ەلباسىنىڭ تاپسىرماسىنا سايكەس Nur Otan پارتياسى الداعى 5 جىلدا ءار وبلىس, اۋدان مەن ەلدى مەكەندى دامىتۋ بويىنشا ارنايى ۇسىنىستار ازىرلەۋدە. پارتيانىڭ 216 ايماقتىق باعدارلاماسىندا ايماقتاردىڭ جەرگىلىكتى ەرەكشەلىكتەرىن ەسكەرە وتىرىپ, قاجەتتىلىكتەرى مەن ماسەلەلەرى كورىنىس تابۋى ءتيىس ءارى ولاردى شەشۋدىڭ ناقتى جولدارى دا كورسەتىلەدى. سوندىقتان ب.بايبەك ءىسساپارىنىڭ العاشقى كۇنىندە ازاماتتىق قوعام وكىلدەرىمەن, سونىڭ ىشىندە زيالى قاۋىممەن, ءبىلىم بەرۋ جانە وزگە دە سالا قىزمەتكەرلەرىمەن كەزدەستى.
«ب.مومىش ۇلى اۋىلىندا كاسىپكەر ايەلدەرمەن بىرگە اۋىلدا ميكروبيزنەستى دامىتۋ ماسەلەلەرىن تالقىلادىق. مەملەكەت تاراپىنان كورسەتىلگەن قولداۋدىڭ ارقاسىندا ءوز كاسىبىن اشقانداردىڭ اراسىندا كوپ بالالى انالار دا بارشىلىق. بۇگىندە ولار ءوز وتباسىلارىن قامتاماسىز ەتىپ قانا قويماي, جاڭا جۇمىس ورىندارىن اشىپ, سالىق تولەپ, سونداي-اق قوعامدىق ومىرگە دە بەلسەنە اتسالىسۋدا. ءدال وسىنداي بەلسەندى ازاماتتىق ۇستانىمى بار ايەلدەر ءارتۇرلى الەۋمەتتىك توپتاردىڭ مۇددەلەرىن ءبىلدىرۋى جانە الداعى پارتياىشىلىك پرايمەريزگە قاتىسۋى ءتيىس دەپ سانايمىن. پارتيا كوشباسشىسى نۇرسۇلتان نازارباەۆتىڭ باستاماسى بويىنشا, Nur Otan الداعى ۋاقىتتا ءوز سايلاۋالدى پارتيالىق تىزىمدەرى ارقىلى ءماجىلىس پەن بارلىق دەڭگەيدەگى ماسليحاتتارعا كەمىندە 30% ايەلدەردىڭ كانديداتۋراسىن ۇسىنۋدى جوسپارلاپ وتىر», – دەپ جازدى ب.بايبەك ءوزىنىڭ Instagram پاراقشاسىندا.
پارتيا توراعاسىنىڭ ءبىرىنشى ورىنباسارى اتاپ وتكەن بەلسەندى ايەلدەردىڭ قاتارىنا كوپ بالالى انا ءاسيما شوكەەۆانى قوسۋعا بولادى. قازىرگى تاڭدا جۋالى اۋداندىق ىسكەر ايەلدەر قاۋىمداستىعىن باسقارىپ وتىرعان ءا.شوكەەۆا بىرنەشە جىل بۇرىن شارۋا قوجالىعىن اشقان. كەيىن ءوز قارجىسىنا بالاباقشا سالىپ, كوپ بالالى جانە الەۋمەتتىك جاعدايى تومەن وتباسىلاردىڭ بالالارىن تەگىن اسپەن قامتاماسىز ەتىپ وتىر.
«مىنە, بۇل – بارشامىز ءۇشىن تاماشا ۇلگى. ءبىر عانا ايەل اۋىل شارۋاشىلىعىن, كاسىپكەرلىكتى جانە ءبىلىم بەرۋ سالاسىن دامىتىپ وتىر. قانشاما ادامعا جۇمىس بەرىپ وتىرعانى تاعى بار. بۇل ەلدەگى – تىنىشتىقتىڭ كەپىلى», – دەپ اتاپ ءوتتى جامبىل وبلىسىنىڭ اكىمى بەردىبەك ساپارباەۆ كەزدەسۋدە. سونىمەن قاتار ول وبلىستاعى كاسىپكەرلىك سالاسىندا 125 مىڭنان استام ادام ەڭبەك ەتسە, ولاردىڭ تەڭ جارتىسى ايەلدەر ەكەنىن ايتتى.
