جيىن بارىسىندا ءبىلىم جانە عىلىم ءمينيسترى اسحات ايماعامبەتوۆ قابىلداعان شارالارى تۋرالى اڭگىمەلەدى.
«مەكتەپ دەمالىسى 16 ناۋرىزدان باستاپ 5 ساۋىرگە دەيىن ەرتە كەزەڭگە اۋىستىرىلدى. ەگەر قاجەتتىلىك تۋىنداسا, 5 ساۋىردەن كەيىن مەكتەپتەر قاشىقتىقتان وقىتۋعا دايىن بولادى. مۇعالىمدەردىڭ بىلىكتىلىگىن ارتتىرۋ كۋرستارى مۇمكىندىگىنشە قاشىقتىقتان وقىتۋ فورماتىنا اۋىستىرىلادى, ونلاين-فورماتقا اۋىسۋ مۇمكىندىگى بولماعان جاعدايدا بەلگىسىز مەرزىمگە كەيىنگە قالدىرىلادى. كوللەدجدەر مەن جوعارى وقۋ ورىندارى قاشىقتىقتان وقۋعا كوشىرىلەدى. بىرقاتار جوعارى وقۋ ورىندارى, ناقتىراق ايتساق, ولاردىڭ 30 پايىزى 13 ناۋرىزدان باستاپ ونلاين-فورماتقا كوشتى. جالپى, وقۋدى ونلاين رەجىمگە اۋىستىرۋ جوعارى وقۋ ورىندارىندا قيىندىق تۋدىرمايدى. الايدا بارلىق كوللەدجدەردىڭ قاشىقتىقتان وقىتۋ ءۇشىن قاجەتتى بازاسى جوق. قازىر قاجەتتى بازانى ەنگىزۋ بويىنشا جۇمىستار جۇرگىزىلۋدە. سونىمەن قاتار, قونىس اۋدارۋ مۇمكىندىگى بولماعان جاعدايدا ستۋدەنتتەرگە جاتاقحانادا قالۋعا قۇقىق بەرىلەدى. الايدا بەلگىلى ءبىر رەجىم ورناتىلۋى ءتيىس, بارلىق ءىس-شارالار توقتاتىلادى. بالالار ۇيلەرى بويىنشا بۇرىنعى جۇمىس رەجىمى ساقتالادى, بىراق سىرتقى بايلانىستار قاتاڭ شەكتەلگەن», دەدى ول.
ەڭبەك جانە حالىقتى الەۋمەتتىك قورعاۋ مينيسترلىگى ەڭبەك, الەۋمەتتىك قورعاۋ جانە كوشى-قون كوميتەتىنىڭ توراعاسى ەربول نۇرعاليەۆ جۇمىس قىزمەتىن توقتاتا تۇرۋ نەمەسە كارانتيندە بولۋ ۋاقىتىنا ەڭبەكاقى تولەۋ نورمالارى تۋرالى ايتتى.
«باس مەملەكەتتىك سانيتارلىق دارىگەردىڭ قاۋلىسىنا سايكەس, مەديتسينالىق مەكەمەگە نەمەسە ءۇي وقشاۋلاعىشىنا قاراماستان كارانتيندەگى بارلىق قىزمەتكەرلەرگە اۋرۋحانالىق پاراقتار بەرىلەدى. تولەم جاردەماقى, ەڭبەككە ۋاقىتشا جارامسىزدىققا سايكەس جۇرگىزىلەدى. ءوندىرىستىڭ ۋاقىتشا توقتاتىلۋىنا بايلانىستى تولەماقى جونىندە ايتار بولسام, 13 ناۋرىزدان باستاپ بۇقارالىق ءىس-شارالاردى وتكىزۋگە تىيىم سالىندى. سونىڭ ىشىندە سوو جانىنداعى كينوتەاترلار مەن بالالاردىڭ ويىن الاڭدارى جابىلدى. وسىعان بايلانىستى, كەيبىر جۇمىس بەرۋشىلەر قىزمەتكەرلەرىن جۇمىستان بوساتۋعا ءماجبۇر. ەڭبەك كودەكسىنىڭ 112-بابىنا سايكەس بەلگىلى سەبەپتەرگە بايلانىستى ۋاقىتشا جۇمىسىن توقتاتقان مەكەمە جۇمىس بەرۋشى مەن قىزمەتكەرگە جالاقىنىڭ ەڭ تومەنگى مولشەرىن بەلگىلەيدى. ەگەر بۇل شارا ەڭبەك نەمەسە ۇجىمدىق شارتتا قاراستىرىلعان بولسا, تولەم جوعارى بولۋى مۇمكىن», دەدى ول.
