قاراعاندى وبلىستىق دەنساۋلىق ساقتاۋ باسقارماسى بەرگەن رەسمي اقپاراتقا سۇيەنسەك, كەشەگى كۇنگە دەيىن وڭىردە كوروناۆيرۋس ىندەتىن جۇقتىرعان ءبىر دە ءبىر ادام تىركەلمەگەن. تەك, كۇدىككە ىلىككەن 34 ادام ستاتسيونارلىق كارانتينگە جاتقىزىلىپتى. دارىگەرلەردىڭ ايتۋىنشا, ولاردىڭ حال-جاعدايلارى جامان ەمەس ەكەن, قۇدايعا شۇكىر, اۋرۋدىڭ بەلگىلەرى انىقتالماعان.
ماماندار كارانتين دەگەننىڭ ءوزىنىڭ بىرنەشە بولىكتەن تۇراتىنىن ايتادى. ماسەلەن, ۆيرۋس جۇقتىرعان اداممەن قانداي دا ءبىر بايلانىستا بولعان نەمەسە يران مەن يتاليا سياقتى 1ا ساناتىنا جاتاتىن ەلدەردەن كەلگەن ازاماتتار تاۋلىك بويعى باقىلاۋعا الىناتىن كورىنەدى.
قازىرگى تاڭدا ستاتسيونارلىق كارانتيندە جاتقان قاراعاندىلىقتاردىڭ بارلىعى يتاليادان ۇشاقپەن بىرگە ۇشىپ كەلگەندەر ەكەن. اۋرۋحانالاردا ولار ءۇشىن جاڭا جيھازدار مەن توسەك ورىندارى الىنعان. پالاتالار قول جۋعىش, سابىن, سانيتايزەر, انتيسەپتيكپەن جانە باسقا دا قاجەتتى زاتتارمەن تولىق قامتاماسىز ەتىلىپتى. ال ىشىندە دارەتحاناسى جوق پالاتادا جاتقاندار تىسقا مەديتسينالىق قىزمەتكەرلەردىڭ باقىلاۋىمەن كەستە بويىنشا شىعىپ تۇرادى.
وبلىستىق دەنساۋلىق ساقتاۋ باسقارماسى مەن وڭىردەگى ەڭ ءىرى ءدارىحانالار جەلىسى بار «بيوسفەرا» كومپانياسى اراسىندا كەلىسىم جاسالىپ, سونىڭ ناتيجەسىندە كاسىپورىن وبلىس تۇرعىندارى ءۇشىن 300 مىڭ مەديتسينالىق ماسكا ساتىپ الىپتى. كومپانيا ەلىمىزدە جاسالعان بۇل ونىمدەردى ۇستىنە ءبىر تيىن دا قوسپاي, ارقايسىن 130-140 تەڭگە ارالىعىنداعى باعاعا ساتاتىن بولدى. سونداي-اق جەرگىلىكتى «مەرەي» كومپانياسى دا ماسكا جاساپ, الەۋمەتتىك ءدارىحانالاردى بەتپەردەمەن قامتاماسىز ەتىپ جاتىر.
ايتا كەتۋ كەرەك, قاراعاندىدا ۆيرۋسولوگيالىق زەرتحانا جۇمىس ىستەيدى. ەگەر دە ءبىز ءسوز قىلىپ وتىرعان ىندەتكە ءتان قانداي دا ءبىر بەلگى انىقتالاتىن بولسا, وندا ونداي ناۋقاس كوروناۆيرۋستىق تەست جۇيەسىنەن وتكىزىلەدى. ياعني, كۇدىك تۋدىرعان ادامنىڭ جۇتقىنشاعى مەن مۇرىن قۋىسىنان جۇعىندى الىنىپ, ول زەرتحانادا تەكسەرىلەدى. ال تەكسەرۋ قورىتىندىسى كۇمان تۋدىرارلىق بولسا, وندا اناليز بىردەن نۇر-سۇلتان قالاسىنداعى ساراپتامالىق زەرتحاناعا جىبەرىلەدى.
