باعدارلاما اياسىندا بەرىلگەن 4 862 زايم بويىنشا, جەڭىلدەتىلگەن نەسيەگە 1 768 كوپبالالى جانە 2 408 تولىق ەمەس وتباسى, سونداي-اق مۇمكىندىگى شەكتەۋلى بالا تاربيەلەپ وتىرعان 686 وتباسى قول جەتكىزدى. سونداي-اق, تۇرعىن ءۇي قۇرىلىس جيناق بانكى «باقىتتى وتباسى» قالالىق باعدارلاماسى شەڭبەرىندە الماتى قالاسىندا تۇراتىن 284 كوپبالالى وتباسىنىڭ ءتيىمدى شارتتارمەن باسپانا الۋىنا كومەكتەسىپ, 2019 جىلى وسى ماقساتتا بولىنگەن 50 ملرد تەڭگە قاراجاتتى يگەردى.
بيىل ولار ءۇشىن بيۋدجەت تاراپىنان بولىنەتىن ليميت مولشەرى ەكى ەسەگە ۇلعايتىلدى. ول 100 ملرد تەڭگەنى قۇرايدى. ياعني, قولجەتىمدى زايم وسى جىلى شامامەن 10 000 وتباسىعا بەرىلەدى.
كەشە قر ۇكىمەت وتىرىسىندا «باقىتتى وتباسى» باعدارلاماسى بويىنشا 50 ملرد تەڭگە كولەمىندەگى العاشقى بيۋدجەتتىك نەسيەنى ءبولۋ جونىندە قاۋلى قابىلداندى. 50 ملرد تەڭگە كولەمىندەگى كەلەسى ترانش 2020 جىلدىڭ ەكىنشى جارتى جىلدىعىندا بەرىلەدى.
2020 جىلى «باقىتتى وتباسى» باعدارلاماسى بويىنشا نەسيەلىك وتىنىمدەر 11 ناۋرىزدان باستاپ قابىلدانا باستايدى.
- ءبىزدىڭ ەسەپتەۋىمىز بويىنشا, «باقىتتى وتباسى» باعدارلاماسىنا قاتىسقان وتباسىلار جالپى العاندا 14 000 ءسابي تاربيەلەپ وتىر. بۇگىندە ولاردىڭ ءبارىنىڭ ءوز ءۇيى, ويىن ويناپ, ساباعىنا دايىندالاتىن جەكە بولمەسى بار. ونىڭ ۇستىنە, مەكتەپتەرى دە جاپ-جاقىن. بيىل ءبىز وسى الەۋمەتتىك ماڭىزى زور باعدارلامانى ودان ءارى جالعاستىراتىن بولامىز. ونىڭ نەسيە بەرۋ شارتتارى دا تولىقتاي ساقتالعان. بانككە جەرگىلىكتى اكىمدىكتەن جولداما العان سوڭ حابارلاسقان ءجون. زايم مولشەرلەمەسى بۇرىنعىسىنشا 10%-دىق باستاپقى جارنامەن جىلدىق 2%-دى قۇرايدى. بيىلعى جىلى ەنگىزىلگەن باستى وزگەرىس – ەڭ جوعارى تابىس كولەمى. ەندى ول كۇنكورىس مينيمۋمىنىڭ مولشەرىنە سايكەس ەسەپتەلىنەتىن بولادى. تالاپتارعا ساي, جەڭىلدەتىلگەن زايم الۋ ءۇشىن ءار وتباسى مۇشەسىنە كەلەتىن تابىس مولشەرى سوڭعى التى ايدا اي سايىن ەكى كۇنكورىس ميمنيمۋمىنان, ياعني, 62 366 تەڭگەدەن اسپاۋى قاجەت. وسىلايشا, بۇعان دەيىن وسى تالاپقا ساي كەلمەگەن وتباسىلار وسى جىلى باعدارلاماعا قاتىسىپ, قونىس تويىن تويلاي الادى, - دەيدى تۇرعىن ءۇي قۇرىلىس جيناق بانكى باسقارما ءتورايىمى ءلاززات يبراگيموۆا.
«باقىتتى وتباسى» باعدارلاماسى بويىنشا پاتەردى جاڭا جانە قولدانىستاعى ۇيلەردەن الۋعا بولادى. سونداي-اق, جەر ءۇي ساتىپ الۋ مۇمكىندىگى دە بار. نۇر-سۇلتان, الماتى, شىمكەنت, اقتاۋ, اتىراۋ قالالارىنداعى ەڭ جوعارى زايم سوماسى 15 ملن تەڭگەنى قۇرايدى, قالعان ايماقتاردا ول 10 ملن تەڭگەگە تەڭ.
