بريۋسسەلدەگى بۇۇ دامۋ باعدارلاماسى وكىلدىگىنىڭ ديرەكتورى باربارا پەسكە-مونتەيرو ءوز سوزىندە استانا حابى تۇعىرناماسى مەملەكەتتىك قىزمەت سالاسىندا تاجىريبە الماسىپ, ىنتىماقتاستىقتى ىنعايتۋ ءۇشىن «عاجايىپ مۇمكىندىك» ەكەنىن ايتتى. ول اسىرەسە جاڭا تەحنولوگيالار دامۋى مەن تسيفرلاندىرۋ كەزەڭىندە وسىنداي بىرىكتىرۋشى تۇعىرناما ايرىقشا ماڭىزدى ەكەنىن تىلگە تيەك ەتتى. ويتكەنى, «سانقىرلى مەملەكەتتىك قىزمەت جۇيەسى ءارتۇرلى قۇرالداردى قاجەت ەتەدى, ال ىرگەلى جۇمىس ىستەۋ تاسىلدەرى – اركىمدە ءار ءتۇرلى», - دەدى پەسكە-مونتەيرو.
استانا مەملەكەتتىك قىزمەت حابى باسقارۋشى كوميتەت توراعاسى اليحان بايمەنوۆ قازىرگى تاڭدا حاب كوپجاقتى جاھاندىق تۇعىرناما رەتىندە 42 قاتىسۋشى-ەل مەن 55 ينستيتۋتسيونالدى ۇيىمدى جۇمىلدىراتىنىن جەتكىزدى.
بەلگيا كورولدىگىندەگى قازاقستان ەلشىلىگى كەڭەسشى-ۋاكىلى ەربولات سەمباەۆ ءوز سوزىندە «مەملەكەتتىك باسقارۋ ساپاسى كوپ جاعدايدا كادرلەردى دايىنداۋ ساپاسىمەن انىقتالاتىنىن» ايتتى. وسى كونتەكستە قازاقستان مەن بۇۇ دامۋ باعدارلاماسىنىڭ كەڭ اۋقىمدى جوباسى – استانا مەملەكەتتىك قىزمەت حابى جۇمىسى وتە وزەكتى ەكەنىن اتاپ ءوتتى. كەڭەسشى-ۋاكىل ءوز سوزىندە 15 ناۋرىزدا 25 مەملەكەت پەن 5 حالىقارالىق ۇيىم استانا حابىن قۇرۋ تۋرالى دەكالاراتسيا قابىلداعانىنا 7 جىل تولاتىنىن حابارلادى.
تالقىلاۋ بارىسىندا ەۋروكوميسسيا مەن بىراقاتار مەملەكەت وكىلدەرى ايماقتىق ىنتىماقتاستىق تۇرعىسىندا استانا حابى جۇمىسىن ۇيىمداستىرۋ فورمالارى مەن تاسىلدەرىن زەردەلەۋگە ىقىلاس تانىتتى. جيىنعا قاتىسقان ءارتۇرلى ەل قاتىسۋشىلارى حاب جۇمىسىنا جوعارى باعا بەرە وتىرىپ, ءارى قاراي ىنتىماقتاستىقتى دامىتۋعا قىزىعۋشىلىق ءبىلدىردى
سونىمەن بىرگە قاتىسۋشىلار مەملەكەتتىك باسقارۋ سالاسىنداعى وزىق ەۋروپالىق تاجىريبەنى زەرتتەۋ مەن قولدانۋ بارىسى بويىنشا پىكىر الماستى. وعان قوسا حابتىڭ مەملەكەتتىك قىزمەت سالاسىندا الەۋەتتى نىعايتۋ, زەرتتەۋلەر جاساۋ, ءبىلىم مەن تاجىريبە الماسۋ بويىنشا جۇمىستارى مەن جاڭا ساراپتامالارى قاتىسۋشىلار نازارىنا ۇسىنىلدى.
تاراپتار ەو ەلدەرىنىڭ وزىق تاجىريبەسىن تاراتۋدا جانە ايماق ەلدەرىندە ءتيىمدى مەملەكەتتىك قىزمەت جۇيەلەرىن ىلگەرىلەتۋ بويىنشا ارىپتەستىكتى كەڭەيتۋ جولدارىن قاراستىردى. ەۋروپا وداعى - استانا مەمقىزمەت حابى قۇرىلتايشىلارىنىڭ ءبىرى. قازىرگى تاڭدا ەۋروپا وداعىنا مۇشە 11 مەملەكەت - استانا حابىنا قاتىسۋشى ەل.
بۇل شارانى بريۋسسەلدەگى بۇۇ دب وكىلدىگى قازاقستاننىڭ بەلگيا كورولدىگىندەگى ەلشىلىك قولداۋىمەن وتكىزدى.
