قالا ماڭىنداعى «جاسىل بەلدەۋ» اۋماعىن ارالاپ, قىستا ەگىلگەن اعاشتاردىڭ كوكتەگەنىن كورىپ شىققان وبلىس اكىمى ومىرزاق شوكەەۆ بىرنەشە تال ەگىپ, كوكتەمگى اعاش وتىرعىزۋ ناۋقانىن اشىپ بەردى. اۋماعى 8 مىڭ گەكتارعا جۋىق جاسىل القاپتىڭ كولەمىن الداعى ۋاقىتتا ەكى ەسە ارتتىرۋ كوزدەلگەن. ال سۋ جۇيەلەرىن ەنگىزۋ جۇمىستارى ناۋرىز ايىندا تولىق اياقتالادى. ۇڭعىمالار قازىلىپ, كوشەت وتىرعىزىلعان جەرلەر قورشالۋدا. «قالانىڭ ءىشى مەن اينالاسىن كوگالداندىرۋ جاڭارعان شاھاردىڭ قۇرىلىسىنداعى ماڭىزدى ماسەلەلەردىڭ ءبىرى. جاسىل القاپ تۇركىستاننىڭ تابيعي تىنىسىنا اينالادى. سونىڭ ارقاسىندا اۋا تازارىپ, قالا شاڭ مەن جەلدى داۋىلدان قورعالادى. سونىمەن بىرگە, قالا تۇرعىندارىنىڭ سۇيىكتى دەمالىس ورنى بولارى ءسوزسىز. ويتكەنى جاسىل بەلدەۋ اۋماعىندا سۋ ارنالارى مەن جاساندى كول پايدا بولادى», دەدى وبلىس اكىمى.
جاسىل بەلدەۋدەگى تالىمباقتا تۇركىستان قالاسىنىڭ كليماتىنا تەز بەيىمدەلەتىن, تەك وزگە مەملەكەتتەردە وسەتىن وسىمدىكتەردى جەرسىندىرۋ بويىنشا تاجىريبەلەر جاسالادى. مۇنداعى ماقسات - كەيبىر قىلقانجاپىراقتى اعاش تۇرلەرىن جاسىل بەلدەۋدە ءوسىرۋ ءۇشىن بەيىمدەۋ.
تۇركىستان وبلىسى
