كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ حاتشىسى سافينوۆ قاناتبەك دوڭگەلەك ۇستەلدى اشا كەلىپ, بۇگىنگى كۇنى ەلىمىزدە قۇقىقتىق داۋلاردى سوت ارقىلى شەشۋگە باسا نازار اۋدارىلاتىنىن اتاپ ءوتتى.
«بۇگىن سوتتاردا قارالاتىن ىستەردىڭ كوبەيۋى, ءبىر جاعىنان, سوتقا دەگەن سەنىم دارەجەسى جوعارى ەكەنىن بىلدىرەدى, ەكىنشى جاعىنان, بۇل قوعامداعى قاراما-قايشىلىقتىڭ كوپتىگىنىڭ بەلگىسى. قازىرگى تاڭدا سوت قاراۋىندا بولماۋى ءتيىس ىستەر كوبەيۋدە», - دەدى ق.سافينوۆ.
ازاماتتىق ىستەر جونىندەگى سوت القاسىنىڭ سۋدياسى ۇلبوسىن سۇلەيمەنوۆا ءوز سوزىندە قازاقستاندا 90-نان استام مەدياتورلار ۇيىمى جۇمىس ىستەيتىنىن ايتتى جانە ەلىمىزدە مەدياتسيا ينستيتۋتىن دامىتۋ قازاقستان حالقى اسسامبلەياسى جۇمىسىنداعى جاڭا باعىتتاردىڭ ءبىرى ەكەنىن اتاپ ءوتتى. ۇ.سۇلەيمەنوۆا سونىمەن قاتار «مەدياتسيا تۋرالى» زاڭنىڭ كەيبىر باپتارىنا بىرقاتار تۇزەتۋدى, سونداي-اق جەر, نەكە (ەرلى-زايىپتىلىق) جانە وتباسى تۋرالى, ازاماتتىق ءىس جۇرگىزۋ, ەڭبەك كودەكستەرىنە وزگەرىستەردى قاراستىرۋدى ۇسىندى. ولاردىڭ اراسىندا وتباسى مەن نەكە ينستيتۋتىن نىعايتۋعا ىقپال ەتەتىن راسىمدەر دە بار.
«نەكەنى بۇزۋ تۋرالى ىستەر جونىندەگى قولدانىستاعى رەداكتسيا بويىنشا سوتقا ارىز قابىلدانعان ساتتەن باستاپ 1 اي وتكەنشە سوت ەش ارەكەت جاسامايدى. تاراپتار وتباسىن ساقتاپ قالۋدى تاعى دا ويلاستىرۋ ءۇشىن بۇل مەرزىمدى 3 ايعا دەيىن ۇزارتۋ ۇسىنىلادى», - دەدى ول.
اقپارات جانە قوعامدىق دامۋ ءمينيسترىنىڭ ورىنباسارى دانيار ەسين مەدياتسيا ينستيتۋتىن كەڭىنەن دامىتۋ مەن قولدانىلۋىن تەجەيتىن ماسەلەلەر تۋرالى ايتتى. ونىڭ ىشىندە مەدياتسيا راسىمدەرى تۋرالى حالىقتىڭ حاباردارلىعى ءارى ولارعا دەگەن سەنىمنىڭ تومەندىگى, ءتيىستى ۇيىمداردىڭ كاسىبي مەدياتورلاردى دايارلاۋ ساپاسىنا مەملەكەت تاراپىنان باقىلاۋدىڭ بولماۋى تۋرالى دا ايتىلدى.
«ۇلتتىق مەدياتورلار پالاتاسى» رەسپۋبليكالىق قوعامدىق بىرلەستىگىنىڭ باسقارما توراعاسى سۆەتلانا رومانوۆسكايا قازاقستانداعى مەدياتسيانى جەتىلدىرۋ تۋرالى ايتا كەلىپ, جوعارى وقۋ ورىندارىندا وقىتۋدىڭ ءتيىستى ستاندارتتارىن ازىرلەۋ جانە «مەدياتور» ماماندىعىن مەملەكەتتىك ماماندار تىزىلىمىنە ەنگىزۋدى ۇسىندى. سونىمەن قاتار ول تۇتىنۋشىلار قۇقىعىن قورعاۋدا, ەڭبەك جانە وتباسىلىق داۋلاردا مەدياتسيانىڭ مىندەتتى بولۋى ماڭىزدى ەكەنىن اتاپ ءوتتى.
«قازاقستان مەدياتورلار قاۋىمداستىعى» زاڭدى تۇلعالار بىرلەستىگىنىڭ باس ديرەكتورى ءجاندىلدا جاقىپوۆ ەلىمىزدە مەدياتسيا ينستيتۋتى جۇيەسىز دامىپ كەلە جاتقانىن, مەدياتورلار ۇيىمدارىنىڭ سانى كوپتىگى مەن ولاردىڭ اراسىندا بىرىڭعاي ۇيلەسىم جوقتىعىن ايتا كەلىپ, رەتتەۋشى ورگان قۇرۋدى ۇسىندى.
كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى ۆلاديمير ۆولكوۆ وتىرىستى قورىتىندىلاي كەلىپ, ەلىمىزدە ۇلتتىق زاڭنامانىڭ دامۋىنا بايلانىستى حالىقارالىق تاجىريبەنى نازارعا الا وتىرىپ, تاتۋلاسۋدىڭ مەدياتسيا سەكىلدى ءتۇرى قازاقستان جاعدايىندا ومىرگە قايتا ەنگەنىن اتاپ ءوتتى.
«وسى سالا ءۇشىن حالىقارالىق تاجىريبە, ءتيىمدى دامۋ تاسىلدەرى جەتكىلىكتى جانە ءوز تاجىريبەمىز دە بار. ءبىزدىڭ ءومىر سالتىمىزعا, مادەنيەتىمىز بەن وي-ورىسىمىزگە ەڭ جاقىنىن قابىلداۋ عانا قالىپ وتىر. كاسىبي تۇرعىدا جان-جاقتى زەردەلەۋ جانە ءوزارا تىعىز ءىس-قيمىلدىڭ ارقاسىندا عانا ناتيجەگە قول جەتكىزەتىنىمىز ءارى مەدياتسيا ينستيتۋتى قازاقستاننىڭ قۇقىقتىق كەڭىستىگىندە ءوز ورنىن الاتىنىنا كۇمان جوق», - دەپ اتاپ ءوتتى ۆ.ۆولكوۆ.