ال جامبىل وبلىسىنا جاساعان ءىسساپارىنىڭ ەكىنشى كۇنى ب.بايبەك ماسانچي, وتەگەن مەن قورداي اۋىلدارىنىڭ تۇرعىندارىمەن, Nur Otan پارتياسى قورداي اۋداندىق باستاۋىش پارتيا ۇيىمدارى مۇشەلەرىمەن جانە دەپۋتاتتارىمەن كەزدەستى.
«جاقىندا ورىن العان وقيعا تەك حالىقتىڭ اۋىزبىرشىلىگى مەن قوعامدىق كەلىسىم عانا ەلىمىزدىڭ ءوسىپ-وركەندەۋى مەن تابىستى دامۋىنىڭ نەگىزگى كەپىلى ەكەنىن تاعى ءبىر رەت ەسىمىزگە سالدى. قورداي اۋدانىنا ارنايى كەلگەن ساپارىندا مەملەكەت باسشىسى قاسىم-جومارت توقاەۆ ايتقانداي, «قازاقستان – دوستىقتىڭ, بەيبىتشىلىك پەن كەلىسىمنىڭ, سونداي-اق بارلىق ەتنوستىق توپتاردىڭ ورتاق وتانى. ەلىمىز ءتۇرلى تاريحي جاعدايلارعا بايلانىستى قيىن-قىستاۋ زاماندا ءماجبۇرلى تۇردە قازاق جەرىن پانالاپ كەلگەن حالىقتىڭ ءبارىن قۇشاق جايا قارسى الدى. ءبىز ءبىرتۇتاس ۇلت رەتىندە وسى وتكەن كۇندەردەن ساباق الۋىمىز كەرەك. ەڭ باستىسى, بولاشاقتا مۇنداي قايعىلى جاعدايلاردىڭ قايتالانباۋى ءۇشىن قولدان كەلگەننىڭ ءبارىن جاساۋىمىز قاجەت», – دەدى كوپشىلىكپەن كەزدەسۋ كەزىندە ب.بايبەك.
ال جيىنعا قاتىسقان جەرگىلىكتى تۇرعىندار بولسا اۋداندا جاعدايدىڭ تۇراقتاعانىن, ازاماتتاردى قازىر قاراپايىم تۇرمىستىق ماسەلەلەر, اتاپ ايتقاندا, گازداندىرۋ, سۋمەن قامتۋ, مەكتەپكە دەيىنگى مەكەمەلەر مەن مەكتەپ قۇرىلىسى ءتارىزدى دۇنيەلەر الاڭداتاتىنىن ايتتى. بۇل ماسەلەلەردىڭ بارلىعىن Nur Otan پارتياسى ءوز باقىلاۋىنا الادى.
ء«بىز, قاراشايلار, ءبىر زامانداردا قازاقستانعا كۇشپەن جەر اۋدارىلعانبىز. بىراق ءدال وسى جەردەن ءبىز ءوز وتانىمىزدى تاپتىق, ءبىزدىڭ باسىمىزدان وتكەن قيىن كۇندەردىڭ, دەپورتاتسيانىڭ تاۋقىمەتىن جەڭۋگە اقكوڭىل, قايىرىمدى قازاق حالقى جاردەمدەستى. ءسويتىپ ءبىز وسى ولكەدە ماڭگى قالدىق. مەن ەلىمدى, وتانىم – قازاقستاندى سۇيەمىن. وسىندا ءومىر ءسۇرىپ جاتقانىمدى ماقتان تۇتامىن», دەدى كەزدەسۋ كەزىندە سورتوبە اۋىلى اۋرۋحاناسىنىڭ دارىگەرى تاتيانا اپاەۆا.
جەرگىلىكتى بيلىكتىڭ ۋادەسىنە قاراعاندا, جۋىق ارادا اۋداننىڭ ينفراقۇرىلىمىن جاڭارتۋ, جاڭا ءۇش مەكتەپتىڭ, ءۇي كەزەگىندە تۇرعاندارعا ارنالعان 50 پاتەرلى تۇرعىن ءۇيدىڭ قۇرىلىسى جانە وزگە دە ىستەر باستالماق. اتاپ ايتقاندا, ماسانچي اۋىلىندا بيىل 600 ورىندىق مەكتەپ سالۋ جوسپارلانىپتى. بۇل ءوز كەزەگىندە وسى مەكتەپتەردىڭ ورىن جەتىسپەۋشىلىگى ماسەلەسىن شەشەتىن بولادى.
