قازاقستان • 11 ناۋرىز، 2020

قازاقستان مەن برازيليا اراسىنداعى قۇقىقتىق تۇرعىدا رەتتەۋ قۇجاتتارى قارالدى

45 رەتكورسەتىلدى

سەناتتىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ كەڭەيتىلگەن وتىرىسىندا قازاقستان مەن برازيليا اراسىندا ءوزارا قۇقىقتىق كومەك كورسەتۋدى زاڭداستىرۋ ماسەلەسى قارالدى. كوميتەت باسشىسى ۆلاديمير ۆولكوۆتىڭ توراعالىق ەتۋىمەن وتكەن وتىرىسقا سەناتورلارمەن بىرگە باس پروكۋراتۋرانىڭ وكىلدەرى دە قاتىستى. بۇل تۋرالى سەناتتىڭ ءباسپاسوز قىزمەتى حابارلادى.

الدىمەن قازاقستان مەن برازيليا اراسىنداعى قىلمىسكەرلەردى ءوزارا ۇستاپ بەرۋ تۋرالى شارتتى راتيفيكاتسيالاۋ ۇسىنىلدى. قازاقستان رەسپۋبليكاسى باس پروكۋرورىنىڭ ورىنباسارى مارات احمەتجانوۆتىڭ ايتۋىنشا، بۇگىندە قازاقستان مەن برازيليا ەلى اراسىندا قىلمىس سالاسىنا قاتىستى  نەگىزگى 3 شارت جاسالدى. «اتالعان شارت ىزدەۋدە جۇرگەن ادامداردى قىلمىستىق جاۋاپكەرشىلىككە تارتۋ جانە سوت ۇكىمىن ورىنداۋ ءۇشىن سونىمەن قاتار ەكستراديتسيالاۋ ماسەلەلەلەرىن شەشەدى. قۇجاتتا ادامداردى ۇستاپ بەرۋ جانە ودان باس تارتۋ ماسەلەلەرى بەلگىلەنگەن»، - دەدى م.احمەتجانوۆ.

سەناتور رىسقالي ابدىكەروۆ اتالعان زاڭ جوباسىن راتيفيكاتسيالاۋدى قولداي وتىرىپ، شارتتىڭ ەكى ەل اراسىندا ىزدەۋ سالىنعان ادامداردى قىلمىستىق جاۋاپكەرشىلىككە تارتۋ مەن ازاماتتاردى ەكستراديتسيالاۋعا باعىتتالعانىن ايتىپ ءوتتى.

كەڭەيتىلگەن وتىرىستا سونىمەن قاتار ەكى ەل اراسىندا قىلمىستىق ىستەر بويىنشا قۇقىقتىق كومەك شارتىن راتيفيكاتسيالاۋ تۋرالى زاڭ جوباسى دا تالقىعا سالىندى. بۇل شارتتى راتيفيكاتسيالاۋ ەكى ەل اراسىنداعى كۇدىكتىلەر مەن ايىپتاۋشىلاردىڭ كىناسىن دالەلدەۋ ءۇشىن قاجەتتى تەرگەۋ امالدارىن جۇرگىزۋدى كوزدەيدى. شارتتا قۇقىقتىق كومەك قانداي جاعدايلاردا كورسەتىلەتىنى جازىلعان جانە قۇجاتتىڭ الەۋمەتتىك، ەكونوميكالىق جانە ساياسي تەرىس سالدارى جوق.

قوسىمشا بايانداما جاساعان سەنات دەپۋتاتى نۇرلان بەكنازاروۆ ازاماتتاردىڭ جازانى ءوز ەلىمىزدە وتەگەنى قوعامعا قايتا بەيىمدەلۋىنە مۇمكىندىك بەرەتىنىن اتاپ ءوتتى. سول سياقتى سوتتالعان ازاماتتاردى الەۋمەتتىك جاعىنان وڭالتۋعا وڭ اسەرىن تيگىزەدى. 

قازاقستان مەن برازيليا اراسىندا ءوزارا سوتتالعان ادامداردى بەرۋ تۋرالى شارتتى راتيفيكاتسيالاۋ دا ۇسىنىلدى. ۇسىنىلىپ وتىرعان شارت جازاسىن وتەپ جاتقان قىلمىسكەرلەرگە جازاسىن ءوز ەلىندە وتەۋگە مۇمكىندىك بەرەدى. قازاقستان رەسپۋبليكاسى باس پروكۋرورىنىڭ ورىنباسارى مارات احمەتجانوۆتىڭ ايتۋىنشا، شارتتى راتيفيكاتسيالاۋ شەتەلدەگى ءوز ازاماتتارىمىزدى قورعاۋ ماقساتىن كوزدەيدى.

كوميتەت باسشىسى ۆلاديمير ۆولكوۆ كەڭەيتىلگەن وتىرىستى قورىتىندىلاي كەلىپ، ەلىمىز تاۋەلسىزدىك العالى 29 ەلمەن وسىنداي ەكىجاقتى شارت جاسالعانىن جەتكىزدى. «قازىرگى ۋاقىتتا ءبىزدىڭ ازاماتتار شەتەلدە ءجيى شىعادى. وكىنىشكە قاراي، كەلەڭسىز جاعدايلارعا دا ۇشىراپ جاتادى. سونداي جاعدايدا وسى شارتتىڭ قۇقىقتىق كومەگى تيەدى»، - دەدى ۆ.ۆولكوۆ.

زاڭ جوبالارى سەناتتىڭ جالپى وتىرىسىندا قاراۋعا ۇسىنىلدى.

سوڭعى جاڭالىقتار

ۇقساس جاڭالىقتار