق ۇيىمدارعا كوروناۆيرۋسقا قارسى شارالاردى كۇشەيتۋ تاپسىرىلدى. قوعامدىق كولىكتەر ءار اينالىمداعى سوڭعى ايالدامادا دەزينفەكتسيالىق قۇرالدارمەن جۋىلىپ، ولاردىڭ جۇرگىزۋشىلەرى انتيسەپتيكتەر مەن تىنىس الۋ ورگاندارىن قورعايتىن قۇرالدارمەن قامتاماسىز ەتىلۋى ءتيىس. تۇركىستان وبلىسى بويىنشا مەملەكەتتىك كىرىستەر دەپارتامەنتىندە «قازىعۇرت»، «جىبەك جولى»، «قاپلانبەك»، «سارىاعاش ستانساسى»، «باۋىرجان قونىسباەۆ» جانە «اتامەكەن» شەكارالىق كەدەن بەكەتتەرى بار. بۇگىنگى تاڭدا بارلىق كەدەن بەكەتتەرى شتاتتىق رەجيمدە جۇمىس ىستەۋدە. شەكارالىق وتكىزۋ پۋنكتتەرىندە دەزينفەكتسيالىق جۇمىستار جۇرگىزىلەدى. سانيتارلىق دارىگەرلەر عيماراتتاردى تازارتادى. بۇل جۇمىستار شامامەن 2 ساعاتقا جالعاسادى جانە وسى ۋاقىتتا وتكىزۋ پۋنكتتەرى جابىلادى. زالالسىزداندىرۋ جۇمىستارىن ءار اپتانىڭ سارسەنبى جانە بەيسەنبى كۇندەرى جۇرگىزۋ جوسپارلانعان. قازىر كەدەندە توتەنشە جاعدايدىڭ جاڭا دەڭگەيى جاريالانعان. سانيتارلىق باقىلاۋ تاۋلىك بويى جۇرگىزىلۋدە. وڭىرگە قىتايدان جانە باسقا شەتەلدەردەن كەلگەندەر سانيتارلىق ەپيدەميولوگتار مەن شەكاراشىلاردىڭ ارنايى باقىلاۋىنان وتەدى.

 

تۇركىستان وبلىسى

سوڭعى جاڭالىقتار

ۇقساس جاڭالىقتار