سونداي-اق بيىل تەاترلاردا ءال-ءفارابيدىڭ 1150, ا.قۇنانباي ۇلىنىڭ 175 جىلدىق مەرەيتويلارىنا وراي جاڭا سپەكتاكلدەردىڭ پرەمەرالارى حالىق نازارىنا ۇسىنىلادى. اتالعان مەرەيتويلارعا بايلانىستى ءساۋىر ايىندا «تەاتر كوكتەمى-2020» كاسىبي تەاترلاردىڭ فەستيۆالى مەن «حالىقتىق» اتاعى بار تەاترلاردىڭ بايقاۋىن وتكىزۋ جوسپارلانعان. ش.قالداياقوۆتىڭ 90 جىلدىعىنا وراي «باقىت قۇشاعىندا» اتتى رەترو-فەستيۆالىن, ء«ان ەركەسى» مەرەكەلىك كونتسەرتى, «مەنىڭ قازاقستانىم» وبلىستىق ءان بايقاۋى جانە بارلىق اۋدان, قالالاردا 80-گە جۋىق ءىس-شارا وتكىزۋ دە بيىلعى جوسپارعا ەنگەن. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق مادەنيەت باسقارماسى باسشىسىنىڭ مىندەتىن اتقارۋشى ءازىمحان قويلىباەۆ مالىمدەدى.
جوسپارلانعان ءىس-شارالاردىڭ جۇزەگە اسۋى, ارينە, الەمگە تاراپ جاتقان ۆيرۋسقا قاتىستى شەكتەۋلەرگە دە تاۋەلدى. دەگەنمەن بۇگىندە انيماتسيالىق فيلمدەردى كوپتەپ ۇسىنا باستاعان وڭىردە بيىل ءال-ءفارابيدىڭ 1150 جىلدىعىنا وراي «تۇركىستان قۇپيالارى» دەرەكتى ءفيلمىن جانە اباي قۇنانباي ۇلىنىڭ 175 جىلدىعى اياسىندا انيماتسيالىق فيلمدەردى ءتۇسىرۋ جوسپارلانىپ وتىر.
وبلىستا تۇسىرىلگەن «كۇش اتاسى − قاجىمۇقان», «كيەلى قازىعۇرت», «وتىراردى قورعاۋ» انيماتسيالىق فيلمدەرى مەن «كونە جەتىگەننىڭ سىرى» تەلەسەريالى وبلىستىڭ بارلىق اۋدانى مەن قالالارىندا جانە جەرگىلىكتى تەلەارنالار مەن «حابار», «اسىل ارنا» تەلەارنالارىنان كورسەتىلگەن بولاتىن. بۇگىنگى تاڭدا وبلىستا 679 مادەنيەت جانە ونەر مەكەمەسى حالىققا قىزمەت كورسەتەدى.
تۇركىستان وبلىسى