قازىرگى تاڭدا وبلىستاعى مەديتسينالىق قىزمەتكەرلەر قاشىقتان وقىتۋ تارتىبىنە كوشىرىلگەن, ولار كۇن سايىن سەلەكتورلىق رەجىمنەن ءوتىپ تۇرادى. الدا-جالدا اۋرۋدىڭ وشاعى شىعا قالعان جاعدايلار بولىپ جاتسا, ول جەرلەرگە جەدەل جەتەتىن بريگادالار دا جاساقتالعان. سونداي-اق وبلىستا ناۋقاستاردى تاسىمالداۋعا ارنالعان ەكى ارنايى كاپسۋلا دا بار ەكەنىن ايتا كەتكەن ءلازىم.
وبلىستىق دەنساۋلىق ساقتاۋ باسقارماسىنىڭ باسشىسى ەرجان نۇرلىباەۆتىڭ ايتۋىنشا, ازىرگە وڭىردەگى ەمحانالار قالىپتى رەجىمدە جۇمىس ىستەپ تۇر. ەگەر وتىنىشتەر كوبەيەتىن جاعداي تۋىنداي قالاتىن بولسا, دارىگەرلەر ادامداردى دەمالىسسىز قابىلداۋعا ساقاداي ساي ەكەن. بۇگىنگى كۇندە ستاتسيونارلاردا ناۋقاستارمەن كەزدەسۋگە ۋاقىتشا شەكتەۋلەر قويىلعان. مىسالى, ەگدە ادامدارعا ەمحانالارعا بارۋدىڭ قاجەتى جوق, ولارعا ءتيىستى ءدارى-دارمەكتەردى دارىگەرلەردىڭ وزدەرى تۇرعىلىقتى جەرلەرىنە جەتكىزىپ بەرەدى.
وڭىردە ءدارى-دارمەك جاعىنان دا تاپشىلىق جوق دەگەندى ايتتى ۆەدومستۆو باسشىسى. وبلىستىق دەنساۋلىق ساقتاۋ باسقارماسى الداعى ەكى ايعا جەتەتىن ءدارى-دارمەك ساتىپ العان.
جامان ايتپاي, جاقسى جوق, ەگەر ۆيرۋس جۇقتىرعاندار سانى كوبەيەتىن بولسا, بۇل تىعىرىقتان شىعۋدىڭ امالى دا قاراستىرىلىپ قويىلعان ەكەن. مىسالى, ءوڭىردىڭ ءىرى كاسىپورىندارى قاجەت بولعان جاعدايدا قالا سىرتىندا ورنالاسقان وزدەرىنە تيەسىلى شيپاجايلار مەن ساۋىقتىرۋ ورىندارىن كارانتين ۇيىمداستىرۋعا بەرەتىن بولعان.
دارىگەر ماماندار كوروناۆيرۋس سياقتى سۋماقاي اۋرۋعا قارسى تۇراتىن كۇشتىڭ ءبىرى ادامنىڭ سالاۋاتتى ءومىر سالتىن ساقتاۋى دەگەندى ايتادى. ناقتىراق ايتقاندا, دۇرىس تاماقتانىپ, ءتانىن سەرگەك قالپىندا ساقتاپ جۇرەتىن ادامداردىڭ كەز كەلگەن كەسەلمەن كۇرەسەتىن يممۋنيتەتى كۇشتى بولادى ەكەن. سونان سوڭ, ارينە, جەكە باستىڭ تازالىعىن ەستەن ءبىر ءسات تە شىعارۋعا بولمايدى.
مىنە, وسى جانە جوعارىدا ايتىلعان ساقتىق ءىس-شارالارى تولىقتاي ساقتالعاندا عانا اتىڭ وشكىر ىندەتتى ەل ىشىنە تاراتپاي, ىنىندە تۇنشىقتىرۋعا مۇمكىندىك تۋار ەدى دەگەندى ايتادى دارىگەر ماماندار.
