كەلىسسوزدەر بارىسىندا ءبىرجان نۇرىمبەتوۆ قازاقستان مەن اقش-تىڭ قاۋىپسىزدىك, ەكونوميكا, الەۋمەتتىك-ەڭبەك جانە مادەني-گۋمانيتارلىق سالالارداعى جەمىستى ىنتىماقتاستىعىن اتاپ ءوتتى.
«اعىمداعى جىلعى 19-29 قاڭتار ارالىعىندا اقش مەملەكەتتىك دەپارتامەنتى مەن ەلشىلىگىنىڭ قولداۋىمەن «ادام ساۋداسىنا قارسى كۇرەس» ماسەلەسى بويىنشا حالىقارالىق كاسىبي الماسۋ باعدارلاماسى اياسىندا قازاقستاندىق دەلەگاتسيانىڭ اقش-قا جۇمىس ساپارى ءوتتى. ەلدەر اراسىندا ارىپتەستىك بايلانىستار ورناتىلدى, اتاپ ايتقاندا, ادام ساۋداسىنا قارسى ءىس-قيمىل جانە حالىقارالىق دەڭگەيدە ىنتىماقتاستىقتى نىعايتۋ جونىندەگى جۇمىستار باستالدى جانە كەلىسىلگەن شارالار ايقىندالدى», – دەپ اتاپ ءوتتى مينيستر.
ءبىرجان نۇرىمبەتوۆ, سونداي-اق, ۋيليام موزەردى قازاقستان 1993 جىلدان باستاپ مۇشەسى بولىپ تابىلاتىن حالىقارالىق ەڭبەك ۇيىمىمەن (بۇدان ءارى – حەۇ) ءوزارا ءىس-قيمىل تۋرالى حاباردار ەتتى.
ول سونداي-اق قازاقستان رەسپۋبليكاسىنىڭ ەڭبەكمينى ەڭبەك سالاسىنداعى زاڭنامانى جەتىلدىرۋ ماقساتىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەڭبەك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ازىرلەپ, قازاقستان رەسپۋبليكاسىنىڭ پارلامەنتى ءماجىلىسى ماقۇلدادى. بۇل قۇجات حەۇ ساراپشىلار كوميتەتىنىڭ جەنەۆا قالاسىندا وتكەن حالىقارالىق ەڭبەك كونفەرەنتسياسىنىڭ 106, 107, 108 سەسسياسىنىڭ قورىتىندىلارى بويىنشا بەرگەن نەگىزگى ۇسىنىمدارىن ىسكە اسىرۋدى كوزدەيدى.
اتاپ ايتقاندا;
- جوعارى تۇرعان كاسىپوداق بىرلەستىكتەرىنە كاسىپوداقتاردىڭ مىندەتتى مۇشەلىگىن الىپ تاستاۋ, بۇل كاسىپوداقتاردىڭ بىرلەستىك بوستاندىعىنا قۇقىعىن شەكتەمەۋگە مۇمكىندىك بەرەدى;
- كاسىپوداقتاردى تىركەۋ شارتتارىن جەڭىلدەتۋ;
- مەملەكەتتىك تىركەۋ كەزىندە كاسىپوداقتاردىڭ رەسپۋبليكالىق, سالالىق, وڭىرلىك بىرلەستىكتەرى رەتىندە كاسىپوداقتاردىڭ مارتەبەسىن راستاۋ ءۇشىن شارتتاردى وڭايلاتۋ;
- ادىلەت ورگاندارىندا تىركەۋ كەزىندە كاسىپوداقتار بىرلەستىكتەرىنىڭ مارتەبەسىن راستاۋ ءۇشىن مەرزىمدەردى 6 ايدان 1 جىلعا دەيىن ۇلعايتۋ;
- تاراتۋ ورنىنا كاسىپوداق قىزمەتىن 3 ايدان 6 ايعا دەيىن توقتاتا تۇرۋ مۇمكىندىگىن ەنگىزۋ;
- ەرەۋىلدەردى, ونىڭ ىشىندە قاۋىپتى وندىرىستىك وبەكتىلەردە زاڭسىز دەپ تانۋ جاعدايلارىن ناقتىلاۋ;
- الەۋمەتتىك ارىپتەستىك جۇيەسىندە جۇمىس بەرۋشىلەر وكىلدەرىنىڭ وكىلەتتىكتەرىن بەكىتۋ.
ءوز كەزەگىندە ۋيليام موزەر ءبىرجان نۇرىمبەتوۆكە ادام ساۋداسىنا قارسى ءىس-قيمىل ماسەلەلەرىندەگى ىنتىماقتاستىعى ءۇشىن العىسىن ءبىلدىرىپ, ەڭبەك سالاسىنداعى زاڭنامانى جەتىلدىرۋدىڭ ماڭىزدىلىعىن اتاپ ءوتتى.
