سالتاناتتى ءىس-شاراعا سىرتقى ىستەر ءمينيسترىنىڭ ورىنباسارى مارعۇلان بايمۇحان, قازاقستاننىڭ ليتۆاداعى ەلشىسى ۆيكتور تەمىرباەۆ, ليتۆا ۇكىمەتى جانىنداعى از ۇلتتار ماسەلەلەرى جونىندەگى دەپارتامەنتىنىڭ ديرەكتورى ۆ.مونتيۆيدايتە, ۇلتتىق قاۋىمدار ءۇيىنىڭ ديرەكتورى ا.گەدامينسكيەنە, «نۇرساۋلە» ليتۆا قازاقتارى قوعامىنىڭ ءتورايىمى س.قاناپينا, ۇلتتىق قاۋىمداستىقتار كەڭەسىنىڭ وكىلدەرى جانە ليتۆالىق تۇركىتانۋشىلار قاتىستى.
اشىلۋ ءراسىمى بارىسىندا م.بايمۇحان قوناقتارعا عىلىمنىڭ كوپتەگەن سالالارىنا تۇبەگەيلى ۇلەس قوسقان «الەمنىڭ ەكىنشى ۇستازىنىڭ» ءرولى جايىندا ايتىپ ءوتتى. سونداي-اق, ول شىعىستىڭ ۇلى ويشىلىنىڭ بيىلعى مەرەيتويى يۋنەسكو-نىڭ ۇمىتىلماس كۇندەرى مەن وقيعالارىنىڭ كۇنتىزبەسىنە قوسىلعانى جانە حالىقارالىق دەڭگەيدە كەڭىنەن مەرەكەلەنەتىنىنە ەرەكشە كوڭىل اۋداردى.
قازاقستاندىق ديپلومات ءال-فارابي مۇراسىنىڭ, ءال-بيرۋني سياقتى, ەۋروپالىق عىلىمنىڭ قالىپتاسۋىنا زور ىقپالىن, قايتا وركەندەۋ ءداۋىرىنىڭ باسىنداعى ەۋروپانىڭ ۇلى ادامدارى ءۇشىن شەكسىز شابىت كوزى بولعانىن دا اتاپ ءوتتى.
ليتۆانىڭ ۇلتتىق قاۋىمدار ۇيىندەگى «نۇرساۋلە» قازاقتار قوعامى الاڭىندا اشىلعان ءال-فارابي اتىنداعى ورتالىققا كەلۋشىلەر ۇلى عالىمنىڭ ەڭبەكتەرىمەن تانىسىپ قانا قويماي, سونىمەن بىرگە قازاقتىڭ مادەنيەتى مەن سالت-ءداستۇرىن دە جاقىنىراق بىلە الادى. ورتالىقتىڭ قىزمەتى, ەڭ الدىمەن, قازاقستان مەن ليتۆا اراسىنداعى مادەني جانە عىلىمي ديالوگتى دامىتۋعا باعىتتالاتىن بولادى.
