ساياسات • 10 ناۋرىز، 2020

ۇكىمەت پەن ۇلتتىق بانكتىڭ بىرلەسكەن ۇندەۋى

51 رەتكورسەتىلدى

ۇكىمەت پەن ۇلتتىق بانكتىڭ مۇنايدىڭ الەمدىك نارىعىنداعى جاعداي جانە ماكروەكونوميكالىق تۇراقتىلىقتى قامتاماسىز ەتۋ جونىندەگى شارالار تۋرالى بىرلەسكەن ۇندەۋى

وپەك+ ۇيىمىنداعى مۇنايدىڭ نەگىزگى ەكسپورتتاۋشى ەلدەرى اراسىنداعى مۇناي ءوندىرۋدى شەكتەۋ جونىندەگى كەلىسپەۋشىلىكتەر مۇنايدىڭ الەمدىك باعاسىنىڭ ايتارلىقتاي تومەندەۋىنە الىپ كەلدى. بۇگىن، 2020 جىلعى 9 ناۋرىزدا Brent ماركالى مۇناي الەمدىك نارىقتاردا 30%-دان استام تومەن باعامەن، باررەلىنە $31-33 كولەمىندە ساۋدالانۋدا.

وسى جاعدايعا بايلانىستى ۇكىمەت پەن ۇلتتىق بانك جۇرگىزىلىپ جاتقان مەملەكەتتىك ساياساتتىڭ باسىمدىقتارى ماكروەكونوميكالىق تۇراقتىلىقتى جانە سالىق-بيۋدجەت ساياساتىنىڭ تيىمدىلىگىن قامتاماسىز ەتۋ، ينفلياتسيالىق پروتسەستەردى باسقارۋ جانە ەلدەگى الەۋمەتتىك تۇراقتىلىقتى ساقتاۋ بولىپ قالاتىنىن مالىمدەيدى.

سىرتقى نارىقتارداعى قالىپتاسقان احۋالعا جانە ونىڭ قازاقستان ەكونوميكاسىنا اسەر ەتۋىنە تۇراقتى مونيتورينگ جۇرگىزىلەدى. قاجەتتى شەشىمدەردى جەدەل قابىلداۋ جانە ولاردى جۇزەگە اسىرۋ ءۇشىن پرەمەر-ءمينيستردىڭ باسشىلىعىمەن شتاب قۇرىلدى.

ۇكىمەتتىڭ بيۋدجەت ساياساتىنىڭ شارالارى الەۋمەتتىك مىندەتتەمەلەردى تولىق كولەمدە ورىنداۋعا باعىتتالاتىن بولادى. باسىم ەمەس بيۋدجەت شىعىندارىن قىسقارتۋ شارالارى قابىلدانادى. ۇكىمەت پەن جەرگىلىكتى اتقارۋشى ورگاندار باعانىڭ نەگىزسىز ءوسۋىن، اسىرەسە الەۋمەتتىك ماڭىزى بار تا­ۋارلار مەن قىزمەتتەرگە باعانىڭ ءوسۋىن بولدىرماۋعا ەرەكشە نازار اۋداراتىن بولادى. قىزمەتكەرلەردىڭ سانىن قىسقارتۋعا جول بەرمەۋدى جانە ەڭبەكاقىنى ۋاقىتىلى تولەۋدى قامتاماسىز ەتۋدى قوسا العاندا، ازاماتتاردىڭ ەڭبەك قۇقىقتارىنىڭ ساقتالۋىنا قاتاڭ باقىلاۋ قامتاماسىز ەتىلەدى.

ءوز مانداتى اياسىندا ۇلتتىق بانكتىڭ ءتيىستى رەسۋرستارى بار جانە بازالىق مولشەرلەمەنى ارتتىرۋ جانە ادەكۆاتتى باعامدىق ساياساتتى جۇرگىزۋ ارقىلى مونەتارلىق ساياساتتى قاتاڭداتۋ جولىمەن باعالاردىڭ تۇراقتىلىعىن قامتاماسىز ەتۋ بويىنشا قاجەتتى قادامدار قابىلدايدى. اتالعان شارالار ينفلياتسيانىڭ جەدەلدەۋىن شەكتەيدى، ۇلتتىق ۆاليۋتا باعامىنىڭ شامادان تىس قۇبىلمالىلىعىنا جول بەرمەۋگە مۇمكىندىك جاسايدى.

ۇلتتىق بانك ۆاليۋتا نارىعىن تۇراقتاندىرۋدى قامتاماسىز ەتۋ جانە قارجىلىق تۇراقتىلىقتى قامتاماسىز ەتۋ ءۇشىن قاجەتتى ۆاليۋتالىق ينتەرۆەنتسيالار جۇرگىزەتىن بولادى. ۇلتتىق بانكتىڭ تەڭگەنىڭ ايىرباس باعامىمەن الىپ-ساتارلىق وپەراتسيالاردى بولدىرماۋ ءۇشىن التىن-ۆاليۋتا اكتيۆتەرىنىڭ جەتكىلىكتى كولەمى، سونداي-اق رەتتەۋىش قۇرالداردى قوسا العاندا، بارلىق قاجەتتى قۇرالدارى بار.

قارجى نارىعىن رەتتەۋ جانە دامىتۋ اگەنتتىگى قارجى نارىعىنداعى تۇراقتىلىقتى ساقتاۋ جونىندە شارالار قابىلدايتىن بولادى.

ۇكىمەت پەن ۇلتتىق بانك تەرىس سالدارلاردى ازايتۋ جانە قازاقستان رەسپۋبليكاسىنىڭ الەۋمەتتىك-ەكونوميكالىق دامۋىنىڭ تۇراقتىلىعىن قامتاماسىز ەتۋ ءۇشىن قاجەتتى رەسۋرستارعا يە.

 

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • بۇگىن، 20:12

ەكى قىلمىستىق توپ ۇستالدى

ايماقتار • بۇگىن، 17:45

بالالار ۇيىندەگى ىزگىلىك شاراسى

ايماقتار • بۇگىن، 15:47

ەلتاڭبا تاريحى تالقىلاندى

رۋحانيات • بۇگىن، 14:54

ۇقساس جاڭالىقتار