وسى ورايدا بيىلعى ناۋرىز ايىنىڭ العاشقى ون كۇندىگىندە «اقتوبە ونىمدەرى - 2020» اتتى تاقىرىپتا وتكىزىلگەن جەرگىلىكتى تاۋار وندىرۋشىلەر كورمەسىنىڭ اۋقىمى مەيلىنشە كەڭ بولعانى اتاپ ايتۋعا تۇرارلىق ءىس. وعان وڭىردەگى قۇرىلىس ماتەريالدارى كيىم-كەشەك جانە ازىق-ت ۇلىك ونىمدەرىن وندىرەتىن قىرىقتان استام كاسىپورىن قاتىسىپ ءوز تاۋارلارىن كوپشىلىكتىڭ نازارىنا ۇسىندى.
جوعارىدا ايتىلعانداي اتالمىش كورمەنىڭ سوڭى فورۋمعا جالعاسىپ, مۇندا شاعىن جانە ورتاشا بيزنەستىڭ دامۋ پەرسپەكتيۆالارى تالقىلانعانى دا ونى مازمۇن جاعىنان بايىتا تۇسكەندەي اسەر قالدىردى. وعان رەسەيدىڭ ورىنبور وبلىسىنداعى كاسىپكەرلەردىڭ قۇقىعىن قورعاۋ جونىندەگى ۋاكىل ۆيكتور كورشۋنوۆتىڭ ارنايى كەلىپ قاتىسۋى دا كورمە-فورۋمنىڭ ءورىسىن وسىرە ءتۇستى دەۋگە ابدەن بولادى. سونىمەن بىرگە وسى ىرگەلى جيىندا كاسىپكەرلەر پالاتاسى كاسىپكەرلەردىڭ قۇقىن قورعاۋ جانە سىبايلاس جەمقورلىققا قارسى ءىس-قيمىل جونىندەگى كەڭەستىڭ توراعاسى ەسىمحان قۇرمانعوزين اقتوبەدەگى وڭ باستامالارعا قولداۋ ءبىلدىردى.
بۇدان ءارى «اتامەكەن» وڭىرلىك كاسىپكەرلەر پالاتاسىنىڭ ديرەكتورى انار ءدارجانوۆا بۇعان دەيىن اتقارىلعان جۇمىستارعا توقتالا كەلىپ, وبلىستا الپىس مىڭعا جۋىق شاعىن جانە ورتا كاسىپورىن سۋبەكتىلەرى جۇمىس جاسايتىنىن العا تارتتى. ونىڭ ايتۋىنشا وتكەن 2019 جىلى «بيزنەستىڭ جول كارتاسى - 2020» باعدارلاماسى بويىنشا پالاتا وكىلدىگىنىڭ قولداۋىنا سايكەس 256 شاعىن جانە ورتاشا بيزنەس سۋبەكتىلەرى اشىلعان. سوعان ساي جالپى سوماسى 870 ميلليون 364 مىڭ تەڭگەگە جەتپىس ەكى جاڭا جوبا جۇزەگە اسىرىلعان. سونىمەن بىرگە بيزنەس – كەڭەسشى» جوباسىنا سايكەس 1069 ادام وقىعان. بۇعان قوسا «بيزنەس ءوسۋ» باعدارلاماسى بويىنشا جۇزدەگەن ادام جاڭا ماماندىقتارعا بەيىمدەلگەن.
ارينە مۇنىڭ ءبارى جاعىمدى جايت. وڭ قۇبىلىس ەكەنى انىق. ايتسە دە وڭىردە جەرگىلىكتى قامتۋدىڭ الەۋەتى مەن مۇمكىندىگى ءالى دە بولسا تولىق پايدالانىلماي وتىرعانىن جاسىرىپ قالۋدىڭ ەشقانداي ءجونى جوق. اتاپ ايتقاندا بۇعان دەيىن جۇرگىزىلگەن بىرقاتار تالداۋلار مەن زەرتتەۋلەر كەيبىر جەرگىلىكتى مەملەكەتتىك ورگانداردىڭ ءالى كۇنگە دەيىن يمپورتتالعان تاۋارلاردى ساتىپ الىپ جۇرگەنىن كورسەتەدى. مۇنداي كورىنىس اقتوبە ايماعىندا ءدال سول تەكتەس ءونىمدى ساپالى وندىرەتىندەر بار جاعدايدا ورىن الىپ وتىرعانىن ەسكەرسەك, مۇنداي تاجىريبەنى قولداۋ قويۋ قيىن-اق.
بۇگىنگى كۇنى جەرگىلىكتى قامتۋ ۇلەسى ورتاشا ەسەپپەن العاندا ەلۋ پايىزعا جەتپەي جۇرگەنى وسىنداي نەمكەتتىلىك پەن ەنجارلىقتىڭ سالدارى بولسا كەرەك. سونىمەن بىرگە جەرگىلىكتى قامتۋ ۇلەسى ماسەلەسىنە قاتىستى العاندا تاماق جانە جەڭىل ونەركاسىپ ونىمدەرى مەن قۇرىلىس ماتەريالدارى سەكىلدى تاۋار تۇرلەرى كەم دەگەندە توقسان پايىزدى قۇراۋى كەرەكتىگى دە ەشقانداي تالاس تۋعىزبايدى. جەرگىلىكتى اتقارۋشى ورگاندار تاراپىنان ينفراقۇرىلىمدىق جۇيەلەردى قالىپتاستىرۋ مەن يندۋستريالىق ايماق اۋماعىنا جەر تەلىمدەرىن بەرۋ جونىندەگى ماسەلەلەر تۇبەگەيلى شەشىم تاپقان جاعدايدا بۇل ولقىلىقتاردىڭ ورنى تولاتىنىنا سەنىم مول.
اقتوبە وبلىسى
