22-ءشى مارت – ناۋرىز مەيرامى. كۇنشىعىس حالقىنا تەگىس مەيرام قىلىپ وتكىزۋ – سالت بولعان كۇن. مۇنى كوپ بىلگىشتەر ء«دىن مەيرامى دەپ جيرەنىپ, لاجى بولسا, قۇرتىپ جىبەرۋ كەرەك», – دەپ سوپىشىلانىپ, اڭقاۋ ەلگە ارامزا مولدالىق سوعاتىن قازاق كوممۋنيست جولداستاردان بار ەكەن. ناۋرىزعا ارنالعان ناماز جوق. ناۋرىزدا قۇربان شالىنىپ, قۇران وقىلمايدى. ناۋرىز – جىل باسى. ناۋرىز – كۇن مەن ءتۇننىڭ تەڭەلىپ, كۇننىڭ اسىپ كەتىپ بارا جاتقان ۋاعىنا ءدال كەلەتىن مەيرام. ناۋرىز مۇسىلماندىقتان بۇرىن شىققان مەيرام. ناۋرىز – ەل شارۋاسىمەن كۇن كورىپ, تابيعات شارتتارىنا تۇرمىس كوبىرەك بايلانىسقان ەلدىڭ تۇرمىسى تۋدىرىپ وتىرعان مەيرام. جۇرت قىسقى قيىنشىلىقتان قۇتىلىپ, مالى جۇت قاۋپىنەن قۇتىلىپ, امان قالعان مالى بالالاپ, قوراسى كوبەيىپ جاتقان, وزدەرى ەگىن شارۋاسىنا قام قىلىپ, قاسيەتتى جاز ماۋسىمىندا بايلىعىن مولايتۋدىڭ, تابيعاتتىڭ ءيىپ تۇرعان كەزىندە قولىنان كەلگەنشە كوپ ءوندىرىپ قالۋدىڭ شاراسىن ىستەپ, ابىر-سابىر بوپ جاتقان ەل شارۋالارىنىڭ تالابى قوزعان ەڭ كوڭىلدى ۋاقىتى – كوكتەم. سول كوكتەمنىڭ باسى – ناۋرىز.
ەل شارۋالارىنىڭ ناۋرىزدى مەيرامدايتىن سەبەبى – وسى. جەردىڭ ءبىز جۇرگەن بەتكەيىندە 22-ءشى مارتتىڭ مەيرام بولۋىنىڭ, جىل باسى سانالۋىنىڭ, ەل شارۋالارىن جالپى ارداقتايتىن, جالپى قۋانىشپەن وتكىزەتىن كۇنى بولۋىنىڭ ەشبىر بىلگىشتەر وسەكتەرلىك كەلىسپەيتىن جەرى جوق. بۇل ناۋرىز – ەش كوممۋنيستىڭ دارەتىن سىندىرىپ, نامازىن بۇزبايتىن مەيرام. ونداي ەل تۇرمىسىنان تىم قول ءۇزىپ كەتكەن كوممۋنيستىڭ اۋليەلىگى وزىنەن باسقاعا كەرەگى جوق, وزىنە دە زياندى. جۇرتتىڭ پايدالى سالتىن قۇر سالت ەكەن دەپ جامانداۋ جۇرتتان شىققاندىقتان باسقا پايدا بەرمەيدى.
وزىق ۇلت سانالاتىن ورىس اراسىندا دەمالىس كۇنىن جەكسەنبىدەن باسقا كۇنگە اۋدارا الماي جۇرگەندە, ايسانىڭ تۋعان كۇنى مەن ولگەن كۇنىن مەيرام قىلىپ جۇرگەندە ونداي دىنگە بايلانىسى جوق, تۇرمىس سالتىنان تۋىپ وتىرعان حالىقتىڭ سالتىنا, ەل شارۋالارىنىڭ قۋانىش كۇنىنە بىلگىشسىنىپ, تەرىس قاراۋدان ۇلكەن ناداندىق بولمايدى.
قازاقستانعا ۇقساعان ەل شارۋاسى مەملەكەتىنىڭ, جالپى «حالىق مەيرامى» دەپ ۇكىمەت بەلگىلەگەن مەيرام كۇندەرىنىڭ ىشىندە ناۋرىز – ەڭ ەسكەرۋلىسى بولۋ كەرەك. جۇرتپەن بىرگە ۇكىمەت مەكەمەلەرى دە, كوممۋنيست پارتياسىنىڭ جۇرتشىلىعى دا باسشىلىق قىلىپ, مەيرامداپ وتكىزەتىن ەڭ ۇلكەن كۇن – ناۋرىز بولۋ كەرەك. ورىس قارا شارۋاسىنىڭ اراسىندا «جيىن-تەرىن مەيرامى», «اعاش ەگۋ مەيرامى» دەگەندەرگە ۇقساعان شارۋا شارتتارىنا لايىقتاپ, ادەيىلەپ مەيرامدار وتكىزىلىپ ءجۇر. قازاق اراسىندا سونداي شارۋا ماقساتىمەن جاسالاتىن مەيرامنىڭ ەڭ لايىقتىسى – ناۋرىز.
«مال شارۋاسى كۇنى» دەگەندى جاسايمىز دەپ ءجۇرمىز عوي. كەش قالىپ وتىرمىز. بولماسا, «مال شارۋاسى مەيرامى» وسى ناۋرىز بولۋى لايىق-اق ەدى. كەلەر جىلدارى سولاي ىستەۋ كەرەك.
ناۋرىز – تابيعاتتىڭ مەيرامى, تابيعاتقا بايلانىستى مىقتى ەل شارۋاسىنىڭ مەيرامى. ناۋرىز – ءدىن مەيرامى ەمەس, تۇرمىس مەيرامى, شارۋا مەيرامى. ناۋرىز – قازاقتىڭ ۇلت مەيرامى بولىپ كەتكەن قۇربان ايت, ورازا ايتتاردان گورى دەنى دە ساۋ, قادىرى دە ارتىق. ناۋرىز – قازاقتىڭ ۇلى كۇنى. ناۋرىز – جىل باسى. بۇگىن قازاقشا تىشقان ءوتىپ, سيىر جىلى كىرىپ وتىر. بۇگىن قازاق «جەتكەن دە بار, جەتپەگەن دە بار» دەپ جاڭا كورگەندەي, ءبىر-بىرىمەن قۇشاقتاسىپ كورىسىپ, قۋانىشپەن جاڭا جىلدى قارسى الىپ وتىر. بۇگىن – بۇكىل قازاقستاننىڭ مەيرامى.
توقپاق.
22 مارت, ورىنبور.
