«بۇگىندە ەلىمىز بويىنشا ۇلى اقىننىڭ ەسىمىن دارىپتەۋ ماقساتىندا ءتۇرلى شارالار ۇيىمداستىرىلۋدا. باستىسى ناۋقانشىلدىققا سالىنباي, ۇلى تۇلعاعا ارنالعان ءار ءىسىمىز ساپالى بولۋى كەرەك. كەمەڭگەر ويشىل اباي قۇنانباي ۇلىنىڭ ۇلتتىق ويىنىمىز – توعىزقۇمالاقتى دا جاقسى ويناعانىن بىلەمىز. سوندىقتان ءبىز شىعارماشىلىق سايىستارمەن قاتار اسىق اتۋ, توعىزقۇمالاق سەكىلدى ۇلتتىق سپورت تۇرلەرىن دە جارىس باعدارلاماسىنا ەنگىزدىك, دەيدى قالقامان اۋىلدىق مەكتەبىنىڭ ديرەكتورى ارىستانبەك سولتانحان.
تاربيە مەن تاعىلىمعا تولى شاراعا وڭىردەگى ۇلت رۋحانياتىنا وزىندىك ۇلەس قوسىپ جۇرگەن «JEBE» قوعامدىق بىرلەستىگىنىڭ مۇشەلەرى قاتىستى. اتاپ ايتساق, قازاقستان جازۋشىلار وداعىنىڭ پاۆلودار وبلىستىق فيليالىنىڭ باسشىسى, اقىن جارقىنبەك امانتاي, «جومارت جۇرەك» سىيلىعىنىڭ يەگەرى, قوعام بەلسەندىسى, ۇلتتىق ونەردىڭ جاناشىرى اسىلبەك تۋعانباي, ساتيريك اقىن, س.تورايعىروۆ اتىنداعى وبلىستىق كىتاپحانا قىزمەتكەرى الپىسباي حونج قاتىسىپ, سايىسقا قازىلىق ەتتى.
اقسۋ قالالىق مادەنيەت جانە تىلدەردى دامىتۋ ءبولىمىنىڭ باسشىسى ايدوس ورازالين, قالالىق ىشكى ساياسات ءبولىمىنىڭ باسشىسى نۇرلان بايباكىروۆ سايىسقا قاتىسۋشىلارعا اق جول تىلەپ, شاراعا قولداۋ ءبىلدىردى.
كەشەندى باعدارلاماعا تولى شارا «ابايدى وقىعان سوڭ» ەسسە جازۋ, «ولەڭ ءسوزدىڭ پاتشاسى» مانەرلەپ وقۋ, «قۇلاقتان كىراپ بويدى الار...» اندەر سايىسى, «اباي – دانا, اباي - دارا» ءۇش تىلدەگى برەين-رينگ ويىنى, «توعىزقۇمالاق», «اسىق اتۋ» سەكىلدى 6 تۇرگە ءبولىنىپ ءوتتى.
جەڭىمپازدار مەن جۇلدەگەرلەر العىس حاتپەن, ەستەلىك كۋبوك جانە مەدالدارمەن ماراپاتتالدى. سونداي-اق ەرەكشە ونەرىمەن كوزگە ءتۇسىپ, «ولەڭ ءسوزدىڭ پاتشاسى» مانەرلەپ وقۋ نوميناتسياسىندا جەڭىمپاز اتانعان بەرەكە ورتا مەكتەبىنىڭ 11-سىنىپ وقۋشىسى ادەبيەت قۇرمانالىگە ۇلت جاناشىرى اسىلبەك تۋعانباي اقشالاي سىيلىق تابىس ەتتى.
