كەيىنگى كەزدەرى اۋىل شارۋاشىلىعىمەن جانە باسقا دا كاسىپ تۇرلەرىمەن اينالىسىپ جۇرگەن نازىك جاندىلار جەتەرلىك. مەملەكەتتىك باعدارلامالار ارقىلى قولداۋعا يە بولعان كاسىپكەر ايەلدەردىڭ جەتىستىككە جەتكەندەرى دە از ەمەس. ايتالىق, سوڭعى بەس جىلدا اۋىل شارۋاشىلىعىن قارجىلاي قولداۋ قورى 55 مىڭ كاسىپكەرگە نەسيە بەرگەن بولسا, سونىڭ 19 مىڭى كاسىپكەر ايەلدەرگە تيەسىلى ەكەن. نەسيە الىپ, كاسىبىن دوڭگەلەتىپ وتىرعان نازىك جاندىلاردىڭ بىرنەشەۋىنە توقتالا كەتەيىك.
تىرشىلىگىن تىگىنشىلىكپەن بايلانىستىرادى
قىزىلوردا قالاسىندا تۇراتىن جادىرا قۇلمىرزاەۆا تىرشىلىگىن تىگىنشىلىكپەن بايلانىستىرعان كاسىپكەر. بالاباقشادا, كوللەدجدە جانە تاعى بىرنەشە جەردە شاكىرت تاربيەلەپ, جۇمىس ىستەگەن كاسىپكەر ءبىر كۇنى ءوزىنىڭ تىگىن شەبەرحاناسىن اشۋعا بەل بۋادى. ويتكەنى, بالا كۇنىنەن ىسمەرلىككە قۇمار جادىرانىڭ ەكى اجەسى دە توڭىرەككە بەلگىلى شەبەر ادامدار ەكەن. تىگىنشىلىك ونەر وزىنە قانمەن دارىعانىن ايتادى.
2013 جىلى ءبىر دۇكەننىڭ بۇرىشىنان شاعىن عانا تىگىن شەبەرحاناسىن اشقان كاسىپكەر, 2017 جىلى اۋىل شارۋاشىلىعىن قارجىلاي قولداۋ قورىنان نەسيە الىپ, ەكىنشى شەبەرحاناسىن ىسكە قوسىپتى.
تاپسىرىستىڭ كوپتەپ تۇسۋىنە بايلانىستى اراعا ءۇش جىل سالىپ, بيىل ءوز قاراجاتىمەن ءۇشىنشى شەبەرحاناسىنىڭ لەنتاسىن قيدى. بۇگىندە كاسىپكەر ونشاقتى ادامعا جۇمىس بەرىپ وتىر.
– بالا كۇنىمنەن تىگىن تىگۋگە قۇمار بولدىم. ءوز اجەم دە, ناعاشى اجەم دە ىسمەر ادامدار. بۇل ماعان قانمەن دارىعان ونەر دەپ ويلايمىن. ونەر ءوز الدىنا, سول ونەردى كاسىپكە اينالدىرۋ, تابىس تابۋ وڭاي ەمەس, ارينە. بىراق ءوزىڭ ءسۇيىپ ىستەيتىن جۇمىس بولعاندىقتان, بارلىعىنا شىدايدى ەكەنسىڭ. قيىندىقتاردى جەڭە بىلسەڭ عانا جەتىستىككە جەتەسىڭ. ەڭ الدىمەن ادالدىق, تاباندىلىق, توزىمدىلىك سياقتى قاسيەتتەر وتە قاجەت», - دەيدى ءۇش بالا تاربيەلەپ وتىرعان تىگىنشى كاسىپكەر.
ءتورت ت ۇلىكتىڭ تورەسىن باعادى
اۋىل شارۋاشىلىعىن قارجىلاي قولداۋ قورى كاسىپكەر ايەلدەردى شاعىن نەسيە بەرۋ ارقىلى قولداپ كەلە جاتقان ۇيىم. بۇل ورايدا, اۋىلدىق جەرلەردە مال شارۋاشىلىعىمەن اينالىساتىن ايەلدەردىڭ ەڭبەگى ەرەن ەكەنىن ايتا كەتكەن ءجون. قاراعاندى وبلىسىنىڭ اقادىر كەنتىندە تۇراتىن گۇلنار راحىمجانوۆا جىلقى شارۋاشىلىعىمەن اينالىسادى. جىگىتتەردىڭ جۇرەگى داۋالامايتىن ءىستى قولعا العان كاسىپكەردىڭ اكەسى كەزىندە جىلقى فەرماسىنىڭ بريگاديرى بولعان ەكەن. بالا كۇنىنەن اتقا ءمىنىپ, تايجارىستان قالمايتىن ەركە قىز بولاشاعىن تەك اۋىلمەن بايلانىستىرادى.
ول بىلتىر اۋىل شارۋاشىلىعىن قارجىلاي قولداۋ قورىنان جىلقى ءوسىرۋ ماقساتىندا 3,3 ملن تەڭگە نەسيە العان بولاتىن.
– بالا كۇنىمنەن جىلقىعا جاقىن بولدىم. جىلقى دەگەن ءتورت ت ۇلىكتىڭ تورەسى عوي. اكەم جىلقى فەرماسىنىڭ بريگاديرى بولدى. ساۋمال, قىمىز ءىشىپ, اتقا ءمىنىپ وسكەنبىز. قارجىگەر جانە زاڭگەر ماماندىقتارى بويىنشا ەكى جوعارى ءبىلىمىم بار. بولاشاعىمدى تەك اۋىلمەن بايلانىستىرامىن, قالانىڭ قاربالاسقان ءومىرى ۇنامايدى. قالاعا ءبىر كۇن بارسام, اۋىلعا تەزىرەك قايتۋعا اسىعامىن. اۋىل شارۋاشىلىعىن قارجىلاي قولداۋ قورىنان نەسيە راسىمدەپ, جىلقى ساتىپ الدىم. قازىر وزىمدە ون شاقتى جىلقىم بار. الداعى ۋاقىتتا بيە ساۋىپ, قىمىز دايىنداۋدى جوسپارلاپ وتىرمىن. نەگىزى, جوسپارلارىم وتە كوپ. ونىڭ ءبارىن قالاي جۇزەگە اسىراتىنىمدى ۋاقىت كورسەتەدى, – دەيدى كاسىپكەر.
بۇگىنگى تاڭدا اۋىل شارۋاشىلىعىن قارجىلاي قولداۋ قورىنىڭ 48 مىڭنان استام كليەنتى بار. سونىڭ ۇشتەن ءبىرىن كاسىپكەر ايەلدەر قۇرايدى.
– وتكەن جىلى قور جالپى كاسىپكەرلىكپەن اينالىساتىن ايەلدەرگە 21,5 ملرد تەڭگە باعىتتالدى. كاسىپكەر ايەلدەردىڭ ءبىر ەرەكشەلىگى – العان نەسيەسىن ۋاقىتىندا وتەيدى جانە العان مىندەتتەمەلەرىنە وتە جوعارى جاۋاپكەرشىلىكپەن قارايدى. قور كەز كەلگەن كاسىپكەرلىك ماقساتتاعى جوبالاردى قارجىلاندىرۋ مەن بيزنەس-باستامالاردى ىسكە اسىرۋدا ارقاشان كاسىپكەر ايەلدەرگە قولداۋ كورسەتۋگە ءازىر, - دەيدى «اۋىل شارۋاشىلىعىن قارجىلاي قولداۋ قورى» اق باسقارۋشى ديرەكتورى دۋمان وسپانوۆ.
نۇرتورە سامارقان
