تۇركىستان قالاسىن دامىتۋ جونىندەگى ستراتەگيالىق مىندەتتەر شەڭبەرىندە «تۇركىستان» اكك» اق وبلىس ورتالىعىنىڭ سەرۆيستىك جانە قوناقۇي قىزمەتتەرىنىڭ نارىعىن زەرتتەگەن. ناتيجەسىندە بولاشاققا باعىتتالعان جوبا رەتىندە قالانىڭ تاريحي-مادەني ورتالىعىنا ورنالاساتىن «بۋتيك-وتەل» فورماتىندا قوناق ءۇي سوعىلاتىن بولدى.
جوبانى ىسكە اسىرۋ بارىسىندا قوناقۇي بيزنەسىندەگى حالىقارالىق ستاندارتتاردى باسشىلىققا الۋ ەسكەرىلەتىنى انىق. قوناقۇيدە 66 بولمە بولماق. بۇگىندە «بۋتيك-وتەل» اتالىپ وتىرعان نىساندى «BI Group» ينۆەستيتسيالىق-قۇرىلىس حولدينگىنىڭ ەنشىلەس كومپانياسى سالادى.
«جىل سايىن سانى ارتىپ كەلە جاتقان قاجىلىق ماقساتتا كەلۋشىلەر مەن تۋريستەر لەگىن ەسكەرسەك, ەتنيكالىق ستيلدە بەزەندىرىلەتىن بۋتيك-قوناقۇيى سۇرانىسقا يە بولادى جانە جاڭا تۇركىستاننىڭ سانىنە اينالادى», دەيدى «تۇركىستان» اكك» اق ينفراقۇرىلىم مەن ءتۋريزمدى دامىتۋ دەپارتامەنتىنىڭ ديرەكتورى بايان كايۋپوۆا.
