ۇستاۋ كەزىندە كۇدىكتىنىڭ بويىنان جانە ۇيىنەن 500 گراممداي سينتەتيكالىق ەسىرتكى تابىلدى جانە ءوزى دە ەسىرتكى شەگىپ العانى انىقتالعان. بۇل وتە ۇلكەن كولەم دەپ باعالانادى. 28 جاسار قىزىلجارلىقتىڭ ەسىرتكى ساتۋمەن اينالىسۋى ءبىرىنشى رەت ەمەس ەكەن. پەتروپاۆل قالالىق پد ەسىرتكىگە قارسى كۇرەس ءبولىمىنىڭ باستىعى راحات نۇراحمەتوۆتىڭ ايتۋىنا قاراعاندا ول بۇرىن دا وسىنداي قىلمىس جاساعانى ءۇشىن ۇستالعان. «ونىڭ قاماۋدان شىققانى بىلتىرعى كوكتەمدە عانا بولعان ەدى, ەندى تاعى دا سول قىلمىسپەن اينالىسىپ وتىر. قازىر ول ۋاقىتشا وقشاۋلاۋ يزولياتورىنا قامالدى», دەدى ول.
بىرنەشە گرامم ەسىرتكى كۇدىكتىنى الىپ جۇرگەن تاكسيدىڭ سالونىنان دا تابىلعان. جوعارىدا ايتىلعان كولەمنىڭ نەگىزگى بولىگى ءۇيدى ءتىنتۋ بارىسىندا تابىلعان. سونىمەن بىرگە ۇيدە سينتەتيكالىق ەسىرتكىنى دايىندايتىن كونتسەنترات, ەلەكتروندى تارازى, ورايتىن جىلتىر قاعاز تابىلعان.
مۇنداي قىلمىستاردى انىقتاۋ مەن ۇستاۋ پوليتسيا قىزمەتكەرلەرى ءۇشىن بىرنەشە اي بويعى تالماس ەڭبەكتى تالاپ ەتەدى. وتكەن بەيسەنبىدە ولار ءوز ەڭبەكتەرىنىڭ ۇلكەن ناتيجەسىنە قول جەتكىزىپ, ەسىرتكى جاساۋمەن جانە ساتۋمەن اينالىسقان جوعارىدا ايتىلعان كۇدىكتىنى قولعا ءتۇسىردى. ايتا كەتەتىن بولساق, وتكەن كۇزدە ولار اققايىڭ اۋدانىندا ەسىرتكى جاساۋ زەرتحاناسىن دا تاپقان. ال بيىلعى جىلدىڭ باسىنان 37 ناشاقوردى ۇستاپ وتىر. ولاردىڭ بويىنان جانە تۇراتىن جەرلەرىنەن 1400 گرامم ەسىرتكىلىك زاتتار تابىلعان.
سولتۇستىك قازاقستان وبلىسى
