شىمكەنت قالاسىندا 2013-2014 وقۋ جىلى قارساڭىندا «ساپالى ءبىلىم مەن تاربيە بەرۋ – قازاقستاننىڭ مەملەكەتتىك ساياساتىنىڭ باسىمدىعى» تاقىرىبىندا ءبىلىم بەرۋ قىزمەتكەرلەرىنىڭ پەداگوگيكالىق تامىز كەڭەسى ءوتتى. بۇل تۋرالى وبلىس اكىمىنىڭ ءباسپاسوز قىزمەتى حابارلادى.
كەڭەس اشىلۋى الدىندا وبلىستىق ءبىلىم باسقارماسىنىڭ اتقارعان جۇمىستارى تۋرالى بەينە-روليك كورسەتىلىپ, جينالعاندار وتكىزىلگەن ءىس-شارالار بارىسىمەن تانىستىرىلدى. كەڭەس وبلىستىق ءبىلىم باسقارماسىنىڭ باسشىسى البينا ەلشيەۆانىڭ وبلىس ۇستازدارىن جاڭا وقۋ جىلىمەن قۇتتىقتاۋمەن باستالىپ, كەڭەس بارىسىندا وتكەن جىلعى اتقارىلعان جۇمىستارعا تالداۋ جاسالدى جانە جاڭا وقۋ جىلىندا العا قويعان مىندەتتەر سارالاندى.
كەڭەسكە قالا, اۋدان اكىمدەرىنىڭ ءبىلىم سالاسى بويىنشا ورىنباسارلارى, اۋداندىق, قالالىق ءبىلىم بولىمدەرىنىڭ مەڭگەرۋشىلەرى, وبلىس ءبىلىم سالاسىنداعى باقىلاۋ دەپارتامەنتى, وبلىستىق بالالاردىڭ قۇقىقتارىن قورعاۋ باسقارماسى, «ورلەۋ» ينستيتۋتىنىڭ باسشىلارى, ءبىلىم سالاسى قىزمەتكەرلەرى مەن بۇقارالىق اقپارات قۇرالدارى وكىلدەرى, بارلىعى 500-دەي ادام قاتىستى.
ءماجىلىستىڭ كۇن ءتارتىبى بويىنشا ءبىلىم سالاسى قىزمەتكەرلەرىنىڭ باياندامالارى وقىلىپ, جارىسسوزگە شىقتى. كەلەسى كەزەكتە وڭتۇستىكتىڭ جەمىستى ەڭبەك ەتكەن ۇستازدارى, باسشىلارى مەن زەينەتكەر ۇستازدارىن ءبىلىم جانە عىلىم مينيسترلىگى ۇلتتىق تەستىلەۋ ورتالىعىنىڭ ديرەكتورى قالي ابديەۆ «قر ءبىلىم بەرۋ ءىسىنىڭ قىزمەتكەرى» جانە «ى.التىنسارين» ءتوس بەلگىسىمەن, وڭتۇستىك قازاقستان وبلىسى اكىمىنىڭ ورىنباسارى ساكەن قانىبەكوۆ وڭتۇستىك قازاقستان وبلىس اكىمىنىڭ «قۇرمەت گراموتالارىمەن», وبلىستىق ءماسليحاتتىڭ حاتشىسى قۇدايبەرگەن ەرجان ءبىلىم جانە عىلىم مينيسترلىگىنىڭ «العىس حاتىمەن», وبلىستىق ءبىلىم باسقارماسى باسشىسى البينا ەلشيەۆا ءبىلىم جانە عىلىم مينيسترلىگىنىڭ «قۇرمەت گراموتالارىمەن» ماراپاتتاپ, ارنايى قۇتتىقتادى. سونداي-اق, كەڭەس بارىسىندا ءبىلىم سالاسىندا ۇزاق جىلدار بويىنا قىزمەت جاساپ, زەينەتكەرلىككە شىققان ۇستازدارعا ەستەلىك سىيلىقتار تاپسىرىلدى.
مۇرات ايتقوجا.
